Fiuja blong Jos: Stap Mekem Wol I Rere blong Seken Kaming blong Sevya
Jos Ia blong Jisas Kraes blong Ol Lata-dei Sent i stap mekem wol ia i rere from dei ia taem “bambae wol ia i fulap gud long ol man we oli savegud Hae God” (Aesea 11:9).
We Yumi Save Holem, i kam long Jay Bryant Ward, oli no save kopi
Yu mo mi i save tekpat long Restoresen ia we i stap gogohed, blong gospel blong Jisas Kraes. !Hem i bigwan tumas! !Hem i no samting we man i mekem long han blong hem! Hem i kam long Lod, we i bin talem: “bambae mi mekem wok blong mi i muv hariap moa long stret taem” (Doktrin mo Ol Kavenan 88:73). Wok ia, paoa blong hem i kam tru long wan anaonsmen we i kam long heven, we i bin hapen 200 yia i pas finis. Hem i tekem twelef toktok nomo: “Hem ia, Hem i Stret Pikinini blong Mi. !Lisin gud long hem! (luk long Josef Smit—Histri 1:17).
Anaonsmen ia, Lod we I Gat Olgeta Paoa i tekem yang Josef Smit i kam long Lod Jisas Kraes. Olgeta twelef toktok ia i statem Restoresen blong gospel blong Hem. ?From wanem? !From se God blong yumi we i stap laef, i wan God we i gat lav! !Hem i bin wantem ol pikinini blong Hem blong kasem wan bodi we i nomo save ded, mo blong oli kasem laef we i no save finis! Bigfala lata-dei wok we yumi pat long hem, Lod i stanemap, long stret taem naoia, blong blesem wan wol we i stap wet mo i stap krae.
Mi no save tokbaot Restoresen, wetem voes we i no glad tumas. !Tru samting ia, i nambawan we i gud tumas! !Hem i bigwan tumas! !Hem i mekem win blong yu i sot! ?I no gud tumas we ol mesenja we oli kam long heven oli bin kam blong givim atoriti mo paoa blong mekem wok ia?
Tedei, wok blong Lod insaed long Jos Ia blong Jisas Kraes Ia blong Ol Lata-dei Sent i stap muv i go fored long wan hae spid. Jos i gat wan fiuja we i moa gud bitim eni samting we man i stap tingting long hem. “God i putumgud plante samting oli rere finis blong ol man we oli lavem hem. Ol man oli no luk ol samting ya long ae blong olgeta, oli no harem tok blong olgeta long sora blong olgeta, … be olgeta oli rere i stap” (1 Korin 2:9; luk tu long Doktrin mo Ol Kavenan 76:10).
Tingbaot se ful seves blong Kraes i stap long fiuja yet blong kam. Ol profesi blong Seken Kaming blong Hem, oli mas kam blong hapen yet. Yumi jes stap bildimap tingting from las dispensesen ia—taem bae Seken Kaming blong Sevya bae i kam ril.
Kam Tugeta blong Isrel long Tugeta Saed blong Vel
Wan samting we i nid blong hapen bifo long Seken Kaming, i kam tugeta ia blong Isrel we i bin seraot olbaot, we plante i wet long hem (luk long 1 Nifae 15:18; luk tu long taetol pej blong Buk blong Momon). Doktrin blong kam tugeta ia, i wan long ol impoten tijing blong Jos Ia blong Jisas Kraes blong Ol Lata-dei Sent. Lod i talemaot: “Mi givim long yufala wan saen, … se bae mi karem i kam tugeta aot long taem we oli bin seraot olbaot, ol pipol blong mi, O laen blong Isrel, mo bae mi stanemap bakegen long medel blong olgeta Saeon ia blong mi” (3 Nifae 21:1).
Yumi no stap tijim doktrin ia nomo, be tu, yumi stap tekpat long hem. Yumi mekem hemia taem yumi stap help blong karem tugeta, olgeta we Lod i bin jusum, long tugeta saed blong vel. Olsem pat blong fiuja blong wol ia wetem olgeta man we oli stap laef long hem, olgeta famli blong yumi we oli ded, bae oli mas pemaot olgeta (luk long Doktrin mo Ol Kavenan 128:15). Wetem sore, invitesen ia blong “kam long Kraes” (Jekob 1:7; Moronae 10:32; Doktrin mo Ol Kavenan 20:59) oli save givim tu i go long olgeta we oli bin ded be oli no bin save long gospel (luk long Doktrin mo Ol Kavenan 137:6–8). Be, pat blong wok ia blong oli rere, i nidim ol hadwok blong ol narawan we oli stap long wol ia. Yumi putum tugeta ol bubu jat, yumi krietem ol famli grup, mo yumi mekem ol tempol wok long bihaf blong ol dedman blong karem i kam tugeta ol man mo ol woman oli kam long Lod mo long ol famli blong olgeta (luk long 1 Korin 15:29; 1 Pita 4:6).
Tabu Fasin i Go long Lod, i kam long Jay Bryant Ward, oli no save kopi
Ol famli oli sil tugeta blong evri taem we i no save finis (luk long Doktrin mo Ol Kavenan 2:2–3; 49:17; 138:48; Josef Smit—Histri 1:39). I gat wan jen we i joenem ol papa mo ol pikinini we oli mas mekem. Long taem blong yumi naoia, i mas gat wan ful, komplit mo stret yunion blong evri ki mo paoa blong evri dispensesen we bae oli mas weldem tugeta (luk long Doktrin mo Ol Kavenan 128:18). From ol tabu stamba tingting ia, naoia ol tempol oli stap raon long wol. Mi talemaot bakegen se, taem oli bildim ol tempol ia, maet bae i no jenisim laef blong yufala, be seves blong yufala insaed long tempol, yes.
