Te parau hope’a
Te ’ōfa’i tihi rahi nō tō tātou fa’aro’o
Nō roto mai i te hō’ē a’ora’a nō te ’āmuira’a rahi nō ’Ātopa 1984.
Nō te mau hiero ’āpī tāta’itahi, tē vai nei tā tātou ’ōro’a nō te ’ōfa’i tihi ’ei tū’atira’a i te hō’ē peu e ho’i roa i te mau tau tahito ra. Hou te fa’a’ohipara’a o te tīmā, e ravehia te niu o te hō’ē patura’a e te tahi mau ’ōfa’i rahi. E ’eruhia te hō’ē rēni ’e e tu’uhia te mau ’ōfa’i ’ei papa. Mai te hō’ē vāhi ha’amatara’a, e ’āpapahia te niu o te patu i te hō’ē pae ē tae roa i te hō’ē ’ōfa’i tihi ; mai reira e tīpu’u i teie poro ’e e patu ē tae roa i te tahi atu poro, i reira te tahi atu ’ōfa’i e tu’uhia, ’e mai reira atu i te tahi poro, ’e mai terā poro i terā vāhi ha’amatara’a… E parauhia te ’ōfa’i hōpe’a te ’ōfa’i tihi rahi, ’e ’ua riro te tu’ura’a i te reira ’ei tumu nō te tahi fa’ahanahanara’a rahi. Nō te tu’ura’ahia terā ’ōfa’i tihi, ’ua ineine te niu nō te patura’a o te fare. Nō reira, tē parau nei te fa’ahōho’ara’a a Paulo nō te ’Ēkālesia mau :
« ’E teienei, e ’ere atu ra ’outou i te ta’ata ’ē’ē ’e te purutia, hō’ē ato’a rā tō ’outou ’oire ’e te feiā mo’a, ’e nō te fēti’i o te Atua ;
« I patuhia tātou i ni’a iho i te niu a te mau ’āpōsetolo ’e te mau peropheta ra, ’e ’o Iesu Mesia iho te ’ōfa’i tihi rahi ;
« Nōna te fare ato’a i te ’ati-maita’i-ra’a iāna ra, i riro ai ’ei hiero mo’a nō te Fatu ra » (Ephesia 2:19–21).
Tē vai nei te mau ’ōfa’i tihi niu i ni’a i te reira teie ’Ēkālesia rahi nō te mau mahana hope’a i ha’amauhia ai e te Fatu ’e i patuhia ai, ma te « ’ati-maita’i-ra’a ». E mea niu roa ato’a te reira nō teie ’ohipa, ’o te niu mau, te mau tūtau e mau ai te reira… [’Are’a rā], tē fa’ahiti nei au nō te ’ōfa’i tihi rahi, ’o tā tātou e parau nei ’e e fa’ahanahana nei i roto i te Fatu Iesu Mesia…
’O ’oia te ’ōfa’i tihi rahi ō te ’Ēkālesia tei topahia tōna i’oa, Te ’Ēkālesia a Iesu Mesia i te Feiā Mo’a i te mau Mahana Hope’a nei. « ’Aita atu ho’i e i’oa i fa’a’itehia mai i te ta’ata i raro a’e i teie nei ra’i e ora ai tātou nei » (Te ’Ohipa 4:12). ’O ’oia te tumu nō tō tātou fa’aorara’a, te ta’ata e hōro’a i te ora mure ’ore (hi’o Hebera 5:9). ’Aita e ta’ata e ’aifāito iāna. ’Aita a’enei. E e’ita roa atu. Māuruuru i te Atua nō te hōro’ara’a i tāna Tamaiti here, tei hōro’a i tōna ora ’ia ora tātou ’e tei riro ho’i ’ei ’ōfa’i tihi tumu ’āueue ’ore nō tō tātou fa’aro’o ’e nō tāna ’Ēkālesia.