O Le Misiona Faavavega a le Perofeta o Iosefa Samita

Ua tatou iloa uma lava o Iosefa Samita o le uluai perofeta o lenei tisipenisione, o le tufugaaao i le Toefuataiga a le Alii. Ae o le a le mea na toefuatai mai e le Alii e ala i lenei perofeta? E le o tagata uma o le Au Paia o Aso e Gata Ai (ma ni nai tagata le lolotu) ua silafiaina le malamalama le tele o faaopoopoga sa musuia ai e le Alii le Perofeta o Iosefa e fai i aoaoga faavae faaKerisiano. O se lisi puupuu lenei:

• O le natura o le Tama, le Alo, ma le Agaga Paia.

• O galuega faatatau a nei sui e toatolu o le Aigaatua ma lo Latou sootaga i tagata soifua.

• O le natura o le Pau o le tagata.

• O le faamoemoega o le olaga faitino i le faalauteleina o le fuafuaga a le Tama mo Ana fanau ia maua lo latou faasinomaga e faavavau.

• O le matafaioi o le Togiola a Iesu Keriso, i le faamautinoaina o le tino ola pea ma le tuuina mai o le avanoa mo le ola e faavavau.

• O le matafaioi a faaipoipoga faalelalolagi ma faavavau i le fuafuaga a le Tama.

• O matafaioi taua o le perisitua ma sauniga i le fuafuaga a le Tama.

• O le matafaioi o malumalu ma sauniga sui i le fuafuaga a le Tama.

• O le malamalama e faapea, e finagalo le Atua ia faasaoina uma Ana fanau ma o tagata uma lava sa soifua i luga o lenei lalolagi—pe sa iloaina Iesu Keriso i na taimi pe leai—e mafai ona maua le lagi aupito maualuga pe a mavae lenei olaga.

• O faia o punavai tafatolu o le upumoni e uiga i le tagata ma le atulaulau: saienisi, o tusitusiga paia, ma faaaliga faifai pea.

Ata

images of the plan of salvation

Tuua o Etena, Faaola, ma le I Le Va o le Lagi ma le Lalolagi, saunia e Annie Henrie Nader

O soo se tasi e suesueina e oo lava i se vaega itiiti o lenei lisi—po o se tagata talitonu pe le talitonu—e ao ona faailoa mai o Iosefa Samita e tu i le mataivai o se auvai tele o manatu faalelotu lotoa ma fou ma faapelepele. A o tatou faitau i le Tala’i La’u Talalelei, o le atoatoaga o le talalelei sa toefuatai mai i le lalolagi e ala mai ia Iosefa Samita.³

Atonu na e maitauina sa le’i ta’ua faapitoa atu i la’u lisi le aumaia e Iosefa o le Tusi a Mamona, o se lomiga fou o tusitusiga paia, ioe, ua faapea ona avea ma punavai o le tele o na manatu faalelotu fou. O lena tusi e alagatatau ona ta’ua faapitoa. O lona igoa ua tautino mai ai lana galuega aupito sili ona taua: “O Se Tasi Molimau ia Iesu Keriso.” Ae peitai o tua atu o lena mataifaioi taua, e tele isi mea o i ai. O se faamatalaga lenei a se tagata tusitala atamai e uiga i le tusi:

“Ua tuuina mai e le Tusi a Mamona se faamoemoe fou mo Amerika: o le avea ma se malo o le amiotonu nai lo o se malo o le saolotoga. E ese mai i le faateleina o le oa ma le letutusa, o le Tusi a Mamona e taulagolago i le faamoemoe o e matitiva. … E ese mai i faigamalo faaripaperika, e na te tuuina atu tulafono amiotonu e ala i faamasino ma tupu i lalo o le tulafono a le Atua. E ese mai i se Tusi Paia ua atoatoa ma tapuaiga e le ofoofogia, o le Tusi a Mamona e tu mo faaaliga faifaipea, vavega, ma faaaliga i malo uma. E ese mai i le masalosalo, na te faalauiloa atu talitonuga; e tetee atu i le lotonuu faasausili, o se Isaraelu o le atulaulau. Na te muaivaaia mala mo le atunuu pe afai e sili atu le fiafia i oa, tetee i faaaliga, ma tagata ma agaifanua o Nuuese i lo o le amiotonu, faaaliga, ma Isaraelu.”⁴

