’Aita vau i hina’aro e hi’o ta’a ’ē !

Hōho’a

I Dont Want to Be Different

E tīa’i maoro noa ’o Mika i te mau ha’api’ira’a ’orira’a. E mea au nāna ’ia fa’aro’o i te pehe. E mea au nāna ’ia ha’api’ipi’i i te ’ōu’a a te pepe ’e ’ia rave ti’a i te reira. ’E e mea au ta’a ’ē nāna ’ia rave ’āmui rātou i te reira ’e te pupu ’āmui. ’Ia rave rātou i te reira, mai te huru ē, ’aita e ta’a-’ē-ra’a i roto i te mau ta’ata ’ori ato’a. Mai te huru atura e ’ere ’o ’oia ana’e tei ro’ohia i te ma’i toromotoma hau (trisomie).

I teie mahana tē ha’api’i ra rātou i te hō’ē tu’ura’a ’āvae ’āpī. ’Ua hi’o ’o Mika i tōna ’orometua ’ia ’ōu’a i ni’a. ’Ua hi’o ’oia i te tahi atu mau tamāhine i te tāmatara’a i te reira. Tē vai ra ’ua rave tano i te reira. Tē vai ra tei rave ma’a tāmatara’a. ’Ua tāmata ’o Mika, nā ni’a iho noa, ’aita rā i tano roa.

« E tauturu ānei ’oe iā’u, e te ’orometua ? », ’ua ui atu Mika.

’Ua hi’o mai te tamāhine i pīha’i iho ia Mika. Fāriu a’era i ni’a i tōna hoa. « E aha tāna e parau ra ? », tāna i muhumuhu. Hi’o a’era nā tamāhine i ni’a ia Mika.

I ni’a i te tere ho’ira’a, ’aita ’o Mika i paraparau a’e.

I te fare, tē oi ra māmā i te faraoa i roto i te piha tūtu. ’Ua haere roa ato’a te faraoa ota i ni’a i tōna papari’a. I te tahi taime e ’ata Mika i te reira. I teienei rā mahana, ’ua taora noa ’oia i tōnā pūtē i raro ma te fa’aō iāna i ni’a i te pārahira’a o te ’aira’amā’a.

« E aha te huru te ’ori ? », ’ua ui atu māmā.

« E mea ’ino roa », ’ua pāhono atu Mika. « ’Ua ani au i te tauturu, ’e ’ua parau te tahi tamāhine e mea ’ē tā’u paraparau. ’E ’ua hi’o ’ē mai ’oia iā’u. » Pi’o a’era te upo’o o Mika i raro. « ’Aita vau i hina’aro e haere fa’ahou i te ’ori. »

« ’Ē ’ē Mika ! », ’ua parau atu māmā. « E mea aroha roa. E mea au rā nā māua pāpā e hi’o ia ’oe ’ia ’ori. Tē ha’apeu nei māua i tō ’oe itoito nō te ha’api’i i te ’ori ! »

Tē ha’amata ra Mika i te ta’i. « ’Aita vau e au ra i terā ma’i toromotoma hau i roto iā’u. ’Aita vau e au ra i tō’u hōho’a mata ’ē. ’Āhani pa’i e ’ere i te mea pa’ari roa nō’u ’ia ’apo mai i te mau mea ’āpī. E mea ha’api’i ato’a vau ’ia paraparau ! »

Pārahi a’enei ’o pāpā i pīha’i iho ia Mika ma te tauahi iāna. « Mika, ’ua here roa māua ia ’oe. ’Ia māua nei, ’eiaha e taui i te hō’ē mea i roto ia ’oe. »

Tā’iri’iri noa te upo’o o Mika, te rima i ni’a i te mata. « ’Aita vau i hina’aro e hi’o ta’a ’ē. ’Ua hina’aro vau ’ia tātarahia teie ma’i toromotoma hau i roto iā’u.

Fa’aea noa a’era pāpā ’e māmā ma’a minuti.

« Teie tō’u mana’o », ’ua nā ’ō atu māmā. Pe’e a’era te mata o Mika nā ni’a i tōna rima. « ’E mai te mea e pure ’oe ’e e ani ’oe i te Metua i te Ao ra e aha tōna mana’o nō ni’a ia ’oe ?

’Ua feruri Mika i terā parau. E mea au nāna ’ia pure. ’Ua fāri’i marū noa mai ’oia ma tōna upo’o. « E ti’a ānei ia ’oe ’ia pāpa’i i te uira’a ’ia ha’amana’o vau e aha tē ani atu ? »

’Ua pāpa’i māmā i te uira’a. Rave ihora Mika i terā pāpie ’e haere a’era i roto i tōna piha nō te pure.

I te ho’ira’a mai ’oia i roto i te piha tūtu ma’a minuti i muri mai, ’ua ’ana’ana te hōho’a mata o Mika mai te hō’ē mōrī. « ’Ua pāhono mai te Metua i te Ao ra ! », tāna i parau.

« E aha tāna i parau ? », te uira’a a māmā.

« ’Ua nā ’ō mai ’oia ē : ‘Mika, ’ua here au ia ’oe mai te reira’ », tāna i pāhono. « ’E ’ua parau PŪAI mai ’oia i te reira ! »

I te hepetoma nō muri iho, ’aita ’o Mika i ha’ape’ape’a e aha tā te tahi atu mau tamāhine e parau nō ni’a i tōna ma’i toromotoma hau. ’Aita, ’ua ’ite mai rā ’oia i te tahi atu tamāhine, ’o Sara, e au ē, tē ’oto ra ’oia. Tē fifi ato’a ra ’o Sara nō te ha’api’i i te ’ori ’āpī.

I te ho’ira’a Mika i te fare, ’ua fa’aoti ’oia e pāpa’i i te hō’ē parau nō Sara. ’Ua pāpa’i ’oia e rave rahi hōho’a māfatu. ’Ua tauturu atu māmā iāna nō te pāpa’i.

« Sara iti ē, » tā Mika i pāpa’i. « E tamāhine ’ori fa’ahiahia ’oe. ’Ua hina’aro vau ’ia riro ’ei hoa nō ’oe. ’Ua ’oa’oa roa vau tei roto ’oe i tā’u piha ha’api’ira’a ’ori. »

’Ua tīa’i maoro noa Mika e hōro’a i terā parau ia Sara. ’Ua hina’aro roa ’oia ’ia ’ite ato’a Sara i te ’oa’oa ’e te here i te ’ore.