Sa Faafofoga le Tama Faalelagi i Lau tatalo
Raquel Pedraza de Brosio
Iuta, ISA
Ata na tusia e Joshua Dennis
Sa matou nonofo ai pea i lo matou atunuu moni o Argentina, ina ua amata lo maua aiga ma lou toalua. O i maua o ni faifeautalai ua foi mai a ma misiona ma iloa ai o se faamanuiaga le faaipoipo i le malumalu o le Alii. Sa ma fiafia e savavali i le ala e toe foi faatasi atu ai i le Tama Faalelagi.
Sa ma iloa o le ata o le faaolataga e aofia ai tofotofoga, ae sa ma talitonu o le a mafai ona ma manumalo mai so o se mea e ala i le faatuatua ma le tatalo. Ae sa ma le i faamoemoeina ni puapuaga e oo mai ia i maua e aunoa ma le faagataina. O lea tofotofoga ma lea tofotofoga sa foliga ua pau mai o se timu i o maua luga.
I se tasi aoauli sa na o au lava, ua lagona le faanoanoa tele ma tagi aue ona o o maua tofotofoga. Sa ou le iloa po o le a le mea a fai. Soo se taimi sa ou taumafai ai e taofi le tagi, sa atili ai ona ou lagona le faanoanoa ma le faatu.
Ona ou manatu lea i le tusa o le tele o alii ma tamaitai o e na faasoa mai ia te au le taua o le tatalo mo i latou i taimi faigata. E iai lau molimau i le tatalo, ae ua matua mafatia lava lou mafaufau ma le agaga na ou manatu ai o le a ou le maua ni upu e tautala ai.
I loimata maligi, sa ou tootuli ifo i tafatafa o lou moega ma i lou loto atoa lava, sa ou aioi atu i le Tama Faalelagi mo se faamafanafanaga ma le filemu. Sa ou le fesili atu mo se tali pe ina ia aveesea tofotofoga. Sa na ona ou ole atu mo se filemu.
A o ou tatalo, na ou faalogoina ai se tuitui i lou faitotoa i luma. Sa ou tatala le faitotoa, ma loimata ua iai pea i ou mata, ma vaai atu i se tuafafine mai le Aualofa. Na ia faimai sa galue o ia i le eria ma sa afe mai i lana uila afi. Pau le mea sa mafai ona ou faia o le fusi ia te ia. Sa ia faapea mai, “ou te le iloa pe aisea, ae sa ou lagona le manaomia ona ou afe mai ma vaai oe.”
Sa ma nonofo i le laulau o lau umukuka ma ia fesoasoani e faamafanafana mai ia te au. Ina ua uma ona ma talanoa mo ni nai minute, sa amata loa ona ou lagona e le na o au ma e ua faafofoga mai le Tama Faalelagi i lau tatalo.
O se faamanuiaga le mafai ona talanoa i lou Tama Faalelagi e ala i le tatalo. Sa ia faafofoga mai ia te au i lou taimi o le manaomia ma auina mai se tasi o Ana fanau e fesoasoani mai ia te au. Ou te faafetai sa lagona e lenei tuafafine le musumusuga a le Agaga ma mulimuli ai.