Sa Ola le Matou Ogaumu Faamafanafana i le Faatuatua

Ata

ruler in oil

Ata na tusia e Kopp Illustration

Ina ua matou nonofo ma lo’u toalua o Mareko, ma le ma fanau laiti e toalima i le talafatai i sasae o le Iunaite Stete, sa matou nonofo i se fale sa i ai se ogaumu e alu i le suauu. Ina ia siaki le tele o le suauu, matou te tuuina ai se laau e fua ai i totonu o le tane. Ma afai sa laitiiti le suauu, matou te viliina le kamupani suauu e o mai e faatumu le tane.

I se taimi o se taumalulu tulaga ese lava ia Ianuari, sa i ai ni a matou faafitauli tautupe. Sa faapea foi ona ou faigaluega le tumau i afiafi i se faleaiga e faaopoopo atu i le matou tupemaua, ae sa i ai lava o matou faafitauli i le tau faasoasoaina. Sa iu lava ina oo mai i le filifiliga o le totogi o le sefuluai pe totogi ia mafanafana ai le matou fale. Sa matou fuaina le suauu ma sa oo i le lua inisi (5 sm) Pe na o le tasi pe lua ni aso e lava i lena mea. Ae sa matou filifili e tuu atu lo matou faatuatua i le Alii ma totogi la matou sefuluai.

O le aso na sosoo ai, sa toe fua ai e Mareko le suauu. Sa tumau lava i le lua inisi. Sa toe fua foi e Mareko i le aso na sosoo ai, ma sa tumau lava i le lua inisi. Sa sau lava le vevela, ae sa le’i alu i lalo le suauu. O aso e lua na sosoo ai, sa tumau lava le suauu i le lua inisi. Ou te manatua lo’u tagi i le po ina ua ou faalogoina le sau o le vevela. Sa le’i ola le matou ogaumu i le suauu; sa ola i le faatuatua.

Sa ou lagonaina le pei o le fafine ua oti lana tane lea na fafagaina le perofeta o Elia ma iloa ai, “sa le uma le falaoa i le kate, sa le faaitiitia foi le suauu i le fagu” (1 Tupu 17:16) Ina ua oo mai le aso o le totogi, sa toe fua foi e Mareko le suauu. O le taimi lenei na fua mai ua tasi le inisi (2.5 sm). O lenei ua alu i lalo le suauu, ae ua i ai le matou tupe e faatumu ai le tane.

Sa tofotofo e le matou aiga le folafolaga a le Alii o loo maua i le Malaki e 3:10: “Ma ia outou tofotofo mai ai ia te au i lenei mea, ua fetalai mai ai Ieova o Au, pe ou te le toina pupuni o le lagi mo outou, ma sasaa atu le manuia mo outou ina seia silisili ona tele.”

I soo se tasi o masalosalo i faamanuiaga o le totogi o le sefuluai, ou te uunaia outou e talia le valaaulia a le Alii e “tofotofo mai ai ia te au i lenei mea.” O le totogiina o le sefuluai e matala ai faamalama o le lagi, ma e ala i le usiusitai ma le faamaoni i tulafono ma poloaiga a le Alii, ua faamanuiaina ai i matou i le tele o auala.

O le a le galo lava i le matou aiga ia le taimi na ola ai le matou ogaumu faamafanafana i le faatuatua ae le o le suauu.