E piti ’api tei ’ī i te māuruuru

Hōho’a

man reading a letter

Faʼahōho’araʼa nā Allen Garns

’Ua māuiui tō’u metua tāne i tōna orara’a tā’āto’a nō tōna au-’ore-ra’a iāna iho ’e te mana’o nō tōna faufa’a ’ore. ’Ua pa’ari ’oia ’e te hō’ē metua tāne inu ’ava tei parau noa iāna i tōna mana’o ha’afaufa’a ’ore. ’Aua’e rā, ’aita tō’u metua tāne i riro mai ’ei ta’ata inu ’ava, ’aita rā ’oia i parau noa a’e iā’u ’e i tō’u mau taea’e ’e mau tuahine ē, ’ua fa’ahiahia ’oia ia mātou ’aore rā ’aita roa ’oia i fa’ahiahia i te ’ohipa maita’i tā mātou e rave. ’A pa’ari noa ai au, ’ua tāmata vau i te ’imi i te rāve’a ’ia au mai ’oia i tā’u ’ohipa, terā rā, e’ita iho ā e nava’i, ’o te mana’o ïa tei noa’a mai. ’Ua fa’atupu te reira i te mana’o ’ino’ino i roto ia māua.

I te hōʼē matahiti, ’ua fa’ati’a vau i te reira i tō’u ’episekōpo pa’ari. ’Ua hōro’a mai ’oia i te mana’o e pāpa’i i tō’u metua tāne i te hō’ē rata nō te parau iāna i te mau tumu ato’a ’ua māuruuru vau iāna. E ’ere ïa i te ’ohipa na’ina’i nō’u. E mea hōhonu tō’u mau pēpē, ’e ’aita vau i hina’aro i ta’u rata ha’amāuruuru ’ia riro ’ei fa’a’itera’a i tō’u ’ino’ino. Nō reira ’ua pure au. Ma te Vārua nō te arata’i iā’u, ’ua ha’amata te mau tumu nō tō’u māuruuru i tō’u metua tāne ’ia mani’i mai. E taime ri’i tā’u i rave ē i te otira’a, ’ua ’ī roa e piti ’api.

’Ua hōro’a atu vau i tā’u rata, ma te ’ite ’ore e aha tā tō’u metua tāne e parau mai. ’Ua ’ite rā vau e ’ere nā’u e mā’iti i tāna pāhonora’a. Tā’u noa i hina’aro, ’o te hi’ora’a i tō’u ’ā’au ’e te ha’amana’ora’a i te tumu ’ua pāpa’i au i terā rata.

’Ia po’ipo’i a’e, ’ua fāri’i mai au i te hō’ē niuniu mai te vahine ’āpī o tō’u metua tāne. Tē ta’i ra ’oia. ’Ua fa’ati’a mai ’oia ē ’ua tai’o tō’u metua tāne i te rata, nā ni’a iho noa. ’Ua nā ’ō mai ’oia e’ita tāna e nehenehe e paraparau iā’u nō te mea ’aita ’oia e fa’aea i te ta’i.

« Māuruuru ! », tāna ïa parau. « ’Ua hina’aro iho ā tō’u metua tāne i te reira. »

I muri ri’i mai, i terā mahana, ’ua tāniuniu mai tō’u metua tāne nō te ha’amāuruuru iā’u. ’Ua tāniuniu ’oia iā’u i te mau mahana ato’a e rave rahi mahana i muri iho nō te fa’a’ite mai i te faufa’a o te rata nōna.

E’ita iho ā ïa tā’u e nehenehe e parau ē, ’ua tupu te semeio ’ua maita’i roa mai teie ’ohipa, tē vai noa nei ā te tahi ’ohipa e rave. Ē muri a’era, ’ua ha’amata tō’u ’ā’au i te ora mai, ’e ’ua maita’i ato’a tō māua aura’a. Ē i te hope’a, ’ua noa’a iā’u i te fa’a’ore i tāna hapa.

Ma’a matahiti i muri mai, i muri iho i te tahi ’arora’a i te ma’i mariri ’aita’ata, ’ua fa’aru’e mai tō’u metua tāne. ’Ua pāpū iā’u ē, tē ’oa’oa roa nei ’oia nō te tauturura’a te Fa’aora iāna ’ia ora mai i terā mau matahiti hāmani-’ino-ra’a. ’Ua ’ite au ē, ’ua ora mai au maoti te mana o te tāra’ehara a Iesu Mesia. ’Ua māramarama te Fa’aora i tō tātou mau hina’aro ’e ’ua ti’a iāna ’ia tauturu ia tātou ’ia tātara i te rā’au ta’ero nō te pēpē ’e te ’ino’ino i roto i tō tātou vārua. ’Ua ’ite au ē, e rapa’aura’a mana rahi tō te māuruuru, te fa’a’orera’a hapa ’e te here.