Te ’ōpuara’a e haere i te hiero
Nā te tuahine Joy D. Jones
Peresideni rahi nō te Paraimere
« ’Ia fa’afāriu… te ’ā’au o te tamari’i ’e tō rātou mau metua » (Te Parau Ha’api’ira’a ’e te mau Parau Fafau 2:2).
I te hō’ē sābati ’ua haere māua tō’u nā tauturu i te hō’ē purera’a a te ’Ēkālesia. ’Ua hōro’a mātou i te a’ora’a nō ni’a i te hiero ’e te mau mea ta’a ’ē e tupu i reira. I te otira’a te purera’a, ’ua haere mai te hō’ē tamāroa 12 matahiti ’o Colby tōna i’oa nō te aroha rima mai iā’u. ’Ua paraparau ri’i māua nō ni’a i te hiero. ’Ei reira ’ua tu’u atu vau iāna i te ’ōpuara’a e ’imi mai i te hō’ē i’oa ’utuāfare e ’āfa’i i te hiero.
Ma’a mahana noa i muri mai, tē fāri’i ra vau i te hō’ē rata nā Colby. Teie tāna i parau mai :
« ’Ua ho’i au i te fare ’e ’ua ’imi atu vau i te hō’ē i’oa ’āpī. ’E ’ua ’itehia mai iā’u tō’u tupuna tāne e pae u’i nā mua atu.
« I muri ri’i mai, ’ua haere au i te hiero nō te bāpetizo nōna. ’Ua riro te reira ’ei taime ta’a ’ē, inaha ’ua bāpetizo tō’u tua’ana iā’u ’e ’ua ha’amau tō’u pāpā iā’u nōna.
« ’Ua tae mai te tahi ahu i roto iā’u ’e te hau. Tē mana’o ra vau, te mea tā’u i rave nō tō’u tupuna tāne, e ’ohipa maita’i roa ïa inaha i teienei e ti’a iāna ’ia haere i te bāsileia tiretiera nō te ora ’e tōna ’utuāfare. E mana’o au maita’i tei vai i roto iā’u i terā mahana tā’āto’a.
« ’Ua ’ite-ato’a-hia mai iā’u ē, ’aita e ta’ata tei ’ite ’o vai nā metua o tō’u nā tupuna tāne nō te pae o te u’i, e nehenehe ïa tā’u e ’imi i tō rāua i’oa nō te ’āfa’i ato’a atu i te hiero ! »
’Auē ïa hi’ora’a fa’ahiahia mau ’o Colby ! Noa atu ā te fāito matahiti, e ti’a ia ’outou ’ia riro ’ei hi’ora’a nō tō ’outou ’utuāfare ’e te mau hoa. E ti’a ia ’outou ’ia fa’a’ite i te ’evanelia i te mau ta’ata ato’a tā ’outou i mātau—i tō ’outou ato’a mau tupuna !