Elder Robert C. Gay

Samtang nagserbisyo isip mission president sa Ghana, usa ka adlaw si Elder Robert C. Gay nakadawat og impresyon nga mohunong ug tabangan ang batang lalaki nga naghilak. Sa sinugdanan, gibaliwala ra niya ang impresyon apan sa wala madugay nagpadala siya og miyembro sa Simbahan sa pagpangita ug sa pagdala sa bata ngadto kaniya.

Si Elder Gay, gipaluyohan isip sakop sa Kapangulohan sa Seventy niadtong Marso 31, 2018, nasayran nga ang batang lalaki namaligya og buwad alang sa iyang tig-atiman. Nianang adlawa nawala sa bata ang tanan niyang halin tungod sa buslot sa iyang bulsa.

“Kon mopauli siya nga wala ang kwarta, tawagon siya nga bakakon, labing siguro bunalan, ug dayon palayason,” miingon si Elder Gay. “Among gihupay ang iyang kahadlok, giilisan ang nawala, ug gibalik sa iyang tig-atiman.”

Sigun sa iyang gipasabut niadtong Oktubre 2012 nga kinatibuk-ang komperensya, kadto nga kasinatian nakatudlo kang Elder Gay og duha ka talagsaong kamatuoran: “Una, nasayud ko dili sama kaniadto nga ang Dios naghunahuna sa kada usa kanato, ug dili gayud mobiya kanato; ug ikaduha, nga kita kinahanglang maminaw sa tingog sa Espiritu nga naa kanato ug ‘moadto’ bisan asa kita paadtoon bisan pa sa atong kahadlok o bisan unsa nga kalisud.”

Si Elder Gay gipaluyohan isip General Authority Seventy niadtong Marso 31, 2012. Dihang gitawag siya ngadto sa Kapangulohan sa Seventy, nagserbisyo siya isip Area Seventy sa Asia North Area. Nagserbisyo siya kanhi sa headquarters sa Simbahan isip chairman sa Self-Reliance Services/Perpetual Education Fund Committee, nga may mga responsibilidad sa self-reliance services sa tibuok kalibutan.

Sa wala pa siya matawag ngadto sa Seventy, siya ang chief executive officer sa kompanya sa patigayon diin usa siya sa mga nagtukod. Usa usab siya sa nagtukod ug nagserbisyo isip direktor sa daghang humanitarian [makitawhanon] nga mga organisasyon ug nagtrabaho sa mga patigayon sa banko sa Wall Street, isip management consultant, ug isip instruktor sa economics sa Harvard University.

Si Elder Gay nakadawat og bachelors degree sa economics nga may emphasis sa statistics gikan sa University of Utah ug PhD sa business economics sa Harvard University.

Nakaserbisyo si Elder Gay isip full-time nga misyonaryo sa Spain, isip high priest group leader, Young Men president sa ward, high councilor, counselor sa bishopric, ug Area Seventy.

Natawo siya sa Los Angeles, California, USA, niadtong Septyembre 1, 1951. Naminyo siya ni Lynette Nielsen niadtong Abril 1974. Mga ginikanan sila sa pito ka anak.