I le Pulelaa
O Le A Le Faatuatua
Ata pue o Sister Ferguson i faaaloaloga a le Faletusi o le Talafaasolopito o le Ekalesia; faavaa mai le Getty Images
Ata na tusia e Dan Burr
Ona o le faatuatua o le muai mataupu faavae o le talalelei, e talafeuga ona fesili, O le a le faatuatua? Ua tau mai e tusitusiga paia ia i tatou “o le faatuatua o le faalagolago lea i mea ua faamoemoe iai, o le faamaoniga o mea e le o vaaia” [Faaliliuga a Iosefa Samita, Eperu 11:1]. … Ona ua tatou usiusitai i le talalelei, o lea e mulimuli mai ai ni faamanuiaga; ae afai tatou te faapea atu tatou te talitonu ae le usiusitai, ua tauleaogaina lava lo tatou faatuatua. Ua faapei o le tino e aunoa ma le agaga, ua oti. O lenei lava faatuatua ola, ou tuafafine talavou e, na mafua ai ona usitaia e o outou tama ma tina le talalelei i lo latou lava tofi o le eleele ma aiga; i le taulotoaiga o le tauemuga ma sauaga, ona o lo latou faatuatua na latou tuua ai o latou aiga ma fanau ma mea uma sa pele ia i latou ma folau atu i le vasa loloa, … ma le faatuatua i aao o Ieova e aumai saogalemu i latou i le nofoaga o le malologa; ma o le toatele o i latou sa latou le iloa lava tofotofoga ma faigata o le soifuaga, … Mafaufau i ai, ou tuafafine talavou: le malaga a o outou tama ma tina i le sili ma le afe o maila (1,609 km) ma toso se taavale, ma a latou meatotino ma ie moega, o mea e faaaoga e kuka ai meaai, lavalava ma isi., o le toatele o i latou e iai fanau laiti; ua tauasa vaitafe e oo i o latou sulugatiti ma savavali lemu i maila o oneone mamafa, ae i togalauapiga i le po o a latou pese faafetai ua oo atu i luma o le Atua, aua o le mataupu faavae o le faatuatua ua totoina i o latou fatafata; ua latou faamaonia mea e le vaaia; o le faatuatua ua latou taunuu ai i nei vanu; sa le o ni vanu lauusiusi e faapei ona outou vaai nei iai. O le faatuatua ua latou galueaina ai le eleele lafulafua, toafa ma e ala i faamanuiaga a le Atua ua manumalo ai le liua o le vao ma fua mai e pei o se rosa. …
O le a ou le maua se taimi ou te tau atu ai ia te outou o tofotofoga o lo tatou faatuatua ua mafua mai i alisi, se, lamala, lologa, e faapea foi ma sauaga a o tatou fili; ae i lona atoaga o i tatou o ni tagata ua matua faamanuiaina ma fiafia lava; ma e ala i le faatuatua tatou te faamoemoe ina ia tupu ma faatoateleina ma faalautele atu i le lalolagi seia, e faapei o Aperaamo o anamua, o lo tatou faatoateleina e leai sona iuga.
O lenei, au uo talavou pele, e ao ona tou le manatu e faapea ona ua tatou faia o ni mea e tele ua leai ai se mea e tou te fai; e ao ona outou faasalalau atu i le lalolagi. E ao ona outou le manatu ifo o le teritori o Iuta o le a tausia le fanau a Siona. E tatau ona outou atiae o ni nofoaga fou. …
O le mea lea, ia finafinau ma le faamaoni mo le faatuatua ua iai i aso nei e gata ai i o outou tama, ina ia mafai ona outou faia e ala i le faatuatua ina ia aumaia le faamoemoega o Ieova; ma ia faapea e le aafiaga faavavevave o le Agaga o le Atua ona iai i luga o fanau a Siona, ina ia avea o se afi ola i totonu ia i latou, ma maua ai ni fua e tele i le amiotonu.