ʻE Lava Nai Ke u Ongoʻi ʻa e Laumālié ʻi Hoku Fale Taʻe-māú?

Naʻá ku toʻo ha laulau meʻakai, ne teuteu ʻe heʻeku faʻē ʻi he fonó, ki loto ki ha ʻapi ne felefele mo efua. Ne tangutu pē ʻa e tokotaha ʻaʻana e ʻapí he feituʻu naʻe faʻa tangutu aí ʻi ha fuʻu sea mālōlōʻanga lelei ne fokotuʻu ʻi ha feituʻu ke ne lava ʻo sio ki tuʻa ʻi he matapā sioʻatá. Ne fakaloloa ato hono ongo vaʻe kuo ākefuá ʻi muʻa ʻiate ia mo hono tokotokó, ʻa ia naʻá ne ngāueʻaki ʻi ha fāinga lahi hono nimá. Naʻá ne malimali ʻi heʻene sio mai kiate aú, ʻo fakamālō mai koeʻuhí ko e meʻakaí, pea ne toe kole fakamolemole mai mo ʻeke pe ko hai au. ʻI heʻeku tangutu ʻi hono tafaʻakí mo fakafanongo ki heʻene ngaahi talanoá, naʻá ku ongoʻi māfana mo e nonga.

Hili ha taʻu ʻe tolu mei ai, naʻá ku tangutu ʻi he falikí mo ʻeku ongo kiʻi tamaikí, ʻou lulululu kinaua pea neu hiva ha kiʻi fasi lova ne kiʻi vavevave. Ne kiʻi mamaʻo atu homau peitó ʻaki ha ngaahi mita pea naʻe taʻe-maau pea mo e fanga kiʻi meʻavaʻingá ʻi he falikí. Ne fakafokifā ʻeku ongoʻi ha fakanonga mei he Laumālié naʻá ku ʻi he feituʻu pē naʻe fie maʻu ke u ʻi aí. Ne fakafonu ki hoku laumālie ongosiá ʻaki ʻa e ongoʻi māfana mo e nonga, mo fakaivia au.

ʻI ha toe taʻu ʻe ua mei ai, naʻá ku tokoto ʻi he mohengá. Ne fokotuʻunga e fō he falikí, pea fokotuʻu fehilihiliʻi ha ngaahi laʻi pepa ʻo taʻe-maau e funga tesi ki hoku tafaʻaki toʻohemá ʻi heʻeku fafanga ʻeku tama tangata ne toki fanauʻí, ʻa ia ko e tuʻo fā ia hono fafanga he pō ko iá. Naʻá ku amoamohi hono laumata lōloá, ne u ala hifo ki hono kiʻi foʻi ʻulu hamolemole moluú, pea naʻá ku fiefia he taimi ne kukuʻi ai ʻe ha fanga kiʻi louhiʻinima ʻa e leisi hoku soté. Naʻe fakafonu au ʻaki ha ongoʻi māfana mo e nonga ne ʻikai ai ke u tokanga ki heʻeku faʻa ʻā ʻi he tolu hengihengí.

ʻI he ongo taimi taki taha ko ʻení, ne ʻiate au ʻa e Laumālie Māʻoniʻoní, ʻo ne talamai kiate au naʻá ku ʻi he feituʻu totonu pea naʻá ku fai ʻa e meʻa totonú, pea ʻi he ongo taimi taki taha ko ʻení naʻá ku ʻi ha ʻapi taʻe-maau.

ʻOku ou kei manatuʻi pē ʻa ʻeku ongoʻi ʻohovale ʻi he ʻuluaki taimi naʻá ku ʻiloʻi ai ení —Ne u kamata fakafehuʻia ʻa e ngaahi meʻa ne u aʻusiá. Hili ko iá, ʻi heʻeku kei tupu haké naʻá ku fakakaukau ʻi he taimi kotoa pe ʻoku ʻikai nofoʻia ʻe he Laumālie Māʻoniʻoní ha ngaahi feituʻu taʻe-maʻa—ko ia aí naʻá ku fakakaukau ʻoku kau ki ai mo e ngaahi ʻapi ʻoku ʻulí. Pea ne meimei ʻalu fakataha maʻu pē ʻa ʻeku ngaahi fakakaukaú mo ha fakamoʻoni fakafolofola. ʻOku tau ako ʻi he 1 Nīfai 10:21 ʻoku ʻʻʻikai ha meʻa ʻoku taʻemaʻa ʻe nofo mo e ʻOtuá.ʼʼ Pea ʻoku fakahā mai ʻe he ʻEikí kiate kitautolu ʻi he Tokāteline mo e Ngaahi Fuakava 88:124 ke ʻʻtuku ʻa e nofo noá; [pea] tuku ʻa e taʻemaʻá.ʼʼ

