Elder David P. Homer

Usa sa labing unang mga panumduman ni Elder David P. Homer kalabut sa ebanghelyo mao ang pagka-assign sa edad nga 14 isip usa ka kauban sa home teaching sa usa ka miyembro sa iyang ward “kinsa migamit og usa ka talagsaong paagi sa home teaching,” miingon si Elder Homer. “Dili kadto mahitungod sa pagbisita og balay ug mga tawo; mahitungod kadto sa pagpangalagad sa ilang mga panginahanglan.”

Isip managkompanyon, nag-ampo sila ug maghisgut sa mga pamilya nga gi-assign ngadto nila, dili isip mga hamtong ngadto sa usa ka batan-on apan isip mga higala diha sa pagserbisyo sa priesthood. “Nakat-on ko nga ang Espiritu moabut ug ang mao inubanan sa pagserbisyo,” miingon si Elder Homer.

Kana nga leksyon nagpabilin kaniya sa tibuok niyang kinabuhi ug sa misunod nga mga pagserbisyo sa Simbahan, mahimong sa pagserbisyo isip usa ka Area Seventy, lider sa nursery, o tig-asikaso sa bulletin Board—usa ka calling nga ilang gituman samtang siya ug ang iyang asawa nagpuyo sa Melbourne, Australia.

Si David Paul Homer natawo niadtong Abril 25, 1961, didto sa Salt Lake City, Utah, USA, nilang Frederick ug Phyllis LeNila Homer. Human sa iyang misyon sa Hong Kong gikan sa 1980 hangtud 1982, naka-ila niya si Nancy Dransfield, usa ka graduate sa Brigham Young University, sa usa ka fireside sa institute didto sa Siyudad sa Salt Lake, diin nagtrabaho siya ug nag-eskwela sa University of Utah. Nagminyo sila didto sa Salt Lake Temple niadtong Hulyo 31, 1984. Gipadako nila ang lima ka mga anak nga mga babaye ug usa ka anak nga lalaki.

Si Elder Home nakahuman og kurso nga bachelor sa economics sa University of Utah ug usa ka kurso nga master sa business administration gikan sa Wharton School sa University of Pennsylvania.

Atol sa iyang 30-ka tuig nga pagtrabaho isip usa ka executive sa General Mills, siya ug ang iyang asawa mipuyo sa Miami, Florida, USA; Minneapolis, Minnesota, USA; Burlington, Ontario, Canada; ug Saint-Sulpice, Vaud, Switzerland.

Si Elder Homer nakaserbisyo isip presidente sa stake, bishop, presidente sa elders korum, ug executive secretary sa ward. Isip usa ka Area Seventy gisugdan niya ang iyang pagserbisyo sa Canada ug gipadayon kini sa Europe, diin nagserbisyo siya sa milabayng upat ka tuig sa wala pa gipaluyohan isip usa ka Kinatibuk-ang Authority Seventy niadtong Marso 31, 2018.