Maria, le Tina o Iesu

O le mea e faanoanoa ai, e leai se mea o ta’u mai e le Feagaiga Fou ia i tatou e uiga i matua o Maria, lona soifua mai, po o soo se mea lava e uiga i lona olaga i Nasareta. Na faamatala e Luka ia Nasareta o se polis, lea e mafai ona faaliliuina a le o se aai po o se taulaga, ae e le o foliga mai o se nofoaga e taua. I fafo o le Feagaiga Fou, e le o ta’ua ai Nasareta i soo se anotusi lava seia oo i le faaiuga o le seneturi lona lua TA.

Tatou te iloa o Nasareta sa tu i luga o se maupuepue i Kalilaia pito i lalo e tilotilo ifo i le Vanu lafulemu o Jezreel, (65 maila (105 km) i matu o Ierusalema. Ua faailoa mai i suesuega o toega o mea anamua e faapea, o le seneturi muamua sa pei Nasareta o se nuu nai lo o se aai po o se taulaga foi, ma se faitauaofai faataitai o se mea o le 400–500.⁴ Faatasi ai ma ni nai vaega e ese ai, o le tele o le faitauaofai i Kalilaia atoa na tauivi e ola o ni tagata galulue ia ola, vaaiga o lafumanu, fagogota, ma galulue i le eleele ia tau lava ia i ai ni meaai i luga o laulau mo o latou aiga ma ia totogi a latou lafoga. Sa leai ni papuipui o le nuu; sa leai se faamaoniga e faapea sa i ai ni auala tanu po o ni faletetele iloga, pe sa faapea foi na faaaogaina ni aitema taugata e pei o maamora, ata e fai i maa ninii, po o atavali i luga o sima po o faaalo o fale, pe faapea foi sa i ai i fale ni oloa na aumai i atunuu mamao.⁵ O fale e lua o le seneturi muamua sa eliina a’e e foliga mai o ni fale fogafalelua tauagafau e lua potumoe, o se taualuga atolau, ma se laufanua itiiti.⁶ O le faiga o tanuga ma nisi o fasimea o kate papaamu ua faaailoa ai o i latou sa nofoia o sa Iuta ae le o Nuuese.

E ui e leai se tasi o nei mea na maua e mafai ona fesootai tonu ia Maria po o lona aiga, ae latou te aumaia ia i tatou se vaaiga o le ituaiga olaga atonu na i ai lona olaga i Nasareta: o se teine faatauvaa na ola i se nuu maotua, e mamao mai le totonugalemu faalelotu o Ierusalema ma lona malumalu, mamalu maualuga faafaifeau, ma oa. E ui lava o se teine talavou, atonu sa galue i tafatafa o lona tina ma isi tamaitai o le nuu, lalagaina o ie, kuka, aoina mai o alala, asuina mai o vai mai tanevai a le aiga po o vaieli a le nuu, ma galue i le fanua—o ia mea uma e fesoasoani ai i lona aiga ia ola ai i lea aso ma lea aso.

O le tala ia Maria o loo i le tusi a Luka e amataina i le faaali mai o le agelu o Kaperielu, le agelu lava lea na faaali i se taimi na muamua atu ia Sakaria i totonu o le malumalu (tagai Luka 1:11, 19, 26). Ina ua faaali mai Kaperielu, o Maria o se tamaitai talavou o le sa faamau o le a faaipoipo ia Iosefa (tagai Luka 1:27). E ui ina tatou te le iloa pe sa fia tausaga o Maria i le taimi lea, i aso anamua sa mafai ona fuafuaina ni tusiga mo le faaipoipoga mai lava i le taimi ao le’i oo ina usugamatua. O le faaali mai ma folafolaga a Kaperielu e faapea o Maria ua “alofaina,” ma “ua ia te oe le Alii,” ma “amuia [o ia] i fafine,” ma e tusa ai ma le Faaliliuga a Iosefa Samita o le Luka 1:28, sa “filifilia” o ia (tagai foi Alema 7:10) atonu na faaosofia ai ni lagona eseese o le fenumiai faapea ma le fefe ia Maria. E mafai ona tatou vaaifaalemafaufau po o a ni manatu atonu na fetuleni ane i lona mafaufau i lena taimi, ae atonu na aofia ai ni fesili e pei o le, “Aisea ua manatu ai le Atua e ‘amuia [a’u] i fafine?” “Aisea ua ‘alofaina [ai a’u] e le Alii’ ae o le a foi le uiga o lea mea?” “Aisea na auina mai ai e le Atua ia Kaperielu ia te a’u ae le o se isi o tamaitai talavou i Nasareta po o Ierusalema?” Ioe, o ia e mai i le aiga o Tavita (tagai Luka 1:32; Roma 1:3), ae e itiiti se uiga o lena mea i lalo o le nofoaiga a le fitafita a Roma. Ma le isi, o ia sa na’o se tamaitai talavou mai se aiga faatauvaa, na nonofo i se nuu faaletaua. E pei ona fesili mulimuli ane ai Natanielu, “E mafai ea ona tupu o se mea lelei mai Nasareta?” (Ioane 1:46).