E sili atu le taua o le mea na saunoa lata mai nei ai ia Peresitene Nelson e uiga i le Tusi a Mamona: o “le meafaigaluega o le a ausiaina ai le folafolaga o le faapotopotoga o Isaraelu.”⁵

A o tatou faitau i le Tala’i La’u Talalelei, na saunoa le Perofeta o Iosefa Samita e faapea, o le Tusi a Mamona o “le maaautu o le tatou tapuaiga.”⁶

O le toatele o tagata e le o ni Au Paia o Aso e Gata Ai, latou te le silafia le saofaga maoae a Iosefa Samita i manatu faalelotu. I se suesuega lauiloa i le atunuu atoa, sa maua ai e le faatautai palota o Gary Lawrence e faapea, e toeitiiti o le afa o tagata sa ia suesueina e manatu o le Au Paia o Aso e Gata Ai e motuese ma faalilolilo ma i ai ni “talitonuga e matuai ese lava.”⁷ Ina ua ia fesili atu i tagata na faatalanoa, “O le a le talitonuga autu o le Mamona?” e na’o le tasi mai le toafitu e mafai ona faamatala mai se mea e taulalata i le manatu o le toefuataiga po o le toefaatuina o le uluai faatuatuaga Kerisiano. E talitutusa foi, ina ua fesiligia e se isi suesuega faalemalo ia tagata na tali mai e faamatala o latou lagona e uiga i le tatou tapuaiga, e leai se tagata e toatasi na fautuaina mai le manatu e uiga i le faaKerisiano na uluai i ai po o le toefuataiga.⁸

O nei taunuuga e faamanatu mai ai ia i tatou, e le tatau ona tatou tuu atu a tatou faifeautalai e taumateina le tele o le malamalama e uiga i la tatou faatuatuaga. Atonu na faalogo i latou o loo latou aoaoina i le upu Mamona, ae e le tatau i faifeautalai ona taumate e faapea, o le toatele ua i ai e oo lava i le malamalama aupito anamua o mataupu faavae faigofie o la tatou faatuatuaga.

O nisi nei o o’u lava manatu e uiga i le soifuaga maoae o Iosefa Samita.⁹ O le Iosefa Samita na ou feiloai i ai i a’u suesuega patino, e matele lava i Ilinoi, ISA, o se tagata o le tuaoi—talavou, lagona loloto, aumalosi, ma alofagia tele ma faigofie ona talanoa atu i ai ona tagata, o lea sa masani ai ona latou valaauina o ia ia “Uso Iosefa.” O le faatusatusaina o lona talavou sa faaululolo’u i lana galuega faaperofeta. Sa 14 ona tausaga i le taimi o le Uluai Faaaliga, 21 i le taimi sa ia maua ai papatusi auro, ma sa na’o le 23 i le taimi na uma ai ona ia faaliliuina le Tusi a Mamona (e le sili atu ma le 60 aso faigaluega).

E sili atu ma le afa o faaaliga o loo i totonu o la tatou Mataupu Faavae ma Feagaiga na tuuina mai e ala i lenei perofeta ina o 25 ona tausaga po o le laitiiti ifo foi. Sa 26 o ona tausaga i le taimi na faatulagaina ai le uluai Au Peresitene Sili, ae na sili teisi atu ma le 33 i le taimi sa faasaoina ai mai le faafalepuipuina i Misiuri ma toe faaauau ai le taitaiga o le Au Paia. Sa na’o le 38 ma le afa ona tausaga i le taimi na tagatavaleina ai o ia.

I le taimi puupuu o lona soifuaga, sa sili atu faigata faaletino na oo ia Iosefa Samita. Po o se mea o le fitu o ona tausaga, sa tigaina ai o ia i se taotoga matuitui le tiga i lona vae. Ona o le mativa o lona aiga, sa itiiti ai ni ana aoaoga aloaia ma a o talavou sa faamalosia o ia e galue mo ni itula uumi e fesoasoani ai ia i ai meaai i luga o le laulau a le aiga. Sa sauaina faaletino o ia i le tele o taimi. I le taulotoaiga o le taumafai e faataunuu ia tiutetauave ogaoga o lona valaauga paia, sa tatau ona galue o ia o se faifaatoaga po o se faatauoloa e saunia ai mea e ola ai lona aiga. Sa ia faia lea mea e aunoa ma meaalofa ofoofogia faaleagaga ia na lagolagoina ai o ia i lona valaauga faaperofeta. Na fetalai atu le Alii ia te ia e faapea “e le maua le malosi i galuega faaletino, ona e le o lou valaauga lea” (Mataupu Faavae & Feagaiga 24:9).

