O le Lole-Aisa mo le Tupe o le Misiona
Sa auauna atu le tusitala o se faifeautalai i Filipaina ma o loo alala nei i Virginia, ISA.
“Ona fetalai atu lea o Iesu ia te ia, Ia e fafaga i a’u mamoe” (Ioane 21:17).
Sa savavali atu Iareto i le fale ma Tina ma Tama mai le lotu i le mutinitini o le la. Sa mafaufau o ia i le latou lesona i le Peraimeri. Talu ai ona e le lelei tele lana faalogo, o lea na tatau ai ona vaai ma le toto’a ia Iareto i ata sa faaali atu e lona faiaoga ma upu sa ia tusia i luga o le laupapa.
O lena aso sa latou aoao ai e faapea, sa fetalai atu Iesu i le au soo ina ia avea ma ni faifeautalai. Sa taumafaufau Iareto po o le a se mea e mafai ona ia faia e faasoa atu ai le talalelei, e pei ona fai mai ai Iesu. Sa ia iloaina e le’i mafai ona auauna atu o ia i se misiona. Ona ia maua lea o se manatu manaia lava. Atonu e mafai ona ia amata sefeina se tupe mo le misiona!
Ina ua taunuu i le fale, sa tamoe atu Iareto ma pasia ia Umber, o lana oti fagafao, ma alu i totonu o le fale. Sa ia aumaia se fagu pa’u lapoa ma faapu ma le faaeteete le pito i luga. Sa ia tusia “Tupe mo le Misiona” i le autafa. Ona alu lea i lona potu ma aumai lana tupe mai lalo o lona moega. Sa taitasi ona ia faapauina i totonu ia siliva. Ae sa tau le lilo le muli o le fagu i ana siliva uma. E mafai faapefea ona ia mauaina se tupe?
Sa mafaufau ma saga mafaufau pea Iareto. Sa tilotilo atu o ia i fafo i le faamalama i le la susulu. Sa matuai vevela tele le Atu Filipaina. Sa ai e Iareto ma ana uo ia lole popo faaaisa e toetoe lava i aoauli uma pe a tuua le aoga. “O lena tonu a!” sa ia mafaufau ai. Atonu e mafai ona ia faia ni lole aisa ma faatau atu i isi tagata e mananao e faamalulu.
Sa tamoe Iareto e sue Tina. “E mafai ona e faasino mai ia te a’u le faiga o lole aisa?” Sa fai atu ai e Iareto ia taga. Latou te faaaogaina le gagana faitaga, o se gagana e faaaoga ou lima e te tautala ai. Sa ataata Tina ma lue lona ulu.
O le aso na sosoo ai, sa savavali atu ai Iareto ma Tina i le maketi tele e fai i fafo ma faatau uma mai ia sapalai. Ina ua la taunuu i le fale, sa aumai i fafo e Iareto se pesini lapoa ma tuu i ai i totonu le peepee, susu totoo, vanila, ma penu. Sa faaaoga e Tina ma Iareto se faatumu e ligi ai le paluga i ni tamai tagapepa laiti. Ona la tuua uma lea o tagapepa i le fulisa. “Malo galue!” Sa fai atu ai e Tina ia taga.
E umi se taimi e faamalo ai lole aisa. Ae o le aso na sosoo ai i le tuua o le aoga, sa malo lelei ai! Sa tu Iareto i luga o se nofoa ma aumai le kula paepae mai luga o le pusaaisa. Sa ia tuu ni solo i le pito i lalo o le kula ma faataatitia loa ia lole aisa i le pito i luga. Sa le manofonofo o ia i le fia faatau atu.
Sa tamoe Iareto i fafo i le auala pefu. Sa taaalo ana uo i maua na fai i le fale ma tauai atu o latou seevae tosotoso i se atigiapa ina ia pau ai.
I autafa o le auala, sa ia faatuina ai se laulau ma se faailo tele sa fai mai, “Lole Aisa, 5 peso.” Sa tamoe atu lana uo o Jhonell ma tusi atu lona lima i le kula. Sa ia tuuina atu ia Iareto se lima-peso siliva, ma na aveatu i ai e Iareto ni lole aisa. Sa fepo o la alofilima.
E lei uma ae o mai isi uo a Iareto e faatau foi ni a latou lole aisa. O ni nai itula mulilmuli ane, ina ua valaau atu Tina ia Iareto e alu atu e fai le meaai o le afiafi, sa toe lava o ni nai lole aisa laiti na totoe.
Sa sii i luga e Iareto le kula lea ua toetoe lava uma faapea ma siliva. I se tasi o ana taga, sa ia tuu i ai nisi o siliva mo lana sefuluai. Ae tuu uma isi siliva i totonu o le isi ana taga. Sa le mafai ona faatali o ia e vaai ua tumu le tupe mo lana misiona.
I le fale, sa ia momonoina siliva o le tupe o le misiona i luga o le faaputuga i le pito i lalo o le fagu. O loo tele lava le avanoa! Ae sa lagona e Iareto le mafanafana o lona loto a o mafaufau e uiga i le auauna atu i se misiona i se aso. Sa ia filifili o le a ia faatau atu ia lole aisa i aso uma lava seia oo ina tumu lana fagu. Sa matuai manaia le lagona o le mauaina o tupe ina ia mafai ona avea o ia o se faifeautalai e pei ona fai atu ai Iesu ia te ia e fai.