O Le Oa e Fetaui Lelei e Faasoa Atu
“O taeao e ese le faapitoa,”o le tala lea a le faiaoga a Diego. “O le a tatou faia se Faaali ma Faamatala!”
Sa ataata ia Diego. E fiafia tele o ia i le Faaali ma Faamatala! Sa le mafai ona faatali o ia e faaali atu i ana uo se mea faapitoa.
Ina ua tuua le aoga, sa ta’u atu e Diego ia Mama le talafou manaia.
“O le a se mea e tatau ona ou avea?” sa ia fesili ai.
“O se mea e faapitoa ia te oe,” o le tala lea a Mama.
“E mafai ona ou aumaia Lobo!”
Ou te manatu e le mafai ona tatou avatua se taifau i le aoga,” o le tala lea a Mama. “Ae o loo i ai isi oa faapitoa e mafai ona e faasoa atu.”
E le’i umi ae amata loa le suega oa a Diego! Sa ia maua se manuki e faotui i ieie. E tatau ona ia avea o ia? Ae sa vaavaai solo pea Diego.
Sa autilo o ia i tua o nofoa o le umukuka. Sa autilo o ia i luga o le fatatusi. Sa le malolo o ia seiloga na te maua se mea e fetaui tonu lava.
Ona ia tilotilo lea i talaane o lona moega. Ona ia maua lea o le mea e fetaui lelei lava!
Sa tamoe Diego e faaali atu ia Mama. Sa ia uumauina lana oa.
“Mama!” sa ia fai atu ai. “Vaai! Ua ou mauaina le mea e sili ona lelei.”
Sa ia uu i luga se ata laitiiti e vaai i ai Mama. O se ata o Iesu a o avea ma se tamaitiiti. Sa maua e Diego ni lagona lelei ina ua vaai i le ata. Sa manao o ia i ana uo i le aoga ia maua foi lagona lelei.
“O se mea faapitoa lena mo le Faaali ma Faamatala,” o le tala lea a Mama. “O le a se mea o le a e faamatalaina i lau vasega e uiga ia Iesu?”
“E mafai e tagata uma ona fiafia,” sa ia fai atu ai. “Aua e alofa Iesu i tagata uma!”