I mataupu faaleagaga, sa leai ni tagata e faataitai i ai Iosefa Samita ina ia mafai ona ia aoao ai auala e avea ai ma se perofeta ma se taitai. Sa faapea ai ona ia faalagolago i luga o ana aumea na leai ni potomasani. Sa tauivi o ia faapea ma i latou ma sa aoao faatasi. Sa matuai vave ona maua e Iosefa lona malamalama ma le tulaga faatagata matua. Sa le fesiligia le i ai o ana meaalofa tulaga ese. E pei ona tatou tautatala ai i aso nei, o ia o se “tagata e vave lana pu’e [aoao].” Sa fai mai o ia, sa aoaoina o ia e avefeau faalelagi ma e ala i isi faaaliga mai le Atua, ma ou te talitonu ia te ia.

O se tasi o ana meaalofa patino sa faamaonia lava i le alofa ma le faatuatuaina e tagata maoae o e sa mulimuli ia te ia. Ina ua lu’i e Iosefa ia tagata sa mulimuli ia te ia e faatoilalo o latou le atoatoa faaletino, na te le’i tuu o ia ia sili a’e ia i latou, ma sa latou alofagia o ia mo lea mea. I se lauga sa talai atu e Iosefa i le sili teisi atu ma se masina ao le’i tagatavaleina o ia, sa ia tautino atu ai, “Ou te lei fai atu lava ia te outou ua ou atoatoa; ae e leai lava se mea sese i faaaliga ua ou aoao atu.”¹⁰ Sa i ai ia Iosefa Samita se “uiga masani o le fiafia” (Iosefa Samita—Talafaasolopito 1:28) lea sa pele ai o ia i le toetoe o tagata uma sa iloaina o ia. Sa faapea mai se tasi sa masani [ia te ia], “O le alofa lea sa i ai i le au paia mo ia, sa lemafaamatalaina.”¹¹ O le faapaaga a ana uo sa o se mea lea sa fiafia tele ai Iosefa, o le sa vaaia le atinaeina o tagata ma le lotoifale o ni faamoemoega tetele o le talalelei.

Ata

Painting of Joseph Smith

Iosefa Samita, saunia e William Whitaker

Sa ou ta’ua i se tasi o taimi: “O lona soifuaga atoa, sa soifua ai Iosefa Samita i le tuaoi, lea sa tatau ai i alii ona faatauva o latou malosiaga atoa e faasaga i le natura ma o nisi taimi e faasaga i le tasi ma le isi. O ia o se tagata tinotele, malosi, ma aumalosi faaletino. Sa fiafia o ia i taaloga faatauva, e aofia ai le toso laau—o se suega o le malosi faaletino (tagai i le History of the Church, 5:302). O loo i ai ia tatou mea o teuina le tele o mea e manatua ai a latou piiga ma ana uo ma e masani. I se tasi aso Sapati, sa talai atu ai i laua ma Polika Iaga i le Au Paia i Ramus, Ilinoi, e tusa ma le aso atoa e alu ai i le taavale mai Navu. I le Aso Gafua, a’o le’i tuua Ramus, sa faafetaui ai e Iosefa lona malosi i piiga e faasaga i se alii lea sa faamatalaina e se tasi o “le fia tama autu o Ramus’ (tagai Joseph Smith Journal, 13 March 1843, recorded by Willard Richards, Joseph Smith Collection, LDS Church Archives). Sa faapalasi o ia e Iosefa. Ou te fiafia ona o a tatou konafesi atofaina o loo i ai nei, e le tuuina atu ai i le au paia i le lotoifale le avanoa e tofotofo ai ia le au pulega asiasi i lenei faiga.”¹²

E toalaiti ni alii na avea ma taulaiga o sauaga e tele i a latou misiona po o mea latou te manatua nai lo o Iosefa Samita. Sa ou suesueina nisi o nei moliaga e ala i suesuega patino o uluai faamaumauga i Ilinoi, lea sa alala ai Iosefa i tausaga e lima mulimuli o lona soifuaga. O se tasi o moliaga faapena sa aliae i le taimi, na avea ai Iosefa Samita, ma pulenuu, ma sa taofia ai e le Fono a le Aai o Navu le Nauvoo Expositor, o se nusipepa o le itu tetee. O lenei taofiga sa taulai atu i osofaiga e faasaga i le Ekalesia ma fitoitonu atu i le tagatavaleina o Iosefa.