E le o talia e Kaperielu soo se fesili ia atonu na faatumulia ai le mafaufau ma le loto o Maria. Nai lo o lena, sa faaauau atu lana savali: o le a to o ia, ae ua le na o soo se tamaitiiti lava. O lana tama o le a ta’ua o le “Alo o le Silisili Ese” ma o le a mauaina “le nofoaiga a lona tama o Tavita” (tagai Luka 1:32–33). I se isi faaupuga, sa ta’u atu e Kaperielu ia Maria o lana tama o le a avea ma Alo o le Atua ma le Mesia na folafolaina. Afai sa fenumia’i ma fefe Maria ao lei faia mai lenei faasalalauga, e mafai ona tatou vaaifaalemafaufau i le faateteleina o lona fefe i le uma ai o lena faasalalauga.

Sei o tatou mafaufau i le mataupu faavae e tasi ua aoao mai e le vaega lenei o le tala ia Maria e uiga i le avea ma soo. O le fuafuaga a le Atua mo Maria sa le o se mea lea sa ia talosagaina! Sa faaali mai Kaperielu ia Sakaria ona sa tatalo i laua ma Elisapeta mo se tamaitiiti faavavega, ae na sau o ia ia Maria i lalo o ni tulaga e matuai ese lava: e le ina ia faataunuu ai se talosaga, ae ia ta’umalele mai le finagalo o le Atua mo ia. Faatasi ai ma lana faaipoipoga o loo loma, atonu sa manatu Maria e uiga i le pe mafai ona [ia] mauaina se fanau i le lumanai. Ae e ui ina sa i ai se malaga’i o le faamoemoe mo le mesia i le faaIutaia i le seneturi muamua, mata na mafaufau Maria o ia, o se tamaitai faatauvaa talavou mai Nasareta, o le a avea ma tina o le Mesia? Ailoga. O le auga e faapea, o valaauga o le avea ma soo e masani ona manaomia ai ni fetuunaiga i fuafuaga o o tatou olaga faaletagata lava ia.

Sa taulai atu e Luka ana faamaumauga i tautinoga e uiga ia Kaperielu ona sosoo ai lea ma Elisapeta. Ae e tolu ni taimi ua faamatalatala manino e Maria ona manatu ma lagona.

Ata

Mary seeing the angel Gabriel

Folafolaga ia Maria, saunia e Joseph Brickey

O le muamua o lana fesili ia Kaperielu, “A faapefea le mea nei, auā ou te lei iloa se tane?” (Luka 1:34). E tusa ai ma tulaga [e pei ona i ai], o lana fesili o se fesili talafeagai. E faamanatu atu ai i le aufaitau le fesili a Sakaria, “Pe faapefea ona ou iloa le mea nei? [o lona uiga, e faapea o le a fanaua e Elisapeta se tama tane]” (fuaiupu 18). Ae e ui o lana fesili ua faailoa atu ai le masalosalo e uiga i le tali a Kaperielu i se tatalo na faia e ia lava o Sakaria i le Atua, o le fesili a Maria o loo sailia ai le faamaninoga e uiga i le finagalo taumalele a le Atua mo ia. O fesili e lemaalofia pe a luiina e valaaulia a le Atua ia soo e siitia le pa ma o ese mai i o latou nofoaga lagolelei, ae o fesili musuia e taitai atu ai i faaaliga.

