Faapei o le Faaola: Tuputupu A’e i Itu Taua e Fa
E le tele ni mea tatou te iloa pe na faapei le tuputupu a’e o Iesu Keriso, ae ua tuuina mai e le Luka 2:52 ia i tatou se faaiteite tele lava.
Ata pue o se tamaitai o loo faaifoifo mai i papatafato mai le Getty Images
“O lona uiga, e tatau ona ou … o le a?”
Sa ou faalogo. E moni, sa ou faalogo. Sa siaki e le faiaoga lo’u fusipaunonoa, sa faasino tonu mai ia te a’u le faiga e faamamulu ai le maea, sa tilotilo sa’o mai foi i o’u mata ma fai mai, “O le a ou LE tuua oe ia pau!”
Ae i lena taimi taua, sa ou tu ai iina: gatete ma le afu, a o ou tilotilo ifo i lo’u tauau ma faasolo i lalo … i lalo lava, ma le iloa na tatau ona ou faia lena laa muamua.
[Oso] Ese i se papatafato.
Ia atonu e le’i faia mea ua ou faia, e uiga i le oso ese moni mai i se papatafato, ma le faamoemoe ua e lava saunia e taunuu saogalemu i lalo. Ae atonu sa e i ai iina faaleagaga. E te silafia, ina ua e suesue na’o oe i tusitusiga paia ma ua e faalogo i faiaoga o molimau mai e uiga i aoaoga ma mataupu faavae moni. E te lagona le valaaulia o oe e le Agaga e galue i ni auala o le a fesoasoani e avea atili ai oe e pei o le Faaola. Ua e fiafia e faia lenei laasaga ma faaali atu i le Alii lou tuuto i Lana talalelei.
Ona e mafaufau lea, “E faapefea ona ou faia lena mea?”
Ma o le mea sa foliga mai sa matuai manino ma mafai ona faia i sina taimi e le’i mamao atu, ua pau ese atu. Ia lena laia, ua e tu i le faasiusiuga o se papatafato faaleagaga, ua le mautinoa pe ua ia te oe ia mea sa’o e faaaoga po o le tapenaga e faatino ai upumoni na e mauaina.
Ina ia avea faapei o Iesu Keriso: E faapefea ona e faia lena mea?
Amata i le Amataga
Sa amata e le Faaola Lona soifuaga i le tino i le auala lava e tasi sa e faia ma ou faia ai: o se tamameamea. Ma i le aluga o taimi, e pei foi o i tatou, sa amata ona tuputupu a’e Iesu (tagai Mataupu Faavae ma Feagaiga 93:11–17). Sa aoao o Ia i le ala e savali, tautala ma ata ai. Sa aoao o Ia i le ala e galue, faitau, ma faifaimea faatasi ai ma tagata.
O le mea moni, o le ala na “tuputupu a’e” ai le Alii o loo tusia i le Luka 2:52: “Ua tupu le poto ma le tino o Iesu, ua alofagia o ia e le Atua atoa ma tagata.”
Afai tatou te mananao e avea e faapei o le Faaola, e mafai ona tatou mulimuli i Ana faataitaiga.
Ia sei o tatou vaavaai i lenei mamanu ma vaai i ai mo i tatou lava i le auala e mafai ai ona avea e faapei o Iesu Keriso!
“Tupu le poto”
Na foafoaina e le Atua o tatou mafaufau ina ia i ai se gafatia tulaga ese e iloilo, faagaoioi, ma faaaoga ai le atamai. O mea moni, fuainumera, tomai, faiga—e toetoe a le muta le tele o faamatalaga e mafai ona tatou faaputuina!
Ae e pei o le Faaola, tatou te saili ia tupu i le poto, ae le na’o faamatalaga. O le poto o le mafai lea ona faaaoga sa’o faamatalaga, malamalama i a tatou filifiliga, ma fai faaiuga lelei.
Na aoao mai Elder James E. Talmage (1862–1933) o le Korama a Aposetolo e Toasefululua, “O le faaaoga tatau o le malamalama e faavae i le poto.”1 Sa ia faamalamalama mai foi le ala na maua ai e le Faaola le poto: “Sa Ia faaputua le malamalama e ala i le suesue, ma maua mai le poto e ala i le tatalo, manatunatu, ma taumafaiga.”2 Sa aoaoina e Alema lona atalii o Helamana, “Ioe, ia manatua, lo’u atalii e, ma ia e aoao i le poto ina o e taulealea; ioe, a o e taulealea, ia e aoao e tausi i poloaiga a le Atua” (Alema 37:35; ua faamamafa le faatusilima). Mafaufau i ai: O le faatuatua, suesue ma le usiusitai e faaleleia atili ai o tatou tomai i le mauaina o le malamalama ma tupu ai le poto!
“Ua tupu le tino”
O Nifae sa tino tele ma malosi. O ia o se tagata sa ta’ua e tusitusiga paia e “tino ese” (1 Nifae 2:16). Ou te le [tino ese]. O le tino ese o Nifae sa mamanuina e faatino ai ni gaoioiga e matuai ese lava nai lo o lo’u fuaitino aua e ese galuega sa faaagaga e le Alii mo Nifae. Sa tatau ia Nifae ona fauina se vaa, sailia meaai mo lona aiga, ma fesoasoani ia latou malaga i le vao.