O tusitalafaasolopito o le Au Paia o Aso e Gata Ai anamua, e aofia ai Elder B. H. Roberts, na ioeina ai o lenei faatinoga sa le tusa ai ma le tulafono. Ae peitai, ao ou suesuea lenei mataupu a o avea ai ma se polofesa talavou o le tulafono, sa faateia a’u i le maua ai o faavae faaletulafono mo lenei faatinoga i le tulafono a Ilinoi o le 1844. Sa tele foi taofiga o nusipepa i le tuaoi o le periota a o lumanai le Taua o le Va o Tagatanuu. O le folafolaga o le saolotoga o le au faasalalau i le Faavae o le I.S. sa le’i tautinoina le faatatau i faatinoga a faigamalo a aai ma setete seia oo i le 1931, ma sa na’o le faalagolago o le fa i le lima a le Faamasinoga Maualuga a le I.S i le suiga o le faavae na faaaogaina i le 1868.¹³ E tatau i se tagata ona faamasino i amioga a Iosefa Samita e faavae i tulafono ma tulaga o ona aso, ae le o o tatou aso.

I le avea ai ma ni tagata aoga i le Iunivesite o Chicago, sa faaosofia ai i maua ma le tusitalafaasolopito o Marvin S. Hill i nai tamai mea moni sa iloa e faapea, e toalima ni alii sa faamasinoina i Ilinoi mo le tagatavaleina o Iosefa Samita. Mo le silia ma le 10 tausaga sa ma su’e faatapitoina ai faletusi ma mea na teu i le salafa o le atunuu e su’e ai tamai faamatalaga umi e uiga i lenei faamasinoga i le 1845 ma i latou sa aafia ai. O le ma tusi o loo iloiloina ai upu ma faatinoga a tagatanuu o Ilinoi o e sa silafiaina patino ia Iosefa Samita—o nisi o e sa alofaina o ia ma lamatia o latou ola mo ia, ae o isi o e sa feita ia te ia ma taupulepule e fasioti o ia. E leai se mea i mea sa ma mauaina i uluai faamaumauga o le faamasinoga po o, i molimau i le faamasinoga umi na faailoa ai se mea na faapea ona atagia ai le le faamaoni o le tagata sa tagatavaleina.¹⁴

O le mafai ona maua o faamaumauga o le faamasinoga o Ilinoi na taitai atu ai i se isi eria sa le’i tagofiaina muamua e uiga i suesuega ia Iosefa Samita. Sa ma maua ai ma Joseph I. Bentley, o le sa avea i lena taimi ma tagata aoga i le tulafono i Chicago, le tele o faamaumauga o gaoioiga faapisinisi a Iosefa Samita. Sa ma tusia faatasi i le 1976 le tusiga Brigham Young University Law Review e faatatau i lenei mataupu.¹⁵ O le vaitau o le 1840 sa sosoo ma se periota o le le mautonu ma le pau o mea tautupe i le atunuu atoa. O tulaga tau i le tamaoaiga i setete tuaoi e pei o Ilinoi sa matuai leaga faia lava. Mo se faataitaiga, o le au tusitala o le olaga o Aperaamo Linikone na faamatalaina lona matamuli i tulaga tautupe i le vaitaimi o lenei sefulu tausaga, ina ua le mautonu ia pisinisi, e tele ni tautinoga sa faaletonu, ma sa taatele foi ia moliaga faaletulafono.¹⁶

Sa tuuaia e fili o Iosefa Samita o ia i le taufaavalea i le feaveaiga o ni meatotino eseese, o le tele lava sa faia e fai ai ma sui o le Ekalesia. O se faagasologa o taualumaga o le faamasinoga lea sa toeitiiti atoa le sefulu tausaga o tosotoso na suesueina ai nei tuuaiga i ni auiliiliga toto’a. Mulimuli ane, i le 1852, ina ua leva ona mavae le malaga umi a le Au Paia mai Ilinoi, (sa faapea ona leai se mafuaaga faapolokiki na mafai ona mafaufauina po o se isi mafuaaga mo soo se tasi e fiafia i le Au Paia poo lo latou taitai), sa faaiuina ai e se faamasino feterale o lenei faatinoga faaletulafono faatasi ai ma se poloaiga na maua ai e leai se taufaavalea po o isi amioga le talafeagai na faia e Iosefa Samita.¹⁷

