Arata’ihia ia Monica ra

Hōho’a

woman standing on balcony watching other woman at window

Fa’ahōho’ara’a nā Stan Fellows

I te orara’a vau i São Paulo (Beresiria), ’ua mātau vau i te hō’ē vahine ta’a ’ē, tōna i’oa ’o Graça. E vahine poihere ’e te hāmani maita’i ’oia, ’e e hoa ho’i nō te tā’āto’ara’a.

E nā hoa aupuru māua ’o Graça. E toru tāna tamari’i, tē rave ra i te ’ohipa ’āfa mahana, ’aita e pere’o’o ’e ’aita e niuniu, ’aita rā te reira mau mea i tāpe’a iāna ’ia tāvini.

Mai tā’u taupe’e, e nehenehe tā’u e ’ite hō’ē ha’amāramarama o tōna fare. ’Ia vata ’oia, e tu’u ’o Graça i te hō’ē ’ahu ’ute’ute i tāna ha’amāramarama nō te fa’a’ite mai ē, ’ua ineine ’oia nō te rave i te hāhaerera’a. ’Aita roa atu ’oia i ’imi i te tumu ’eiaha e tāvini. ’Ua feruri pinepine au i te tāpa’o a Graça ’e tōna hi’ora’a rahi nō te tāvinira’a ha’apa’o maita’i ’e te ’ōhie.

Hō’ē ’ohipa i tupu tā’u e tāpe’a nei. ’Ua fa’aineine māua ia māua ’e ’ua pure ho’i nō te hāhaere i te hō’ē o tō māua mau tuahine. ’A fātata ai māua i tōna fare, ’ite a’era māua ē, tē haere ra māua i te fare o te tahi atu tuahine. ’Ua fa’ata’ahia māua e hāhaere i teie tuahine, e metua vahine e piti tamari’i, ’aita e haere nei i te purera’a, ’aita rā māua i ’ōpua e hāhaere iāna i terā mahana. Nō te mea tei reira māua, ’ua pātōtō atura, ’aita rā e pāhonora’a.

’Ua fa’aoti māua e tāmata fa’ahou ā ’e e tīa’i. I te hope’a, ’ua haere mai te tuahine, ’o Monica, ma te parau ē, ’aita ’oia i vata. Tē ’ite ra māua ē, ’ua rohirohi roa ’oia fātata i te ta’i. I te paraura’a māua ē, tei reira māua nō te tauturu iāna, ’ua fāri’i mai ’oia ’ia tomo māua. Tē ta’i ra tāna pēpe, nō reira ’ua parau atu māua e ha’apa’o i tāna pēpe, e tīa’i māua. I te pa’umara’a Monica i te piha ni’a ’e tāna pēpe, ’ua ha’amata māua i te ’ohipa, ’ua tāmā māua e rave rahi piha ’e ’ua tūfene i te ’ahu tā māua i ’ite.

I te ’itera’a Monica i te nahonaho o tōna fare, ’ua ha’amata ’oia i te ta’i, ’ua mahora tōna ’ā’au ’e ’ua fa’a’ite mai ’oia i tōna mau fifi. ’Ua parau fafau atu māua e tauturu māua iāna, ’e ’ua paraparau māua i te peresideni Sōtaiete Tauturu nō ni’a i tōna mau fifi. I te sābati nō muri mai, ’ua haere mai Monica i te purera’a.

’Ua itoito roa mai Monica ’e ’ua ’oa’oa ho’i, ’e ’ua tāmau māua i te aupuru iāna ma te here ’e te ha’apa’o. ’Ua vai noa tōna mau fifi, ’ua ti’a rā iāna ’ia fa’aruru i te reira ma te fa’aro’o rahi a’e ’e te itoito rahi a’e maoti tōna ho’ira’a mai i te ’Ēkālesia.

’Ua māuruuru roa vau i te hi’ora’a o Graça ’a tāvini ’āmui ai māua. ’Ua pure māua nō te arata’ira’a ’e ’ua arata’i te Atua ia māua ia Monica ra.