Mai te taure’are’a rave ’ino tae atu i te ta’ata bāpetizohia

Hōho’a

young men tempting Hugo to smoke

Faʼahōhoʼaraʼa nā Brooke Smart

I te 17ra’a o tō’u matahiti, ’ua fa’aruru vau i te ’umera’a teimaha a te mau taure’are’a o tā’u fare ha’api’ira’a tuarua. Tō’u mau hoa i terā tau, ’aita rātou i ’āfaro i tā’u i hi’o ’ei mea faufa’a. ’Ua rave ’āmui mātou tō’u mau hoa i te mau ’ohipa au mai te tāorara’a popo i roto i te ’ete ’aore rā te fa’ahorora’a pōpō marite. E mea inu ato’a rā rātou i te ’ava ’e e mea puhipuhi i te ’ava’ava—e piti ’ohipa ’aita vau i rave nā muri ia rātou.

I te hō’ē mahana, tei rāpae te hō’ē pae o mātou i tā mātou fare ha’api’ira’a, tē tāmau ra i te ha’api’ira’a nō te hō’ē hi’opo’ara’a i terā mahana. ’O mātou e piti o tō’u mau hoa rahi a’e, ’o Juan ’e ’o Francisco (’ua tauihia te mau i’oa). I te hō’ē taime ’ua tātara mai te tahi i te ahi ’e te ’ava’ava. ’Ua mana’o roa vau ’ua fiu tō’u mau hoa i te tāmau i tā rāua ha’api’ira’a ’e ’ua mo’e ia rāua ē tei reira vau. ’Ua hape roa ïa vau i te fāriura’a rāua i ni’a iā’u ma te parau ē : « ’Ua tae te taime nō Hugo ’ia ha’api’i nāhea i te pūpuhi i te ’ava’ava ».

’Aita vau i taimehia nō te parau atu, ’ōu’a mai nei Juan rāua Francisco nō te haru mai iā’u hō’ē i ni’a i te hō’ē rima ’e te tahi i ni’a i te tahi. ’Ua tāpe’a rāua i tō’u rima i raro ’a tu’u ai hō’ē i te hō’ē ’ava’ava i ni’a i tō’u ’utu. I reira noa, ’aita tō’u tino i au i te reira ’e ’ua tūtuha atu vau i te ’ava’ava i raro, i te ātea. ’Aita i maoro, pa’aina a’enei i ni’a i tō’u pāpāri’a te hō’ē poro rima. ’Ua ha’amata’u rāua iā’u ma te parau ē : « E tū’ama fa’ahou māua i te hō’ē ’ava’ava ’e e ’ite ’oe e aha te pūpuhira’a ’ava’ava. ’Eiaha ’oe e tūtuha i raro. ’Ia nā reira ’oe, e fārerei ’oe. »

I terā taime, ’ua ta’a iā’u ē, e fifi iti rahi tō’u. ’Ua tāpiri au i tō’u mata ’e pure atura nō te ani i te tahi tauturu. I te otira’a iho ā tā’u pure, tae mai nei te pere’o’o o tō mātou ’orometua nō te fa’aea i mua ia mātou. ’Ua pou mai tō mātou ’orometua ma te ani ē, te aha ra mātou. ’Ua tu’u a’era tō’u nā hoa iā’u. « Tē fa’aineine ra mātou nō te hi’opo’ara’a », ’ua parau atu rāua i te ’orometua. ’Ua tomo atu mātou i roto i te fare ha’api’ira’a nō te rave i te hi’opo’ara’a, ’ātīrā ïa.

Noa atu ā te huru o tā rāua ravera’a i ni’a iā’u, ’ua fa’a’ore au i te hapa o tō’u mau hoa, te mea tā rāua i rave i ni’a iā’u. ’Ua ’ite au ’aita rāua i ta’a i tā’u mau fa’aturera’a ’e tā’u fa’aotira’a e ora i te Parau pa’ari, nō reira ’ua fa’a’ore au i tā rāua hape ma te mā’iti ’eiaha e fa’atupu i te mana’o ’ino’ino ia rāua. I te fa’aotira’a mātou i te ha’api’ira’a, ’ua reva atu vau nō tā’u misiōni, ’ua tāmau noa rā vau i te pāpa’i ia Juan ’e Francisco. ’Ua pāpa’i pinepine au ia rāua i te mau rata nō te fa’a’ite ia rāua i te ’evanelia ’e tō’u ’itera’a pāpū nō Iesu Mesia. ’Ua ani au ia rāua ’ia tātarahapa ’e ’ia haere i te purera’a. ’Ua māere roa vau ’ua haere hō’ē o rāua.