Sa tusia e le au atamamai na lava le silafia e uiga i faafitauli lautele i lenei periota, lenei tusiga e uiga i le faatosinaga a Iosefa Samita mo le avea ma peresiteneo le I.S.

“E ui atonu sa leai sona avanoa moni e manumalo ai i le palota faalemalo i le 1844, sa tauva o ia ma le atamai o se sui tauva o le vaega faaupufai lona tolu o le sa mautinoa lava le manatu moni e uiga i le faamalosiauina o suiga faaletulafono i le Iunaite Setete. Sa faamoemoe ma galue o ia e faaleleia manatu lautele e uiga i faafitauli aupito taua e aofia ai le faapologaina, saolotoga faalelotu, falepuipui, ma fanau o tagata lautele. O ia faapea ma Robert F. Kennedy o tagata e toalua o Amerika sa totoe e maliliufasia a o avea i laua ma sui tauva mo le tofi o le peresitene o le Iunaite Setete.”¹⁸

O le tagata o Iosefa Samita atonu sa sili atu le malamalama i ai o alii o e sa iloa lelei o ia ma tutu latalata ia te ia i tulaga faaleautaitai o le Ekalesia. Sa latou faamemelo ia te ia ma lagolagoina o ia o se perofeta. “O lona uso o Ailama na filifili e oti i ona tafatafa. O John Taylor, o le sa faatasi foi ma ia ina ua tagatavaleina, sa faapea mai: ‘Ou te molimau atu i luma o le Atua, agelu, ma tagata uma, o ia o se tagata lelei, mamalu ma mama …—ma o lona tagata mamalu ma aloaia sa sili atu mea na ia faia—ma sa ia ola ma oti o se tagata o le Atua’ (The Gospel Kingdom [1987], 355; tagai foi MF&F 135:3). Na faalauiloa mai e Polika Iaga faapea: ‘Ou te manatu e leai se tagata e soifua i le lalolagi e sili atu lona iloa o [Iosefa Samita] nai lo au; ma ou te fia faamamafaina atu e faapea, sei vagana ai lava Iesu Keriso, e leai se isi tagata na soifua pe o le a soifua mai i lenei lalolagi e pei o ia’ [“Remarks,” Deseret News, Aug. 27, 1862, 65].”¹⁹

E pei ona mautinoa mai i faataitaiga ua uma ona ou ta’ua, o le mea ua leva ona ou fiafia i ai i le talafaasolopito faaletulafono na aofia ai se fiafia faapitoa i fegalegaleaiga a Iosefa Samita ma mea tau tulafono a Amerika i ona aso. Na masani ona ta’ua e tusitalafaasolopito e faapea, o Iosefa Samita sa o se vaega i le le silia ma le pe a ma le 40 faatinoga faaletulafono. O le aso, faatasi ai ma le penefiti o le galuega e faia i The Joseph Smith Papers, ua tatou iloa ai o le fuainumera e sili atu i le 220. O nei faatinoga faaletulafono e eseese lava “mai mataupu faigofie o le aoina mai [o aitalafu] e oo i moliaga ogaoga e aofia ai manatu lavelave faaletulafono. … Sa faatumauina e Iosefa le anoanoai o loia e … aumaia ma puipuia faatinoga [faapena] … i mataupu faaletagatanuu ma faalesolitulafono.”²⁰

