Auauna Atu i le Toatasi

Soo se taimi lava e te lagona ai ua na o oe o se isi fuainumera, ia manatua e le aunoa o oe e numera TASI.

I nai tausaga ua mavae, sa matou siitia atu ai i se uarota fou. Sa tofia a’u e lo’u taitai perisitua i se soa faiaoga o aiga ma o se tasi o aiga sa tofia i ai a’u o se tama ua le toe sau i le Lotu mo le tele o tausaga. Ua le o toe toaga o ia ma ua le o toe fia sau i le Lotu e oo lava ina ua maea le ma asiasiga ma valaauliaina.

Ao ou alu ese atu i se tofiga i se isi atunuu, sa ou tesi atu i lenei uso pele ma se savali faamalosiau ma se isi valaaulia e sau i le Lotu. Sa ou faamautinoa atu ia te ia, afai na te manaomia se taavale, e mafai ona piki o ia ma lona toalua e lo’u toalua. A o ou tootuli e tuuina atu a’u tatalo, sa ou faalogoina se ii mai la’u telefoni i sana feau tusitusia e tali mai ai. O le feau e faitauina faapea, “sa ma talanoa ma lo’u toalua ma e ma te lagona ua na o i ma’ua o se isi fuainumera i le Ekalesia”.

Ao ou tootuli pea, sa ou tatalo i le Tama Faalelagi ma faapea atu, “Tama faamolemole, silasila mai i le feau lenei. O le a se tala e tatau ona ou tau atu?” I lena lava taimi na oo mai ai se manatu musuia i lo’u mafaufau, “uso pele, soo se taimi lava e te lagona ai ua na o oe o se isi fuainumera, ia manatua e le aunoa o oe e numera TASI”.

Ou te le’i toe faalogo i se tala mai ia te ia i lena aso, ae ina ua ou toe foi i le fale, o le Aso Sa na sosoo ai sa ou alu i le Lotu ma sa i ai iina le uso pele lea ma lona faletua. Ao ou faafeiloai atu ia te ia, sa ia luluina lo’u lima ma fai mai, “Na tatau lava ona ou sau. E le mafai ona ou nofo [i le fale].”

Ao o’u mafaufau i lenei aafiaga, sa ou matua faafetai e faalogo atu ia Peresitene Russell M. Nelson o faasilasila mai se suiga tele i Faiaoga o Aiga ma Faiaoga Asiasi i le taimi o le sauniga o le afiafi i le Aso Sa o le konafesi aoao ia Aperila.

Sa saunoa Peresitene Nelson e faapea, “ua matou faia se faaiuga ina ia faamalolo faiaoga o aiga ma faiaoga asiasi e pei ona tatou iloaina ai. Ae, o le a tatou faaaogaina se faiga sili ona fou ma sili ona paia e tausia ai ma auauna atu ai i isi. O le a na o ona tatou faasino atu i nei taumafaiga o ni ‘auaunaga’.”

Na fetalai mai le Alii i le Aposetolo o Peteru ma ia i tatou taitoatasi faapea, “Fafaga a’u mamoe” (Ioane 21:17). Tatou te faia lenei mea o ni uso ma tuafafine o auaunaga i se auala tuufaatasia i lalo o le taitaiga a taitai perisitua ma ausilali.

E tatau ona tatou faaaofia ai lo tatou Tama Faalelagi ma Lona Alo o Iesu Keriso i la tatou auaunaga, na fetalai mai ai le Alii. “O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te a’u” (Ioane 10:27). Ao tatou auauna atu ma le agaga tatalo, saili faaaliga ma mulimuli i uunaiga o le a avea i tatou ma siufofoga o le Alii mo Ana mamoe e mulimuli i ai.

Na faamalamalama mai foi e Elder Jeffery R. Holland i le sauniga afiafi o le Aso Sa o le konafesi aoao ia Aperila nisi o auala e tele e mafai ona tatou auauna atu ai i le tasi ma le isi.

“E pei ona fautua mai e le Au Peresitene Sili i le tele o tausaga ua mavae, fai le mea sili e te mafaia. E faaopoopo atu i soo se faatulagaga ua e faatuina mo asiasiga moni, e mafai ona suitulaga lena kalena i valaau i le telefoni, tusiga tusitusia, tesi, imeli, talanoaga i luga o vitio, talanoaga i fonotaga a le Ekalesia, poloketi faaleauaunaga fefaasoaai, gaoioiga faaagafesootai, ma le anoanoai o avanoa i le lalolagi o ala faasalalau faaagafesootai.”

“E le manaomia e i matou o i le laumua o le Ekalesia ona iloa pe faapefea po o fea po o afea e te fesootai ai ma au tagata. Na o le matou fia iloa—ma popole tele—ia e faia, ma ia e faamanuiaina i latou i soo se auala e te mafaia.”

I Lana faataoto faigofie ae mamana e uiga i le mamoe na leiloa, na fetalai mai ai le Faaola, “o ai ea so outou e ana mamoe e selau, afai e le iloa le tasi, e le tuua e ia le iva gafulu ma le iva i le vao, a e alu ma saili i le ua le iloa, seia maua?” (Luka 15:4)

O se faamanatu lenei i soo se taimi lava e te lagona ai faapei ua na o oe o se isi fuainumera, ia manatua e le aunoa, i le Alii o oe e numera TASI.