Ko e Fakamolemole ʻa e Kiʻi Poto Pilinisesí
Naʻe loto ʻa Katea ke nau fai ha tulama ka naʻe feinga ʻa Sōnia ke ne taki muʻa!
“Ko ia mou manavaʻofa, ʻo hangē foki ko e manavaʻofa ʻa hoʻomou Tamaí” (Luke 6:36).
Naʻe toʻo ʻe Katea ha fuʻu puha lahi ʻi heʻene hū atu ki tuʻa mei hono fale nofo totongí ki he laʻaá. Ko e faʻahitaʻu māfaná ia pea naʻe māfana ʻa e ʻeá ʻi Lūsia ʻi ha ngaahi māhina siʻi. Naʻá ne tuku hifo e puhá ʻi ha sea naʻe tatali ai hono kaungāmeʻa ko Toma mo Sōniá.
“Ko e ʻū meʻa kotoa ʻeni ʻoku tau fie maʻu ki heʻetau tulamá!” Ko Katea ange ia. Naʻá ne fakaava hake e puhá pea toʻo hake ha kalauni pelesitiki mo ha ʻū konga tupenu lanu vāleti, pulū mo e kulokula. ʻI heʻetau mohu foungá, ʻe lava ke ngaohi ʻaki ʻeni ha ʻū teunga fakaʻofoʻofa.
“Ko e hā e tulama ʻoku tau ʻaí?” Ko e fehuʻi ange ia ʻa Tomá.
Naʻe malimali ʻa Katea. “ʻOku totonu ke tau ʻai e Kiʻi Poto Pilinisesí’!” Ko e talanoa fananga ia naʻá ne saiʻia taha aí. Ne malimali pē ʻa Katea heʻene fakakaukau atu ki heʻene fakatātaaʻi ʻa Vasilisá.
Naʻe toʻo ʻe Sōnia e tupenu lanu puluú mei he puhá peá ne pulupulu ʻaki ia. Naʻá ne pehē, “Te u Vasilisa au!”
Naʻe talaange ʻe Katea, “ʻOleva angé. Ko au naʻá ku fakakaukau ki aí. ʻOku totonu leva ke u Vasilisa au.”
Naʻe talaange ʻe Sōnia, “ʻIo te ke ʻai ia ʻe koe.” Ka naʻá ne makiʻikiʻi. “ʻI he taimi naʻe hoko ai ko ha kiʻi potó!”
Naʻe fakafulofula ʻa Katea peá ne toʻo e tupenu lanu puluú meia Sōnia. “Ka ko ʻeku tulama ia ʻaʻaku!”
Naʻe teke vakavaka ʻa Sōnia. “ʻOku ʻikai ke fie vaʻinga ha taha mo koe kapau ʻokú ke fie pule. ʻOku lelei ange hoʻo fakatātaaʻi e kiʻi potó ʻi hoʻo pilinisesí.”
Ne ongoʻi ʻe Katea hangē ʻe tangí. Naʻá ne toʻo e puhá pea lele ki loto, ʻo kaka hake ʻi he sitepú ki he fale nofo totongi hono fāmilí. Naʻá ne haʻaki e matapaá.
“Ko e hā e meʻa ʻoku hokó?” Ko e fineʻeikí ange ia. Naʻe tangi ʻa Katea.
“ʻOku maumauʻi ʻe Sōnia e meʻa kotoa!” Naʻe fakamatala kotoa ʻe Katea ki he fineʻeikí e meʻa naʻe hokó. “Talamai ʻe ia ko ha kiʻi poto au!”
Naʻe talaange ʻe he Fineʻeikí, “ʻIau siʻi Kateisa.” Ko e Kateisá ko e hingoa fakatenetene ia ʻa e Fineʻeikí kia Kateá. “Kātaki. Naʻe ʻikai sai ʻene fai peheé.”
Ne fai mai ha tukituki he matapaá ʻi he taimi pē ko iá. Naʻe ʻalu e Fineʻeikí ke fakaava ia, ka naʻe lele ʻa Katea ki hono lokí. Naʻá ne fanongo ki ha talanoa, pea naʻe ui atu leva e Fineʻeikí. “Te ke fie talanoa kia Sōnia? ʻOku ʻi ai haʻane meʻa ke talaatu.”
“ʻIkai!” Ko e kaila atu ia ʻa Kateá.
Naʻá ne toe fanongo ki ha talanoa, pea fanongo atu leva ʻoku tāpuni e matapaá.
Naʻe talaange ʻe he Fineʻeikí, “ʻOku ou tui ʻoku ongoʻi fakatomala ʻa Sōnia.”
Naʻe pehē ange ʻe Katea, “ʻOku ʻikai ke u tokanga au ki ai.” Naʻá ne punou hifo ʻi hono piló.
Naʻe tuʻu e Fineʻeikí he matapaá ʻi ha kiʻi taimi siʻi. “ʻOkú ke ʻilo, taimi ʻe niʻihi ʻi heʻeku fuʻu ʻitá, ʻoku ʻikai ke u fie fakamolemoleʻi ʻe au e niʻihi kehé. ʻOku ou faʻa fie maʻu ʻe au he taimi ʻe niʻihi ke u kole ki he Tamai Hēvaní ke tokoni mai ke u loto fie fakamolemole.” Pea naʻá ne ʻalu leva.
Naʻe fuʻu ʻita ʻaupito ʻa Katea ke ne lava ʻo fakamolemole. Naʻe fakalotomamahiʻi ia ʻe Sōnia! Ka … naʻe ʻikai foki ke sai e ongoʻi ʻitá.
Naʻá ne māpuhoi pea tūʻulutui hono veʻe mohengá. Naʻe ʻiloʻi ʻe Katea naʻe finangalo e Tamai Hēvaní ke ne fakamolemoleʻi ʻa Sōnia. Ko e meʻa totonu ia ke faí. Kae mahalo naʻe finangalo e Tamai Hēvaní ke fakamolemole ʻa Kateá, koeʻuhí ʻe tokoni foki ia ke ne ongoʻi fiemālie ange.
Naʻá ne pehē, “ʻE Tamai Hēvani tokoni mai muʻa ke u fakamolemoleʻi ʻa Sōnia. ʻOku ʻikai ke u fie fakahoko moʻoni ia, ka ʻoku ʻikai foki te u loto ke u ʻita.”
Naʻá ne fakaʻosi ʻene lotú pea mihiʻi ʻene mānavá. Naʻe ongoʻi ʻe Katea ʻoku kamata ke kiʻi mole atu ʻene ʻitá. Te ne lava ʻo fai ʻeni. Te ne lava ʻo fakamolemole. Naʻá ne lue ki he fale nofo totongi ʻa Sōniá pea tukituki he matapaá.
Naʻe fakaava hake ia ʻe Sōnia peá ne lea ange ai pē. “Katea, fakamolemole heʻeku lea naʻe faí.”
Naʻe talaange ʻe Katea, “ʻOku ou fakamolemoleʻi koe. Pea fakamolemole heʻeku ʻave kotoa hoku teungá. Te ke lava foki ʻo fakatātaaʻi ʻa Vasilisa. Te ta lava pē ʻo taufetongi.”
Naʻe malimali ʻa Sōnia. “Ta ʻoku sai ia. Te tau ʻalu ʻo ʻahiʻahi he taimí ni? Te u ʻalu ʻo ui mai ʻa Toma!”
Naʻe malimali ange ʻa Katea. “Te u ʻalu ʻo ʻomi e teungá!”