O le utuvai mai i le maoae o le tamaoaiga o le malamalama ua tatou maua e uiga i le soifuaga o le Perofeta, na tusia ai e le faitofa o le Au Paia o Aso e Gata Ai, o Jeffrey N. Walker e faapea: “E le teenaina, sa aafia moni, malosi, ma faifaipea ia Iosefa Samita i mea tau tulafono a Amerika. O le le amanaiaina o nei gaoioiga taua o le misia lea o le tele o auala sa ia faaaluina ai lona taimi ma le malosi, i le atamai ma le anoa—sa tele naua o lea sa tautino ai e Daniel H. Wells, o ia foi o se loia, faamasino, ma se faamasino sili, o le sa masani lelei ia Samita: ‘Ua ou iloa tamalii o le tulafono i lo’u olaga atoa. O Iosefa Samita o le loia silisili ona lelei ua ou iloaina i lo’u olaga’ [e pei ona sii mai ai i le The Journal of Jesse Nathaniel Smith: Six Decades in the Early West: Diaries and Papers of a Mormon Pioneer, 1834–1906 (1953), 456].”²¹

Sa aoteleina e ni tusitala e toatolu o le Au Paia o Aso e Gata Ai e faapenei: “Faatasi ai ma lona aafia malosi i mea tau i le tulafono, sa vave le aoaoina e Samita o tulafono o le taaloga ma faaaogaina faaletulafono na tulafono i lona manuia atoatoa faaletulafono, i le taumafai e faaaoga uma avanoa fou ma puipuiga sa maua e tulafono mu’amu’a a le malo. O ana filifiliga ma amioga faaletulafono na manino mai ai, sa malamalama lelei o ia e uiga i mataupu o le tulafono ma sa ia faia ni laasaga manino e faia ai faaaogaaga talafeagai uma na faatagaina e le tulafono, pe o lona mauaina mai o le puletaofia mo le Tusi a Mamona i lalo o le tulafono feterale, faataunuuina o faaipoipoga i lalo o le tulafono a Ohio, mamanuina o sauniga o le aai o Navu, talosagaina o puipuiga atoa o le saolotoga o mea tau lotu, faaaogaina ma le tatau o tulafono fou sa taitaiina ai le faatauina atu o fanua faalemalo, tautino atu [o le] aia tatau o le tulafono e le mafai ai ona taofia se tagata i le falepuipui seiiloga e tulai muamua i luma o se faamasinoga o le tulafono, poloaiina o se nofoaga talafeagai, po o le talosagaina o le aofai o le puipuiga i le inisiua i lalo o le tulafono fou faafeterale na faaaogaina mo se [pisinisi] e gau. I ona taimi avanoa, sa ia suesue ai i tusi o le tulafono. Na ia silafia lelei le faaupuina o le Faavae ma le gagana faapitoa o tulafono faalemalo. E le masalomia lava sa nofouta lelei o ia i le tele o atinaega fou faaletulafono i tulaga faalesetete ma faalemalo i lona soifuaga atoa.”²²

O le mea taua lava, sa faaopoopo mai e nei tusitala e toatolu le faamatalaga lenei: “I le avea ai o se tagata na molia, sa le’i faamaonia o ia i se soligatulafono. Soo se taimi lava sa faia ai se faamasinoga sa’o mo ia, sa faapea ona iloa ai o ia o se tagatanuu amiosa’o ma faamaoni.”²³

O aotelega auiliili e uiga i le moliaga o le Perofeta sa filifilia ma iloiloina i le tusi ua ou ta’ua, sa faalagolago i le galuega a le toatele o tagata aoga a le J. Reuben Clark Law School, o e sa avea ni kosi e faatatau i le mataupu ma sa faia le galuega auiliili sa faapea ona oo atu ai i le tusi na tusia e nei tusitala e toatolu. Sa ou fiafia i a latou faamatalaga o manatu faaalia o nei tagata aooga i le tulafono.

“O tagata aooga i le tulafono o e sa faaaogaina faamatalaga na faia muamua e uiga i lenei tusi na avea ma a latou tusi o anomea ua aufaatasi i le manatu e faapea, o Iosefa sa magafagafa, nafa, faamaoni, mataala, agaalofa, faaeteete, maelega, tausi i tulafono, onosai, mautinoa, mau punaoa, atamai, poto, o se faamasino lelei o amioga, ma e faapea foi ona atamai i mea tau i le tulafono (e faaaoga ai nisi o a latou lava upu), ae maise lava pe a oo i le puipuiga o aia tatau faalelotu ma faaletagatanuu a isi po o le faatinoina o tiute e faapea ona tuuina atu ia te ia. … Sa le’i aveesea lava le talitonu o Iosefa Samita i le Faavae ma taumafai ai e galue malosi i lalo o lona faamalu, e ui lava sa masani ona le fiafia, faanoanoa, ma mataituina tagata na galulue ai.”²⁴

