Ko ha Kato Fō ʻo e ʻOfá
Tā fakatātaaʻi ʻe John Kachik
Naʻe faingataʻa ke tali ʻe hoku fāmilí ʻa ʻeku fili ko ia ke u hoko ko ha mēmipa ʻo e Siasí. ʻI heʻeku talaange te u ngāue fakafaifekau taimi kakato taʻetotongí, ne ʻikai mahino ki ha niʻihi e founga pe ko e ʻuhinga te u fie fai ai iá. Naʻe loto ʻeku mātuʻá ke na poupouʻi ʻeku loto vēkeveké, ka naʻe faingataʻa ke na vakai ki heʻeku “tukuange” e tui fakalotu naʻá na ohi hake au aí.
ʻI heʻeku maʻu ko ia hoku uiuiʻí ki he Misiona Honduras Tegucigalpa, ne fakakau mai ʻi he silá ha lisi vakaiʻi ʻo e ngaahi meʻa naʻe fie maʻu ke u ʻalu mo iá. Naʻe fakatokangaʻi ʻe heʻeku fineʻeikí ʻoku kau ʻi he lisí ha kato fō. Ko ha meʻa ia ne ʻikai mahino kiate ia! Naʻá ne fakatau fakavavevave ha ngaahi tangikalī mamafa lanu pulū peá ne ngaohi ʻi he ʻofa ha kato fō faingofua naʻe ngāue lelei. Ko ha meʻaʻofa ia ʻe tolonga hono mahuʻingá.
Ne u ʻalu mo e kato fō ko iá ki he senitā akoʻanga fakafaifekaú pea ki Honitula foki. Naʻá ku fononga mo ia mei he kolo ki he kolo, pea kamata māmālie ʻene liliu mei he lanu pulū malohí ki he pulū vaivai, ʻo tatau mo e taimi ʻoku hoko ai hato tangakalī ko e talausese ʻokú te saiʻia mo hao lelei taha ʻiate kitá. ʻI he fakaʻosinga ko ia ʻo ʻeku ngāue fakafaifekaú, naʻá ku foaki e lahi taha hoku valá ki ha fāmili makehe ne u ʻofa ai, ka naʻá ku tauhi pē ʻa e kato foó. Naʻe ngaohi ia ʻe heʻeku faʻeé maʻaku neongo ne ʻikai ke mahino kiate ia e mahuʻinga ʻo e ngāue fakafaifekaú.
ʻI ha meimei taʻu ʻe 30 mei ai, ne maʻu ai e uiuiʻi ʻa homa foha lahí ki he Misiona California Carlsbad fakataha mo ha lisi vakaiʻi ʻo e ngaahi meʻa te ne fie maʻú. Naʻa mau lau fakataha ia, pea ʻi he taimi naʻe aʻu ai ki he “kato foó,” naʻa mau toʻo mai e kato ko ia naʻe ngaohi ʻe heʻeku faʻeé maʻakú. Neongo ne ʻosi mole lahi hono lanú, ka naʻe kei ʻalu pē mo ia ki Kalefōnia.
Hili ha ngaahi taʻu siʻi, naʻe uiuiʻi hoku ʻofefiné ke ngāue ʻi he Misiona Ohio Cleveland, pea naʻá ne ʻalu mo e kato foó. ʻI heʻene foki maí, naʻe toe motuʻa ange ʻa e kató, ka naʻe teʻeki ai ke fuʻu maumau lahi.
ʻOku fakamanatu mai ʻe he kató ʻe lava ʻe he niʻihi ʻo e ngaahi meʻa hangē ko e ngaahi lēsoni naʻe ako mei he ngāue fakafaifekaú mo hono fakahaaʻi ko ia ʻetau ʻofá ki he niʻihi kehé—hangē ko ia naʻe fakahoko ʻe heʻeku faʻeé maʻakú—ʻo toutou tāpuekina kitautolu. Kuo hoko ia ko ha tukufakaholo fakafāmili ʻo e ngāue fakafaifekaú ʻoku ou ʻamanaki he ʻikai mōlia atu.