Wan Jos blong Sulma

Pikja

A Church for Zulma

Sulma i sidaon long wan long ol jea long jos mo stretem yunifom sket blong hem. Kala laet i saen tru long ol kala windo,mo wan kros i stanap long fored blong japel. Sulma i stap go long wan jos skul, mekem se Hem i stap go long wosip seves tu taem long wan dei wetem ol nara studen. Sulma i laekem jos blong hem. Hem i lavem Jisas mo lavem blong lan abaot Hem.

Hem i sidaon kwaet taem pris i stat blong toktok. Be tedei, hem i filim wan samting i defren. Sek nomo wan niu tingting i kam long maen blong hem i go insaed long maen mo hat blong hem: I gat fulap moa trutok i stap.

Sulma i benbenem ol aebro blong hem. ?Moa trutok? ?Hemia i minim wanem?

Tingting ia i kam bakegen. I gat moa trutok.

Sulma i sarem ol ae blong hem mo tingting moa long wanem hem i stap filim. Hem i bin lanem fulap gudfala samting long jos. Be naoia hem i stap askem hemwan sapos i gat wan samting we i nogat. Ating God i wantem hem blong save moa. ?Be olsem wanem bae hem i faenem?

Afta, hem i bin toktok wetem bigfala brata blong hem, Alberto, abaot ol tingting blong hem.

“Yu ting se i gat sam moa trutok?” Alberto i askem.

Sulma i sakem hed blong agri. “Mi wantem lanem abaot ol nara jos,” hem i talem.

“Okei,” Alberto i talem. “!Bae mi go wetem yu!”

Blong sam yia, Sulma mo Alberto i bin visitim ol defren jos. Afta long wan jos seves, Alberto i talem, “Jos ia i tokbaot ol gudfala samting.”

Sulma i agri, be oli filim se i gat wan samting i nogat yet, mekem se oli gohed blong stap lukaot.

Wan dei Alberto i ron i kam antap long step blong haos blong olgeta. “!Mi fanem jos we yumitu stap lukaotem!” Alberto i talem. Hem i givim wan bigfala hag long Sulma.

Ol ae blong Sulma i open bigwan. “?Weaples? ?Olsem wanem?”

“Fren blong mi i bin mitim sam misinari blong Jos Ia blong Jisas Kraes Ia blong Ol Lata-dei Sent,” Alberto i talem. “Mi lisin long olgeta, mo !mi bilivim wanem oli bin tijim!”

Sulma mo Alberto i glad tumas mekem oli danis raon long haos. Be afta Sulma i gat nogud nius. Mama i no wantem hem blong mit wetem ol misinari. “Yu gat 12 yia nomo,” Mama i talem. “Yu yang tumas.”

From Alberto i moa bigwan, hem i save gohed blong stap mit wetem ol misinari. Sam wik afta, hem i kasem baptaes.

Sulma i gohed blong askem Mama bakegen mo bakegen sapos hem i save lan long ol misinari. Afta, Mama i talem yes.

Taem ol misinari i bin tijim Sulma, hem i filim wom insaed long hat blong hem. Wan long ol misinari i gat had taem blong toktok Spanis, be i no bin mata. Wanem i mata i hamas gud Sulma i bin filim. Taem hem i bin lanem abaot Josef Smit mo Buk blong Momon, !hem i save se hem i faenem trutok we hem i stap lukaotem!

Sulma i wantem blong baptaes. ?Be wanem nao bae Mama i talem? !Sulma i hapi tumas taem Mama i talem yes! Long dei blong baptaes blong hem, Sulma i jenis long waet klos evriwan. Hem i save se God i lavem hem. Hem i save se God i save hem. !Mo hem i save se Hem i bin helpem hem blong faenem Jos blong Hem we i kambak long wol! ●