Ata

Drawing of Joseph Smith

Iosefa Samita le Perofeta, saunia e Dan Weggelend, faaaloaloga a le Church History Museum

I lona soifuaga, e tele atu mea na ausia e Iosefa Samita nai lo o mea ua mafai ona ausia i se taimi puupuu lava e se tagata soifua. E na o le pau lava le faamatalaga e mafai ai o le fesoasoani faalelagi. Ou te fiafia i le aotelega lenei:

“Sa ia faaliliuina ma lolomiina le Tusi a Mamona i Niu Ioka; faatulagaina le Ekalesia i Niu Ioka, ona toenofoia ai lea i Ohio, Misuri ma Ilinoi; faato’aina aai, e aofia ai Katelani, Sisifo Mamao, ma Navu; valaauina ma aoaoina le fia selau o taitai o le ekalesia; suesue i le FaaEperu ma le Tusi Paia; faavaeina le Aualofa a Navu, faatautaia pisinisi, na’o ia ma faatasi ma paaga; atinae le faatauga o fale ma fausia malumalu; tusia ma lolomiina tusiga ma tusiga pupuu; sa i ai se aiga toatele ma talisapaia se lio tele o uo; ma sa auauna atu i ni tulaga faalemalo, e aofia ai le taitai au o se autau toatele o alii fitafita, faapea ma le pulenuu ma le faamasino sili mo le aai o Navu. Sa saunoa soo o ia i sauniga tapuai faalevaiaso, faapaiaga, faapea ma maliu ia sa le aunoa ona faia; sa ia faatosinaina mai le faitau sefulu o afe o e na mulimuli ia te ia, na faaosofia ai le anoano o tagata liliu mai e faimalaga mai i le Iunaite Setete.”²⁵

I se lauga i le konafesi aoao sa tuuina atu i le silia ma le 20 tausaga ua mavae, sa ou fai atu ai:

“E pei o isi Au Paia o Aso e Gata Ai faamaoni, ua ou atinaeina lo’u olaga i luga o le molimau ma le misiona a le Perofeta o Iosefa Samita. I a’u faitauga ma uluai suesuega, e le’i faapea lava ua faalotovaivaia au mai la’u molimau i lona valaauga faaperofeta ma e uiga i le toefuataiga o le talalelei ma le perisitua na amataina e le Alii e ala mai ia te ia. Ou te faamautuina atu ma le faamoani le molimau na fofogaina e Iosefa Samita i le tusi lauiloa a Wentworth i le 1842:

“‘… Ua faatuina le tulaga o le upumoni; e leai se lima eleelea e mafai ona taofia le galuega mai le alualu i luma; e ono tula’i mai sauaga, e ono tuufaatasia tagata faatupu faalavelave, e ono faapotopotoina vaegaau, e ono taufaasese tuua’iga, ae o le upumoni a le Atua o le a agai pea i luma ma le manino, mamalu, ma le tutoatasi, seia oo ina so’o uma ai konetineta, ma asiasi atu i atunuu uma, ma aofia ai ma lou mama, lagonaina e taliga uma, seia oo ina faataunuuina faamoemoega, o le Atua ma seia oo ina fetalai mai le Ieova Silisili ese, ua mae’a le galuega’ (Times and Seasons, 1 March 1842, 709; quoted in Daniel H. Ludlow, ed., Encyclopedia of Mormonism, 5 vols. [1992], 4:1754).”²⁶

Ata

Missionaries in Indonesia

Uso e, ma tuafafine, ou te molimau atu ia Iesu Keriso, lo tatou Faaola, o le sa faaali mai ma le Atua le Tama i le perofeta taulealea ma o le sa fetalai mai i ai le Tama: “O Lo’u Atalii Pele lenei Faalogo ia te Ia!” (Iosefa Samita—Talafaasolopito 1:17). Ua tatou faalogo i lo tatou Alii o Iesu Keriso i faaaliga talu mai lena taimi. O Lana Ekalesia lenei. Ua tatou umia le pule o Lana perisitua paia. Tatou te agai i luma i Lona faamoemoega. Ou te molimau atu i le valaauga o le Perofeta o Iosefa Samita ma le valaauga o perofeta o e na sosoo atu ia te ia i lenei galuega tele lea ua faapea ona tatou auai ai.