Fautuaga e 8 mo le Faapaleniina o Manaoga o le Olaga

Ata

balancing life’s demands

Atatusi ma aikona mai le Getty Images

• Muamua, mafaufau i lou olaga ma faatulaga mea e ave i ai lau faamuamua. Sue e le aunoa ni taimi paganoa e mafaufau loloto ai po o fea o agai i ai ma o a mea o le a e manaomia ona fai e te oo atu ai iina. O Iesu, o la tatou faataitaiga, sa masani ona “maliu o ia i le mea tuufua, ua tatalo ai” (Luka 5:16). E tatau ona tatou faia lea lava mea e tasi i lea taimi ma lea taimi e toe faafou ai tatou lava faaleagaga e pei ona sa faia e le Faaola. Tusi i lalo galuega e te manao ia ausia i aso taitasi. Ia faalaualuga i le mafaufau ia feagaiga paia ua e osia ma le ALii a o e tusia i lalo au fuafuaga fai o aso taitasi.

• Lona lua, seti ni sini pupuu e mafai ona e ausia. Seti ni sini e paleni lelei—e le tele naua pe laiti tele foi, ma ia le maualuluga tele pe maualalalo tele foi. Tusi i lalo ia sini e ono mafai ona ausia ma galue i ai e tusa ma lo latou taua. Tatalo mo le taitaiga faalelagi i le setiina o au sini.

• Lona tolu, e ala i le paketi ma le poto, pulea ou manaoga moni ma fua ma le faaeteete e faasaga i ou manao e tele i le olaga. Ua toatele naua tagata taitoatasi ma aiga ua aafia i le tetele naua o aitalafu. Ia faaeteete i le tele o ofo faatosina e nono mai ai tupe. E matuai faigofie lava le nono mai o le tupe nai lo o le toe totogiina. E le o i ai ni auala ‘alo i le malupuipui i mea tautupe. O le a le i ai lava se paleni i o tatou olaga seiiloga e pulea lelei a tatou mea tautupe.

  Manatua ia totogi i taimi uma se sefuluai atoa.

• Lona fa, ia faalatalata i lou toalua, fanau, ma tagata o lou aiga, ma uo. O le a latou fesoasoani ia te oe e tausisia le paleni o lou olaga. Atinae ni mafutaga ma lou aiga ma uo e ala i fesootaiga malamalama ma faamaoni.

  O se faaipoipoga lelei ma ni sootaga lelei faaleaiga e mafai ona tausisia e ala i fesootaiga malu, agalelei, ma magafagafa. Ia manatua e masani lava o se tepa atu, o se faaivi o le mata, o se lue o le ulu, po o se pai atu o le a tele atu ni faamatalaga e fai ai i lo upu. O se uiga malie ma le faalogo lelei o ni vaega taua foi ia o fesootaiga lelei.

• Lona lima, suesue i tusitusiga paia. Latou te ofoina mai ia punavai sili ona lelei e tatau ona tatou fesootai ai pea ma le Agaga o le Alii. O se tasi o auala na ou maua ai lo’u malamalama mautinoa o Iesu o le Keriso, e ala lea i lo’u suesueina o tusitusiga paia. Ua talosagaina e Peresitene Russell M. Nelson tagata o le Ekalesia ina ia suesue ma le agaga tatalo le Tusi a Mamona i aso uma.

• Lona ono, e tatau ona tatou faatulagaina ia taimi i luga o a tatou kalena i aso taitasi mo le lava o le malologa, faamalositino, ma taimi paganoa pe afai tatou te fia olioli i se olaga maloloina ma paleni. O le lelei o foliga vaaia faaletino e faaleleia ai lo tatou mamalu ma le faaaloalo o le tagata ia te ia lava.

• Lona fitu, fai afiafi faaleaiga faalevaiaso. E le tatau ona tatou misia lenei avanoa faapitoa e “aoao ai le tasi i le isi mataupu faavae o le malo” (MF&F 88:77), e faapea ona taitai atu ai aiga i le ola e faavavau.

  O loo galue pea Satani e faaumatia a tatou molimau, ae o le a leai sona mana e faaosooso pe faalavelave ia i tatou e sili atu i lo tatou malosi e tetee atu pe afai o loo tatou suesue i le talalelei ma ola i ana poloaiga.

• O la’u fautuaga mulimuli o le, ia tatalo soo. E mafai ona e iloa faaiuga sao e fai i aso taitasi e ala atu i le tatalo e le aunoa, ma le faamaoni. Pe a ou mataala faaleagaga, ou te iloa ai e faigofie atu ona ou faapaleniina mea uma i lo’u olaga.

Ou te iloa e mafai ona faaopoopoina isi fautuaga i vaega nei. Ae peitai, ou te talitonu pe a tatou taulai atu i ni nai faamoemoega autu, o le a mautinoa lo tatou mafaia ona pulea le tele o manaoga e aumaia e le olaga ia i tatou. Ia manatua, o le tele naua o soo se mea i le olaga e mafai ona tatou tautevateva ai. I le taimi lava lea e tasi, o le itiiti tele foi o mea taua e mafai ona faia ai lea lava mea e tasi. Na fautua mai le Tupu o Peniamina, ia “iloa ua faia nei mea uma i le poto ma le faatulagaga lelei” (Mosiaea 4:27).

E masani lava o le leai o se taitaiga manino ma sini e mafai ona maumau ai o tatou taimi ma malosi ma saofaga ai i le le paleni o o tatou olaga. O la tatou sini autu e tatau ona ia saili “le tino ola pea ma le ola faavavau” (Mose 1:39). Faatasi ai ma lenei mea e fai ma a tatou sini, aisea la e le aveese ai mai o tatou olaga ia mea e feilafi mo ma faoa ai o tatou mafaufauga, lagona, ma malosi e aunoa ma le saofaga i lo tatou ausia o lena sini?

Tau lava o le faia o le mea sili e te mafaia i aso taitasi. Fai mea autu ma, ae e te lei iloaina, o le a faatumuina lou olaga i le malamalama faaleagaga lea o le a faamautuina atu ia te oe e alofa lou Tama Faalelagi ia te oe. Afai e iloa e se tagata lenei mea, o le a tumu le olaga i faamoemoega ma [ona] uiga, ma faigofie ai ona faatumauina le paleni.”