Laauiti o le Molimau
O le a ea le uiga o le i ai o se molimau?
Sa savali atu Elisa i totonu o le Peraimeri ma nofo i talaane o lana uo o Amato.
“Talofa!” Sa fai mai ai Sister Russo. “Tatou amata i se pese.”
Sa pese Elisa faatasi ma lana vasega. “[Faatuatua] A toto pei se laau: O le a tupu pea” (Tusipese a Tamaiti, 50).
Sa tufa mai e Sister Russo ia pepa ma vali. “Mafaufau i le pese na tatou usuina,” sa ia fai mai ai. “A e totoa lau fatu o le faatuatua, e tupu ae e avea o se molimau. Ia tusi laia foliga o le a i ai lau molimau pe ana faapea o se laauiti.”
Sa sioa Elisa i lana pepa e leai se mea o i ai. Sa amata tusi ata a isi tagata uma. Sa faasepasepa atu Elisa i le ata a Amato. O lana laauiti sa i ai se au sasa’o ma le tele o laulaau. Sa foliga mai o le pasili [basil] o loo ola i le faataumata o le latou falemautotogi. Atonu e faapena foi foliga o lana molimau! Sa ia uumauina le vali ma tusi se laauiti na pei o le laau a [Amato].
“Faamolemole susue a outou tusitusiga paia i le Alema 32,” sa fai mai ai Sister Russo.
Sa latou faitau e uiga i le totoina o se fatu i lou loto ma lagonaina lona ola ae. Sa tilotilo Elisa i le laauiti o lana molimau.. Pe sa i ai sana molimau? Ae o le a foi le uiga o lena mea? Sa ia manao e fesili ae sa matamuli tele.
Ina ua uma le vasega, sa alu atu Sister Russo ia Elisa.
“E foliga mai e i ai se mea o faalavelave ia te oe. E i ai se mea o faaletonu?” Sa fesili atu ai Sister Russo.
Sa toe tilotilo ifo Elisa i lana ata. “Ou te le mautinoa e i ai sa’u molimau. Ou te le iloa lelei po o le a le uiga o lena mea.”
Sa ataata agalelei atu Sister Russo ia Elisa. “E le afaina. E te manatua le mea e ta’u o le faatuatua?”
Sa luelue le ulu o Elisa. “O le talitonu i se mea e le mafai ona tatou vaaia?”
“E sa’o lelei!” Sa fai mai ai Sister Russo. “O a ni mea e te talitonu i ai?”
Sa faigofie le fesili lena. “Ou te talitonu i le Tama Faalelagi ma Iesu Keriso. Ou te iloa e alolofa ia te a’u.”
Na ataata Sister Russo. “O lena na e faasoaina mai lau molimau! O se molimau o se mea ua e talitonu i ai e uiga i le talalelei.”
Sa mafaufau i ai Elisa. “O lea ua i ai a la la’u molimau?”
“Ioe!” Sa uu i luga e Sister Russo ana tusitusiga paia. “Ma manatua le mea sa tatou faitauina ananei? E te fafagaina le fatu e ala i le faia o mea e pei o le sau i le lotu. Ona tupu malosi ai lea o lau molimau.”
Sa lagona e Elisa le pei ua ia malamalama. “O le mea lena sa tatou tusia ai a tatou molimau o ni laauiti?”
“Sa’o lelei lava. Aua o laauiti e tutupu a’e laiti,” sa fai mai ai Sister Russo. “E faapena uma lava molimau. E le masani ona o mai uma i le taimi e tasi. E tupu ae o sina mea itiiti i le taimi.
Sa lagona e Elisa le fiafia e uiga i le laauiti sa ia tusia. Ina ua oo atu o ia i le fale, sa ia tusia “O La’u Molimau” i talaane o lana ata. Sa ia tautaua i luga i talaane o lona moega. Sa ia iloaina ua amata ona tupu lana molimau. Ma sa manao e mulimuli pea ia Iesu ina ia mafai ona tupu tele atu!