Ko e meʻapangó he ko hono fakakātoá, naʻá ku maʻu hala ʻa e ʻuhinga loloto ʻo e ngaahi folofola ko ʻení—ʻa e mahuʻinga ke tauhi hotau ngaahi temipale fakafoʻituituí, ʻetau ngaahi fakakaukaú mo hotau ngaahi sinó, ke maʻa—kau tomuʻa fakakaukau pe ki he ʻuhinga fakatuʻasinó. Naʻá ku ako mei he ngaahi lēsoni ko ení, ʻa ia ko hoku mahuʻinga ʻi heʻeku hoko ko ha uaifi kei talavou mo ha faʻē kei siʻí ne fakatefito kotoa ia ʻi he founga ne tauhi ʻaki hoku falé, ke maʻa mo haohaoá—pea ko e ola ʻo e tui ko iá ne fakatupu fakaʻauha.

Naʻe lōmekina au ʻi he manavaheé he taimi kotoa pē ne ʻikai haohaoa ai e tuʻunga hoku ʻapí. Ne ʻikai ke u fakafanongo ki he ngaahi ueʻi mei he Laumālié koeʻuhí naʻá ku moʻua ʻi hono siofi hoku ʻapi nofoʻangá mo fakakaukau, ʻʻʻIkai, he ʻikai malava ke nofoʻia ʻe he Laumālié ʻa e feituʻú ni.ʼʼ

ʻOku ʻikai lava ke u manatuʻi e momeniti tonu ne u fakatokangaʻi ai ʻeku ongoʻi ʻa e Laumālié ʻi ha ʻapi ne mamaʻo hono tuʻunga maʻá mei he tuʻunga maʻa ʻo e temipalé. Ka ʻoku ou manatuʻi e taimi naʻá ku fakatokangaʻi ai naʻe afioʻi ʻe he ʻEikí, ʻi Hono ivi taʻe fakangatangata ʻo e ʻofa mamahí mo e ongoʻi ʻofá, ʻa ʻeku ngaahi feinga taʻe haohaoá, ʻo tali ia, pea kei ʻomai kiate au ʻa e takaua fakalaumālie naʻá ku fuʻu fie maʻú. ʻOku ʻikai ke Ne fie maʻu ke u haohaoa ʻi he taimí ni—ʻokú Ne fie maʻu pē ke u fai e lelei taha te u lavá.

ʻOku teʻeki ke hoko vave mai ia, ka ʻoku māmālie pē ʻeku taʻofi ʻa ʻeku feinga ke aʻusia ʻa e meʻa naʻe ʻuhinga ki ai ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa ia ko e ʻʻfie haohaoáʼʼ (vakai ki he “Ko Ia Ke Haohaoa ʻA Kimoutolu,” Ensign or Liahona, Nov. 2017, 42). Kuó u kamata fakaʻatā au ke u tui te u lava ʻo maʻu ʻa e Laumālie Māʻoniʻoní ʻiate au tatau ai pē pe ʻoku ʻikai ke u maʻu e ivi ke ʻā he pō kakato mo ha pēpē ʻoku fakahaunifo pea lava ʻo fai maʻu pē ʻa e foó. Ka ʻoku ou fakapapauʻi ʻoku ou foaki ʻa e lelei taha ʻoku ou lavá, peá u tali ʻa e ʻofa ʻoku ʻomai mei he Tamai Hēvaní. Kuo teʻeki ai ke u foʻi ʻi he feinga ke u hoko ko ha tauhi ʻapi leleí, ka ʻoku ou tali ʻio pē ki he ʻaloʻofa mo e ueʻi fakalaumālie ʻa e ʻEikí ʻa ia kuo fuoloa ʻEne feinga ke foaki maí. Koeʻuhí ko e taimi ʻoku ou tauhi ai au ke u maʻa fakalaumālie mo fai ʻa e meʻa ʻokú Ne folofola mai ke u faí, ʻoku nofoʻia ʻe he Laumālie Māʻoniʻoní ʻa hoku ʻapí ʻo tatau ai pē pe ʻoku maau pe taʻe-maau.