O le tali a Kaperielu i le fesili a Maria na oo mai i ni vaega se tolu:

1. Muamua, sa ia ta’u atu ia Maria, “E afio ifo le Agaga Paia i luga ia te oe” (fuaiupu 35). O le Agaga Paia o le mana lea e faalauteleina ai ia soo i augatupulaga uma i o latou valaauga. Na aoao mai Peresitene Thomas S. Monson (1927–2018), “Manatua, o le galuega lenei e le o sau galuega na o oe po o sa’u galuega na o au.” “O le galuega lava a le Alii, ma pe a tatou i ai i le galuega a le Alii, ua agavaa i tatou mo le fesoasoani a le Alii. Ia manatua o le ua valaauina e le Alii, e faaagavaaina e le Alii.”⁷ Ona tuuina atu lea e Kaperielu ia Maria ia faamatalaga e fitoitonu i lona tulaga: “E faamalumalu ifo foi ia te oe, le mana o le Silisili Ese:⁸ o le mea lea e ta’ua ai le tama paia, o le Alo o le Atua” (fuaiupu 35).

2. Lona lua, ua ta’u atu e Kaperielu ia Maria e uiga ia Elisapeta, o se tasi o loo feagai ma se maitaga e talitutusa faavavega, e ui ina le tutusa (tagai i le fuaiupu 36). O le maitaga o Elisapeta o se faailoga ia Maria e le o tuua na’o ia, e tusa o loo i ai se isi tagata o loo i ai se iloa o le mea o loo tupu ia te ia.

3. Lona tolu, ua tautino mai e Kaperielu e aunoa ma se masalosalo, “Aua e leai lava se mea e tasi e le mafaia e le Atua” (fuaiupu 37). Sa faia e le Atua le mea faigata ina ua maitaga Elisapeta.⁹ O le tautinoga a Kaperielu o se faamanatu i augatupulaga uma e faapea, a tatou tali atu i valaaulia a le Atua, e mafai ona tutupu vavega.

O le tali lona lua na faaleoina e Maria i le tala ua faaalia ai, i lo’u mafaufau, le tautinoga ma le manatu o se soo: “Faauta o a’u nei o le auauna a le Alii; ia faia ia te au e tusa ma lau fetalaiga” (Luka 1:38). O le “auauna” e faailoa ai ua filifili Maria e talia le valaau na tuuina mai e le Atua ia te Ia. O le faamatalaga lenei o le tala lea a Maria o le mea o le a tautala ai lana Tama tane i Ketesemane, “aua le faia lo’u loto, a o lou finagalo” (Luka 22:42). E ui e foliga manino mai i le vaega lenei o lana malaga, e le mafai ona malamalama o ia i mea uma o le a manaomia mai ia te ia—sa valoia mulimuli atu e Simona ia te ia e faapea “e tu’ia foi lou lava loto ia ati i le pelu” (Luka 2:35)—ae ui i lea, sa filifili lava Maria e agai i luma ma le faatuatua.

“Ona aluese ai lea o le agelu ia te ia” (Luka 1:38). Ina ua aluese Kaperielu, sa tuua loa na’o Maria. E ui o le faia e se soo o ni tautinoga e pei o ia faia a o i ai se avefeau faalelagi, o le a se mea na te faia nei aua o lea ua alu le agelu? E faapefea ona ia faamatala atu lenei aafiaga i ona matua? ia Iosefa? O le a le tau patino ia te ia pe afai e le talitonu i latou po o tagata o loo nonofo i Nasareta ia te ia? O pumoomoo o lona olaga i Nasareta o le a faapea nei ona faigata mo ia.

Ata

Elisabeth greeting Mary

The Meeting of Mary and Elizabeth, SAUNIA E Carl Heinrich Bloch

O lea na ia toe manatuaina ai le vaega lona lua o le tali a Kaperielu i lana fesili ma alu atu loa i le fale o Elisapeta. O lenei foi la, ua toe milo faatasi ai ia tala amata e lua a Luka. O le taimi lava na faafeiloai ai e Maria ia Elisapeta, “Ona osooso ai lea o le tama i lona manava, ua faatumuina foi Elisapeta i le Agaga Paia: Ua alaga ia, ua leotele, ua faapea mai, Amuia oe i fafine, amuia foi lē a fanau mai ia te oe” (Luka 1:41–42). O lana viiviiga na taitaiina e le Agaga na faamautuina ai le mea na uma ona tautino atu e Kaperielu e uiga i le amuia o Maria i fafine uma. O lenei ua maua e Maria se molimau vaaitino lona lua i lona valaauga, ae na oo mai ina ua uma ona ia talia ma le fiafia le valaauga.

