Ni’a noa i te rorouira : Feiā ’Āpī Pa’ari
Nāhea vau i te ha’api’ira’a e aha tē rave ’ia fa’a’ite mai te tahi ē tē tāfifi ra ’oia i te hōho’a faufau
Tē ora nei te ta’ata pāpa’i i Utaha, Marite.
’Ua ’ite a’ena vau e rave rahi ’āva’e ē tē vai rā te hō’ē ’ohipa, i terā noa rā taime tō tō’u hoa parau-vaha-ra’a mai iā’u i te parau mau : tē tāfifi nei ’oia i te hōho’a faufau e rave rahi matahiti, pāpū roa i te taime iho ā ’a mātau ai au iāna.
I roto i te pere’o’o, i te fa’aro’ora’a vau i tāna tātarahapara’a, ’ua māuruuru roa vau. ’Ia ta’a maita’i rā ’outou ē—’ua māuiui roa vau i te ’itera’a ē tē tāfifi nei ’oia e mea maoro i teienei e ’aita roa vau i ’ite noa a’e—’ua ’oa’oa rā vau i te reira taime ’ua noa’a iā’u ’ia pāhono ma te here ’eiaha rā ma te ha’avā.
E ’ere roa i te mea tano ’ia fa’a’ino atu
I te tahi taime e nehenehe te ’itera’a e mea ’ino te hōho’a faufau e taui i tō tātou hi’ora’a ia vetahi ’ē. ’Ua ’ite au ’ua tupu te reira nō’u i te hō’ē taime. I tō’u ’āpī-roa-ra’a, ’ua fa’aro’oro’o vau nō te mau ta’ata e tāfifi nei i te hōho’a faufau ’e tō’u huru i roto, ’o te riri ïa ’e ’oia ato’a te ha’afaufau. ’Āre’a rā, i te paraura’a mai tō’u hoa i tōna mau fifi, ’ua tāpae au i te hō’ē fāito maita’i a’e nō te tāmahanahana iāna, inaha ’ua pa’ari a’e au ’e ’ua ’ite au i tā’u iho mau hara ’e mau paruparu i te roara’a o te tau.
’Ua ’ite au i teienei ē e ’ere roa atu i te mea tano ’ia fa’a’ino atu. ’Ua ’imi Iesu Mesia, tō tātou hi’ora’a maita’i, i te mau ta’ata tei fa’a’inohia e vetahi ’ē. ’Ua paraparau ’oia i te mau ta’ata nō Samaria ’e te feiā hara. Nō te Mesia ’o tē ’ore e nehenehe « e hi’o noa atu i ni’a i te hara ma te fa’ati’a i te reira » ( Te Parau Ha’api’ira’a ’e te mau Parau Fafau 1:31), tē hi’o nei rā « ia tātou i roto i tō tātou huru ti’a ’ore, ma te ’ore e ’ōtohe i te ri’ari’a ’e te faufau ».1 Nō reira, i roto i teie ’āparaura’a hōhonu ’e tō’u hoa, ’ua tāmata vau i te feruri e aha tā Iesu e rave. ’Ua tauturu mai te ’ā’amu o te vahine tei ’itehia tē fa’aturi ra, e nāhea rā vau ’ia pāhono.
Pāhono ma te aroha
’Aita tō te mau pāpa’i parau ’e te mau pharisea e ora ra i te ture a Mose i rahi te aroha, i te tau tāvinira’a a Iesu. Tē vai ra te mau utu’a ta’a ’ē mau, pinepine e mea ’eta’eta, tei fa’ata’ahia nō te mau hara, ’e nō te fa’aturi e tītauhia te pēhira’a ’ōfa’i. I tō te vahine fa’aturi ’āfa’ira’ahia mai ia Iesu rā, ’aita ’oia i ha’afaufau—’ua fa’a’ite ra ’oia iāna i te aroha. ’Aita ’oia i ha’afa’ahiahia i te mau ta’ata pari nō te ’itera’a mai i te hō’ē ta’ata tē rave ra i te hara, ’aita, ’ua fa’aha’amana’o rā ’oia i te mau ta’ata pari i tā rātou iho mau hara (hi’o Ioane 8:3–7). Inaha ho’i, « ’ua rave pā’āto’a ho’i tātou i te hara, ’e ’ua ’ere i te ha’amaita’i a te Atua ra » (Roma 3:23) ’Aita te Mesia i fa’autu’a i te ta’ata hara ’e ’eiaha roa ato’a tātou e nā reira (hi’o Ioane 13:34–35).