E mea pinepine au i te ani i tō’u mau hoa ’ia haere mai i te purera’a i te sābati, ’aita rā hō’ē i fāri’i i te anira’a ē tae roa mai i teienei. Noa atu ā e’ita tā’u e nehenehe e haere nā muri ia Juan, tei reira rā tō’u mau taea’e ’e tō’u metua tāne nō te tauturu iāna ’e nō te fa’ahoa iāna. ’Ua fāri’i tō’u ’utuāfare iāna, ’e ’ua au maita’i Juan i te fare purera’a. Ha’amata a’era ’oia i te taui ma’a vāhi iti ē ma’a vāhi iti ē tae roa te fa’aotira’a e bāpetizo iāna. ’Ua ’oa’oa roa ’ino vau nōna ’e ’ua hau atu te reira i tōna paraura’a mai ē, ’ua ha’api’i ’oia ’ia here ia Iesu Mesia maoti tā’u mau rata. I tō’u ho’ira’a mai mai tā’u misiōni, ’ua vai piri noa ato’a vau ia Francisco, ē muri a’era, ’ua bāpetizo rāua tāna vahine. I teie mahana, e mau hoa rahi noa ā Juan ’e Francisco nō’u.

’Ua taui roa tō’u orara’a i teie nau ’ohipa. ’Ua ’apo mai au ē, te rāve’a maita’i a’e nō te fa’auru i te orara’a o te ta’ata, ’o te orara’a ïa ma te parau ti’a, ma te here ia vetahi ’ē ’e ma te toro atu i te rima tauturu. Tē nā ’ō ra te Nō te Pūai o te Feiā ’Āpī : « Nō te fāri’i i te mau hoa maita’i, ’ia riro ’outou ’ei hoa maita’i. ’A fa’a’ite i tō ’outou ’ana’anatae mau nō vetahi ’ē ; ’a ’ata’ata ’e ’a fa’a’ite ia rātou ē, tē māna’ona’o ra ’outou ia rātou ».¹ ’O teie tā te Fatu i tauturu iā’u ’ia rave i ni’a ia Juan ’e Francisco. Maoti te reira tē vai ra tō’u mau hoa rahi roa ’ino tā’u i mātau, ’e i teienei, tē ’ohipa ’āmui nei mātou nō te pāturu i te bāsileia o te Atua ’ei melo nō te ’Ēkālesia.

E tāpe’a noa i te mau fa’aturera’a a te ’Ēkālesia, noa atu ā tei roto ’outou i te fifi mai iā’u. Tē ha’api’i nei te Nō te Pūai o te Feiā ’Āpī : « ’A ’imi ai ’outou ’ia riro ’ei hoa nō vetahi ’ē, ’eiaha e fa’ahuru ’ē i tā ’outou mau fa’aturera’a. Mai te mea ē, e tūra’i tō ’outou mau hoa ia ’outou ’ia rave i te mau mea e ’ere i te mea maita’i, ’a fa’ariro ia ’outou ’ei ta’ata ’o tē ti’a māite no te maitai ».² Noa atu ē e au ē tē rave ra te tā’āto’ara’a i te mau mea ’aita e tano i te mau fa’auera’a, ’a vai pūai noa inaha e mana rahi tō tō ’outou hi’ora’a. ’A riro i te huru hi’ora’a e feruri atu tō ’outou mau hoa i roto i tō rātou mau taime pe’ape’a. I te tahi taime mai iā’u nei, e riro paha tō ’outou hoara’a i te mea e tauturu ia rātou ’ia ha’api’i, ’ia tātarahapa ’e ’ia fa’afāriu.