Mea e 5 o le a Aoao Ai Oe e le Mataupu Faavae ma Feagaiga e Faatatau i le Avea o se Faifeautalai
Afai o lo o e sauni mo se misiona pe na o le vaavaai i ni auala e talanoa ai i au uo e tusa ai ma ou talitonuga, o lo o iai se taiala sili e mafai ona e taua o leisi tusi lesona a faifeautalai.
O le Mataupu Faavae ma Feagaiga. O iina o le a tatou maua ai aoaoga faavae fou na faatoa faaalia mai ma le matagofie e uiga i aiga e faavavau, o le mea e tupu pe a tatou oti, ma le ala e ao ona faatulaga ai le Ekalesia a Iesu Keriso. Ae tatou te maua foi—pea lava pea—poloaiga e fetufaai atu le talalelei. O le mea moni, mai folafolaga ma apoapoaiga uma ua tuuina atu i faifeautalai, e mafai ona e tagai ane i lenei tusi o mau o se taiala i le fefaasoaina o le talalelei.
Mo se faataitaiga, o upumoni ofoofogia nei e lima e mafai ona e aoao ai e uiga i le galuega faafaifeautalai mai lava na o le faitauina o le Mataupu Faavae ma Feagaiga.
1. E le manaomia lou popole i le mea e te alu iai.
MF&F 80:3: “O le mea lea, ia oulua o atu ma talai atu laʼu talalelei, pe i matu po o i saute, i sasaʼe po o i sisifo, e le afaina, ona e le mafai ona oulua sese ai.”
“Ou te le talitonu o le fuaitau ‘e le afaina’ e pei ona faaaogaina e le Alii i lenei mau o loo fautua mai ai e le popole o Ia po o fea e galulue ai Ana auauna. O le mea moni, e matua popole lava o Ia. … Na te musuia, taitaiina, ma faatonu Ana auauna faapaiaina. A o tauivi faifeautalai ia avea atili ma meafaigaluega agavaa ma gafatia i Ona aao ma faia le mea sili latou te mafaia e faataunuu ai ma le faamaoni o latou tiute, o lea e faatasi ai ma Lana fesoasoani “e le mafai ona sese”—pe o fea lava latou te auauna atu ai.”1
—Elder David A. Bednar
2. Teu i o outou mafaufau tusitusiga paia, ona e iloa ai lea o le mea e te tautala ai.
MF&F 84:85: “Ia teu i o outou mafaufau e le aunoa afioga o le ola, ma o le a tuu atu ia te outou i lea lava itula le vaega lena o le a fua atu i tagata taitoatasi.”
“A o e teu i lou mafaufau afioga o tusitusiga paia ma perofeta o aso e gata ai e ala i le suesue ma le faatuatua, o le a faateleina lou manao e faasoa atu ai le talalelei. Ua folafola atu o le a fesoasoani le Agaga ia te oe e iloa ai mea e te tautala ai pe a e aoao atu.”2
—Tala’i La’u Talalelei
3. O lo o i soo se mea tagata o lo o saili i le talalelei.
MF&F 123:12: “Aua o lo o i ai lava tagata e toatele i luga o le fogaeleele … o e ua faatauasoina i le taufaasese poto o tagata, ua latou taooto ma faatalitali e faasese, ma o e ua nao na taofia mai le upumoni ona ua latou le iloa le mea e maua ai.”
“O loo siomia outou, i aso uma, e uo ma tuaoi ‘o e ua nao na taofia mai le upumoni aua ua latou le iloa le mea e maua ai.’ A o taitaiina outou e le Agaga, e mafai ona outou faasoa atu se manatu, se valaaulia, se tesi po o se tuiti [tweet] e faalauiloa atu ai a outou uo i le upumoni o le talalelei toefuataiina.”3
—Elder David A. Bednar
4. Tatalo ma le maelega ina ia e aoao atu i le maelega.
MF&F 42:14: “Ma o le a tuu atu ia te outou le Agaga e ala i le tatalo o le faatuatua; ma afai tou te le maua le Agaga aua tou te aoao atu.”
“E ao i faifeautalai ona o ifo i o latou tulivae ma ole atu i le Alii e tatala o latou laulaufaiva ma talanoa ia i latou i faamanuiaga o i latou o le a outou aoaoina. Afai o le a latou faia o lea, o le a oo mai se malamalama fou i o latou olaga. O le a iai le naunautaiga sili mo le galuega. O le a latou iloa e faapea i se tulaga sao lava, o i latou o auauna a le Alii ua talanoa atu e fai ma Ona sui. O le a latou maua se tali ese mai a i latou ua latou aoaoina.”4
—Peresitene Gordon B. Hinckley (1910–2008)
5. O le a molimau atu le Agaga Paia i ai latou e te talanoa i ai.
MF&F 100:7–8: “Ae Ou te tuuina atu ia te oulua se poloaiga, ia oulua alaga atu soo se mea lua te alaga atu i lo’u igoa, i le mamalu o le loto, i le agaga o le agamalu, i mea uma. Ma Ou te tuuina atu ia te oulua le folafolaga lenei, pe afai e faia lenei mea o le a liligi ifo Agaga Paia e molimau i mea uma ma so o se mea lua te fai atu ai.”
“E mafai foi e le Agaga Paia ona galue e ala i le Malamalama o Keriso. E le totoina e se faiaoga o upumoni o le talalelei se mea e ese po o se mea fou i totonu o se tagata matua po o se tamaitiiti. Ae, e fesootai le faifeautalai po o le faiaoga ma le Agaga o Keriso lea ua i ai iina. O le a iai i le talalelei se faailo faapea ia i latou.”5
—Peresitene Boyd K. Packer (1924–2015)
Faatu se Sini
Ua na o se amataga lenei. A o outou suesue i le Mataupu Faavae ma Feagaiga i lenei tausaga, faatu se sini e aoao mea uma e mafai ona fai e uiga i le galuega faafaifeautalai. Ona outou faia lea o mea uma e amata ona ola ai i nisi o nei aoaoga. Manatua: afai ua ia te outou le manao e auauna atu i le Atua ua valaaulia outou i le galuega; aua faauta ua sinasina le fanua ua saunia e selesele” (MF&F 4:3–4).