Galulue e Aumai le Tausiga Faafalema’i [mo E ua Faatalitali Oti] i Amerika Samoa

E leai se tausiga faafalema’i [mo e ua faatalitali oti] i Amerika Samoa. O se taunuuga la, o i latou o loo faatalitali oti e tatau ona ave i le falema’i e tausi ai i latou seia oo ina mafai ona toe ave i le fale pe seia oo foi ina latou maliliu. Mo i latou e le o mananao i ni togafitiga iina e leai se isi auala e mafai ona tuuina atu ia i latou e mafai ai ona pasi filemu atu mai lenei olaga.

Ae peitai, i le mavae ai o le lima tausaga o tuuina atu ma le manuia le tausiga faaleaiga faalesoifua maloloina i tagata matutua i Amerika Samoa, ua faamoemoe ai le Grace Home Care ina ia vave ona ofoina atu foi se tausiga faafalema’i [mo e ua faatalitali oti].

O se sui Samoa o Sala Mata’ali’i, Faatonusili Faalerisone o le Grace Home Care, sa faamatala mai faapea, “E ui o le tele o lo’u olaga sa ou ola i le Iunaite Setete, ae ua leva ona ou manao e fesoasoani i tagata o lo’u atunuu, o Amerika Samoa. O le lima tausaga talu ai, sa ou talosaga ai ma mauaina se fesoasoani a le malo e tuuina mai se auaunaga e lei maua i lena taimi i Amerika Samoa, o se fale mo le tausiga o le soifua maloloina mo tagata matutua.”

Ina ua maea ona tuuina atu ma le manuia o le tausiga faaleaiga o le soifua maloloina mo le lima tausaga, na silasila Sala e i se isi manaoga e lei ausia, o se tausiga faafalema’i [mo e ua faatalitali oti]. Ao faaauau ona galue ma tuu atu le tausiga mo fanau ma aiga o faatalitali oti o latou tagata o e leai se isi auala ae na o le auina atu o i latou i le falema’i.

Sa faaauau pea Sala, “Sa ou toe manao foi e fesoasoani i ou tagatanuu o Amerika Samoa, o lea sa ou talosaga ai mo se isi fesoasoani a le malo e faataga i matou e tuuina atu se tausiga faafalema’i [mo e ua faatalitali oti]. Matou te fiafia i se vaega lautele o le tuuina atu o le lagolago i le atunuu ma ua faamoemoe o le a vave ona avea le Grace Home Care ma Grace Health Care, e ofoina atu ai le auaunaga faaopoopo o le tausiga faafalema’i [mo e ua faatalitali oti].”

E talitonu tagata Mamona i le tuuina atu o le tausiga mo o latou uso a tagata.