I te haerera’a te mau ta’ata pari ma te manava ha’avā i tā rātou iho mau hara, ’ua paraparau te Mesia i terā vahine. E mea ’iti roa tāna parau, e mea hōhonu rā. ’Ua ani nā mua ’oia : « E teie vahine, tei hea te feiā i pari mai ia ’oe nei ? ’aore roa e ta’ata i fa’autu’a mai ia ’oe na ? » ’E i tō te vahine paraura’a ē ’ua haere rātou, ’ua parau noa ’oia iāna : « E’ita ato’a vau e fa’autu’a atu ia ’oe : ’a haere ’eiaha rā e hara fa’ahou » (Ioane 8:10–11).
E’ita roa te fa’autu’ara’a e tauturu i teie vahine ’ia taui, ’ua ’ite rā te Fa’aora ē e nehenehe te here e nā reira.
’A haere, ’eiaha rā e hara fa’ahou
Te here, ’o te ta’ahira’a mātāmua noa ïa nō te tauturu i te hō’ē ta’ata ’ia upo’oti’a i ni’a i te hōho’a faufau. E mea ta’a ’ē te rāve’a fa’aorara’a nō terā ’e terā ta’ata, tē vai nei rā te tahi mau ta’ahira’a mātāmua tītauhia nō te mau ta’ata ato’a e tāfifi ra i te reira. ’A fa’aitoito ia rātou ’ia fārerei atu i tō rātou ’episekōpo ; e mau rāve’a tauturu tāna ’e te mau mauiha’a tauturu. ’Ia nehenehe, tauturu ia rātou ’ia ’ite mai i te mau ha’amatara’a ’e ’ia fa’aoti i te hō’ē fa’anahora’a nō te tauturu ia rātou ’ia ’ape i te reira. Fa’aitoito ia rātou ’ia haere e hi’o i te hō’ē ta’ata ’aravihi ’aore rā ’ia ’āmui atu i te hō’ē pupu tauturu. ’E ’a tāmau noa i te here ia rātou ’e ’ia pāturu ia rātou i roto i te ta’ahira’a tāta’itahi.
’Ua fa’a’ite te Mesia i tōna here i te vahine ’e ’ua pāpū iāna ē ’ua ’ite te vahine ’aita ’oia e hina’aro ’ia tāmau noa te vahine i roto i tāna mau hara. Te aroha mau e ’ere i te tāu’a-’ore-ra’a i te mau hara a vetahi ’ē ; e fa’a’ite rā te reira ia tātou ’ia hi’o i tō rātou maita’i ma te fa’aitoito ia tātou ’ia tauturu ia rātou ’ia haere i mua.
E tere fa’aro’o
’Ua here a’ena vau i tō’u hoa, ’ua here hau atu rā vau iāna i muri a’e i tōna fa’a’itera’a mai iā’u i tāna ’ohipa huna. Noa atu ā te ’ohipa tā ’outou i rave ’aore rā tā te ta’ata tā ’outou i here i rave, « e’ita e nehenehe ia ’outou ’ia paremo hōhonu roa i te fāito e ’ore te māramarama mure ’ore o te tāra’ehara a te Mesia e tae’a ».2
Mai te mea ’ua ’ite ’outou i te hō’ē ta’ata e tāfifi ra ’e te hōho’a faufau, ’eiaha e fa’aru’e iāna. E toro atu i te rima ma te here ’e te aroha, mai tā te Fa’aora e nā reira. E ’ere i te mea ’ōhie noa ; e’ita teie mau fifi e mo’e atu i te hō’ē noa pō. ’Ia vai te fa’aoroma’i i tei herehia ’e ’ia ’outou iho. Tē ha’api’ira’a ’ia here ’e ’ia hāro’aro’a i te hō’ē ta’ata e fa’aruru nei i te hō’ē mea fifi mau, e ’ere ïa i te mea au roa ’e te ’ōhie. Tē ti’aturi nei rā vau e’ita tō tātou here ato’a e māu’a, noa atu ā te roara’a ’aore rā te hope’ara’a o te tere o tei herehia.