Ua Faamanatu e le Malumalu o Hamilitone Niu Sila le 60 Tausaga o le Auaunaga

O le onosefulu tausaga ua mavae, sa i ai le perofeta pele o Tavita O. MaKei i Niu Sila e faapaia le Malumalu faatoa uma ona fauina o Hamilitone Niu Sila. Na muai faasilasila atu le malumalu i le aso 17 Fepuari 1955 ma sa suatiaina le laueleele i le aso 21 Tesema.

Na muai faapaiaina i le aso 20 Aperila 1958, ua 60 nei tausaga na faaaogaina ai le Malumalu o Hamilitone Niu Sila. O le uluai malumalu lea a le Ekalesia i le itulagi i saute ma o le malumalu lona sefulutasi o loo faaaogaina i le lalolagi. O le toatele o le Au Paia mai le Pasefika, e aofia ai ma Samoa, e malaga i Niu Sila e auai i le malumalu.

O le talanoa ai i le faapaiaga, o Waitohi Elkington, o se tasi o faifeautalai galue lea na auai i le sauniga lona lua i le aso 20 Aperila, na toe ta’ua talu ai nei: “O se mea faamanatu mo i matou uma le vaaia o le faamaeaina o lo matou malumalu iinei i Niu Sila ma faalogo i le Perofeta o tuuina atu le tatalo o le lotofaafetai ma faaalia lona alofa mo tagata o Niu Sila.”

E silia ma le 5,000 tagata na auai i le faapaiaga lea na faasafuaatu i le tele o sauniga. O le taulimaina o le eseese o gagana, na ese ai sauniga na faia mo tagata Samoa, Toga ma Maori.

O le siosiomia ai e le Nofoaga Autu o le Siteki a Tavita O. MaKei ma le Faletele faatoa uma ona fausia ma le Potutusi a Wendell B. Mendenhall ua toe faaleleia, Faletele a G.R. Biesinger ma Kai, na tu ai ma le faamamaluina le malumalu i luga o se mauga i le Temple View, Niu Sila (o se laufanua i Hamilitone) e vaavaai atu i le vanu o le Vaitafe o Waikato. E tautuaina tagata o le Ekalesia i Niu Sila ma le Atu Kuki.

O le aso 22 Iulai 2018, o le a tapunia ai le malumalu mo le toe faaleleia, e aofia ai le toe faaleleia i tulaga tau mafuie. Ua faamoemoe e toe tatala i le 2021 ma o le a toe faapaiaina i lena taimi.

Na fausiaina e le silia ma le 1,500 volenitia ua iloga o ni faifeautalai galulue, ma na avea le malumalu e 42,304 sikuea faatafafa ma se nofoaga e aoao ai tagata o le Ekalesia e uiga i le fuafuaga a le Atua mo tagata ma osia ai ni tautinoga ia ola i ni olaga faaKeriso.