O Le Upu Mulimuli
Auala e Ono e Manatua ai Pea le Faaola
Saunia e Elder Gerrit W. Gong
O Le Korama a Aposetolo e Toasefululua
Mai se saunoaga i le konafesi aoao ia Aperila 2016.
O vaiaso taitasi, i le aai ma feinu ai i le faamanatuga, tatou te osi feagaiga ai e manatua pea le Faaola. I le faaaogaina o le toeitiiti lava 400 o mau faasino i le upu manatua, o auala nei e ono e mafai ona tatou manatua ai pea o Ia.
Muamua, e mafai ona tatou manatua pea o Ia e ala i le mauaina o le mautinoa i Ana feagaiga, folafolaga, ma faamautinoaga.
Lua, e mafai ona tatou manatua pea o Ia e ala i le faailoaina o Lona aao i o tatou olaga atoa.
Tolu, e mafai ona tatou manatua pea o Ia e ala i le faatuatua pe a faamautinoa mai i tatou e le Alii “o ia o lē ua salamo i ana agasala, o ia lava lea ua faamagaloina, ma o A’u, o le Alii, e lē toe manatuaina lava i latou” (MF&F 58:42).
Lona fa, e valaaulia e Ia i tatou ia manatua e Na te faafeiloai pea i tatou i le aiga.
Lima, e mafai ona tatou manatua pea o Ia i le Sapati e ala i le faamanatuga. I le faaiuga o Lana auaunaga i la le tino ma le amataga o Lana auaunaga toetu—i taimi uma e lua—na ave ane ai e le Faaola le falaoa ma le uaina ma fetalai mai ia tatou manatua Lona tino ma le toto.
I le sauniga o le faamanatuga, tatou te molimau atu i le Atua le Tama tatou te naunau e ave i o tatou luga le suafa o Lona Alo ma manatua pea o Ia ma tausia Ana poloaiga, ua Ia tuuina mai ia te i latou, ina ia tatou maua Lona Agaga e faatasi ma i tatou (tagai Moronae 4:3; 5:2; MF&F 20:77, 79).
Ma le mea mulimuli, lona ono, ua valaaulia i tatou e lo tatou Faaola ia manatua pea o Ia e pei ona Ia manatua pea i tatou.
Ua tautino mai lo tatou Faaola:
“Ioe, atonu e galo ia te i latou, ae o le a le galo ia te a’u oe.
“Faauta, ua Ou togitogia oe i luga o alofilima o o’u lima” (Isaia 49:15–16; tagai foi 1 Nifae 21:15–16).
Ua ia molimau mai: “O A’u o lē na sii a’e i luga. O A’u o Iesu o le na faasatauroina. O A’u o le Atalii o le Atua” (MF&F 45:52).
Ou te molimau atu ma le agaga maualalo, ma tatalo, o le a tatou manatua pea o Ia—i taimi uma, i mea uma, ma nofoaga uma atonu tatou te i ai (tagai Mosaea 18:9).