Ua i ai i o tatou tino faaletino mea tatou te manaomia ina ia mafai ona tatou ola ma fiafia i le olaga nei. Ona o le fuafuaga paia a le Atua, o se pepe fou e tuputupu a’e i le tino i le aluga o le taimi. Tatou te le tau faatutupuina ni totoga po o ni vae ma ni lima faaopoopo a o tatou faasolo matutua—o na elemene ua uma ona foafoaina o se vaega o o tatou tino. E leai se isi faaputuputuga faaopoopo e toe manaomia! Ae ina ia mafai ona tatou auauna atu i le Atua ma i latou e siomia i tatou, e tatau ona tatou faatumauina le maloloina o o tatou tino.
O o tatou tino faaletino o le malumalu atoatoa lelei lea ua mamanuina, po o se fale, mo o tatou agaga (tagai 1 Korinito 3:16–17; 6:19–20). Na aoao mai e Peresitene Russell M. Nelson: “O lou tino, po o a lava ana meaalofa faalenaruta, o se foafoaga mataina a le Atua. O se maota o le tino—o se malumalu mo lou agaga.”3
Atonu e oo o tatou tino i ni luitau ogaoga faaletino, le atoatoa, ma le tiga ona o loo tatou i ai i se aafiaga faaletino, ae na mamanuina ma le atoatoa e lo tatou Tama Faalelagi o tatou tino ina ia ausia ma le faamanuiaina o tatou avanoa i le olaga.
“Tupu i le alofagia e le Atua “
Na aoao mai Elder Jeffrey R. Holland o le Korama a Aposetolo e Toasefululua, “o le upumoni muamua ma le sili o le faavavau atoa, e alofa le Atua ia i tatou ma Lona finagalo atoa, manatu, mafaufau, ma le malosi atoa.”4
E alofa le Atua ia te oe. E tusa pe o faaletonu lou aso, e alofa o Ia ia te oe—i ou malosiaga, vaivaiga, fesili, ma faamoemoega uma. E faapefea la ona e “tupu i le alofagia e le Atua”? E te faaali atu ia te Ia e te alofa foi ia te Ia!
Sa fetalai atu Iesu i Ona soo i se tasi o taimi, “Afai tou te alofa mai ia te au, ia outou tausi mai i au poloaiga” (Ioane 14:15). O lou usiusitai e faaalia ai lou alofa mo le Atua. O lou usiusitai naunautai i gaoioiga laiti, i aso taitasi e mafai ona saunia ai oe e tali atu, pe a oo mai Ana valaaulia i le lumanai, ma ausia ai ni mea e tetele atu.
“Tupu i le alofagia e tagata”
Faatei! O le i ai o ni tagata se toatele e mulimuli ia te oe i faasalalauga faaagafesootai e le faapea ai ua “alofagia [oe] e tagata.”
Sa faaali atu e Iesu se auala e ese o le faatosinasina o isi—ma e sa Ia faatagaina e faatosinaina o Ia. O Ia ‘sa femaliua’i ma agalelei, … aua sa ia te ia le Atua” (Galuega 10:38).
Sa saunoa mai Peresitene Henry B. Eyring, Fesoasoani Lua i le Au Peresitene Sili, i se tasi o taimi, “Ou te manatua pea lava, e pei lava o le aso, ia uo sa pai mai i lo’u olaga mo le lelei i aso lava la ua leva. Ua mavae atu i latou, ae o le manatua o lo latou alofa, faataitaiga, faatuatua, ma molimau o loo faagaeetia ai pea lava a’u.”5
E mafai ona faateleina au faatosinaga e ala i le avea o se uo o le e pai atu i olaga mo le lelei! Ua aoaoina oe e leMo le Malosi o le Autalavou i le auala e: “Faaali atu le naunau faamaoni i isi; mata fiafia i ai ma tau atu i ai e te popole mo i latou. Ia taulimaina tagata uma i le agalelei ma le faaaloalo, ma aloese mai le faamasinoina ma le faitioina o i latou o siomia oe … Fai se taumafaiga faapitoa e avea ai oe o se uo ia i latou e matamumuli pe ua tuuatoatasi, o i ai ni manaoga faapitoa, pe ua manatu foi e le amanaiaina i latou.”6
Mafaufau i tagata taitoatasi e te faamemelo ma faaaloalo moni i ai—i latou e te fiafia i ai. O a ni uiga ua latou atinaeina e faamanatu atu ai ia te ia Iesu Keriso? Aua po o le a lava le lelei o a tatou uo, o le tatou uo silisili lava o Iesu Keriso, ma o Ana faataitaiga o le mea lena tatou te mananao e mulimuli i ai!
I Lona Malamalama, saunia e Greg K. Olsen
E Fesootai Uma Lava
“Ua tupu le poto ma le tino o Iesu, ua alofagia o Ia e le Atua atoa ma tagata” (Luka 2:52). A o e mulimuli i le faataitaiga a le Faaola o le tuputupu a’e, o le a e iloa ai e galulue faatasi atoatoa lelei ia elemene, ma o le a avea atili ai oe e pei o Ia. O le a galulue faatasi lou mafaufau, tino ma le agaga mo lou lelei, ma o le a mafai ona e faamanuiaina olaga o le toatele o isi ma “auauna atu i le [Atua] ma lou loto, manatu, mafaufau ma le malosi atoa”! (Mataupu Faavae ma Feagaiga 4:2).