E aha te mana’o o te ’Ēkālesia nō ni’a i te arutaimāreva ?

Te parau rahi nō te māramarama i tā tātou hi’ora’a i te arutaimāreva, ’o te ti’a’aura’a ïa. Te aura’a ra, e ’ere ïa nā te ta’ata te fenua ’e e nehenehe tāna e fa’a’ohipa i tō te reira faufa’a mai tāna e hina’aro, ’aita, e ti’a’aura’a tā tātou nō te huru e fa’a’ohipa tātou i tō te reira mau faufa’a (hi’o Te Parau Ha’api’ira’a ’e te mau Parau Fafau 104:13–15). Noa atu ā pa’i « ’ua nava’i ’e ’ua toe mai ho’i » (Te Parau Ha’api’ira’a ’e te mau Parau Fafau 104:17), ’ua hina’aro te Atua ’ia fa’a’ohipa tātou i te mau faufa’a o te fenua nei ma te pa’ari (hi’o Te Parau Ha’api’ira’a ’e te mau Parau Fafau 59:20).

’Ua hāmani te Atua i te fenua nei ’e ’ua parau ho’i i te reira ’ei « mea maita’i roa » (hi’o Genese 1:1, 31). ’Ua hāmanihia teie fenua ’ei vāhi nohora’a nō te mau tamari’i a te Atua ’ei tuha’a nō tāna fa’anahora’a nō te fa’aorara’a. E ha’amo’ahia teie fenua ’e e fāri’i ’oia i tōna hanahana tiretiera (hi’o Te Parau Ha’api’ira’a ’e te mau Parau Fafau 88:18–19).

’Ua hāmani te Atua i te fenua ’eiaha ’ei mea maita’i noa, ’ei mea nehenehe ato’a rā. Te mau mea o te fenua, « ’ua hāmanihia ïa nō te maita’i ’e te ravera’a a te ta’ata nei, nō te ha’amāuruuru i te mata ’e nō te fa’atupu i te ’oa’oa i roto i te ’ā’au », ’e tae noa atu nō te « fa’aitoito i te vārua » (Te Parau Ha’api’ira’a ’e te mau Parau Fafau 59:18–19).

E fa’ahanahana tātou i te Atua nā roto i te māuruurura’a i tāna mau hāmanira’a, ma te fa’a’itera’a i tō tātou māuruuru nō te reira ’e ma te tūtavara’a ’ia tāpe’a nehenehe noa i te reira. E fa’aherehere tātou i te mau faufa’a, e pāruru i te nātura ’e ’eiaha tātou e ha’avi’ivi’i ’e e ha’amau’a.