O le tala ia Maria ma Elisapeta o se faamanatu o ni vaega tetele se lua i olaga o soo i onaponei. O se faamanatu o le taua maoae faafaailoga i le fatu o Aualofa i le lalolagi atoa: o tamaitai o tausaga eseese ma i vaega eseese o le olaga e o mai faatasi e lagolago ma sapasapai le tasi ma le isi i taimi o puapuaga. O se faamanatu foi e le tuulafoaia e le Atua i latou ua Ia valaauina i o latou taimi o puapuaga ae e masani ona Ia tali mai e ala i le siomiaina o i latou i aao o isi o e ua Ia valaauina foi.

O le lagona faaalia mulimuli o Maria ua lauiloa o le Viiga ma o lona faailoaga o le olioli e tali atu ai i tautinoga a Elisapeta. Ua ia faaalia ona lagona e uiga i le mea ua faaalia i lona olaga ma e atagia ai lona malamalama fou ua maua e uiga i lona tulaga i le fuafuaga a le Atua. O le mea muamua lava ma le sili, ua ia lagona e faalautele, avatu le viiga i le, ma faamamaluina lona Atua, o lea ua ia olioli ai o lona Faaola (tagai Luka 1:46–47). Ua ia vaaia i lona aafiaga le alofa mutimutivale faifaipea o le Atua, i le mea moni e faapea, ua Ia filifilia se tasi e “faamaulaloina” e pei o ia (tagai fuaiupu 48–50) ma faapea foi i le mea moni e faapea, ua Ia filifilia o ia e faatinoina se matafaioi tutotonu i le faataunuuina o le feagaiga faaAperaamo (tagai fuaiupu 54–55).

“Ua nofo Maria ma [Elisapeta] pe tolu masina, ona foi ai lea o ia i lona aiga” (fuaiupu 56). O lenei la ua saunia lelei atu Maria e faataunuu lona valaauga paia.

Ata

Mary holding baby Jesus

In the Arms of Mary, SAUNIA E Simon Dewey

Ua aveesea mai soo i onaponei mai le tala ia Maria e ala i le aganuu ma le 2,000 o tausaga. Ae ui i lea, o lana tala o se faamanatu tumau o tau o le avea ma soo. Ua faamoemoe mai le Atua i Ona soo e tulai atu i valaaulia na Te tuuina mai ia i latou. Ua faamanatu mai e Peresitene Russell M. Nelson ia i tatou e faapea, “Na fetalai mai le Atua i taimi uma i Ana fanau o le feagaiga e fai ni mea faigata.”¹⁰ Sa leai se alofaga o Maria, ma e faapena foi ia i tatou. O le tatou lu’i o le, ia i ai le faatuatua e gauai atu ai o tatou loto i Lona [finagalo], ia talia Ana valaauga ma le faatuatua faapea o le a faalautele e Lona Agaga i tatou i Lana galuega. Ua faamanatu mai foi e Bonnie H. Cordon, le Peresitene Aoao o Tamaitai Talavou, ia i tatou e faapea, “e mafai ona tatou faia mea faigata,” ma faaopoopo mai, “ae e mafai foi ona tatou faia ma le olioli.”¹¹

I le avea ai ma soo i onaponei, o le a la tatou Viiga o le a i ai? O le a faapefea ona tatou faaalia lo tatou olioli i lo tatou Atua? O le a faapefea ona tatou faaalia le matagofie o Lona alofa mutimutivale i o tatou olaga? O le a faapefea ona tatou maua auala e patipatia ai la tatou vaega i le faataunuuina o le feagaiga faaAperaamo i o tatou aso? Atonu o loo i ai lava ni auala e mafai ona tatou aoao mai ai i le tala matagofie a Maria i le avea ma soo.