Taem i stap kam taem we, olgeta we oli no obei long Lod, bae oli seperetem olgeta long olgeta we oli stap obei (luk long Doktrin mo Ol Kavenan 86:1–7). Sef ples blong yumi, i blong gohed blong stap klin inaf blong Hem i tekem yumi insaed long tabu haos blong Hem. Bes presen we yu save givim long Lod, i blong yu meksua se yu no gat mak, yu klin inaf blong go insaed long tabu haos blong Hem. Presen ia, blong Hem i kam long yu, i pis ia mo sekiuriti ia, blong save se yu yu klin inaf blong mitim Hem, long eni taem we taem ia bae i kam.
Antap long tempol wok we i stap, taem ia we Buk blong Momon i bin kamaot, i wan saen long ful wol se Lod i bin statem wok blong karem Isrel i kam tugeta, mo Hem i mekem olgeta kavenan we Hem i bin mekem long Ebraham, Aesak, mo Jekob (luk long Jenesis 12:2–3; 3 Nifae 21; 29). Buk blong Momon i talemaot doktrin ia blong kam tugeta (eksampol, luk long 1 Nifae 10:14). Hem i mekem ol pipol oli lanem abaot Jisas Kraes, blong oli biliv long gospel blong hem, mo blong joenem Jos blong Hem. Wanem i stap, i we, sapos i no gat Buk blong Momon, kam tugeta blong Isrel we God i promesem, bae i no save hapen.
Misinari wok i wan impoten pat long kam tugeta ia. OI wokman blong Lod oli stap go olbaot blong talemaot se Restoresen i bin hapen. Long plante nesen, ol memba mo ol misinari blong yumi oli bin lukaotem olgeta ia we oli pat blong Isrel we i seraot olbaot; oli bin lukaotem olgeta “long ol hol long ston” (Jeremaea 16:16); mo oli bin go hukum olgeta, semmak olsem long taem bifo.
Misinari wok i joenem ol pipol long kavenan ia we Lod i bin mekem wetem Ebraham blong bifo:
“Bambae yu stap olsem wan blesing long laen blong yu afta long yu, long wei ia se bae han blong olgeta bae i tekem seves ia mo Prishud ia i go long evri nesen;
Mo bambae mi blesem olgeta tru long nem blong yu; from se hamas long olgeta we bae oli akseptem Gospel ia, bae mi singaotem olgeta folem nem blong mi, mo bae mi kaontem olgeta olsem laen blong yu, mo bambae oli girap mo blesem yu, olsem papa blong olgeta” (Ebraham 2:9–10).
Misinari wok i stat ia nomo blong blesing ia. Blong ol blesing ia oli kam blong hapen, blong yumi tekem, bae i kam nomo long olgeta we oli bin go insaed long ol wota blong baptaes, oli mekem laef blong olgeta i stret evriwan i go kasem poen ia we oli save go insaed long tabu tempol. Blong kasem wan endaomen insaed long tempol, i minim se i silim ol memba blong Jos long kavenan ia blong Ebraham.
Joes ia blong kam long Kraes i no wan kwestin abaot ples; hem i wan kwestin blong komitim yu, yuwan. Evri memba blong Jos oli save kasem doktrin, ol odinens, ol prishud ki, mo ol blesing blong gospel, i nomata long ples we oli stap long hem. Ol pipol oli save kam “blong kasem save long saed blong Lod” (3 Nifae 20:13) mo oli neva aot long homples blong olgeta.
I tru, long ol eli taem blong Jos, blong jenisim laef i minim blong stap go longwe tu. Be naoia, kam tugeta ia i tekem ples long wanwan nesen. Lod i talemaot wok blong stanemap Saeon (luk long Doktrin mo Ol Kavenan 6:6; 11:6) long wanwan ples ia we Hem i bin givim blong Ol Sent blong Hem oli bon long hem mo sitisensip blong olgeta. Ples blong kam tugeta blong Ol Sent long Brasil, hem i long Brasil; ples blong kam tugeta blong Ol Man Naejeria, hem i long Naejeria; ples blong kam tugeta blong Ol Sent long Koria, hem i long Koria. Saeon, hem i “olgeta we hat blong olgeta i klin gud” (Doktrin mo Ol Kavenan 97:21). Hem i eni ples we ol stret mo gud Sent oli stap long hem.
Blong stap sef long saed blong spirit, oltaem bae i dipen long wei we wan i stap laef folem, be i no folem weaples hem i stap long hem. Mi promes se, sapos yufala i praktisim fet long Jisas Kraes mo yusum paoa blong Atonmen blong Hem tru long fasin blong sakem sin, bambae yumi gat save mo paoa ia blong God, blong helpem yumi blong tekem ol blesing blong gospel we i kambak, blong Jisas Kraes i go long evri nesen, famli, lanwis mo pipol, blong help blong mekem wol ia i rere from Seken Kaming blong Lod.
Seken Kaming
Lod bae i kambak long graon ia we Hem i bin mekem tabu misin blong Hem long hem long wol ia. Wetem viktri, bambae Hem i kambak bakegen long Jerusalem. Wetem red klos blong King, we i simbol blong blad blong Hem, we i bin kamaot long evri hol blong skin, bambae Hem i gobak long Tabu Siti (luk long Doktrin mo Ol Kavenan 133:46–48). Long ples ia mo long ol nara ples, “Hae God bambae i soemaot we paoa blong hem i bigwan tumas, mo olgeta man long wol bambae oli luk bigfala paoa ya blong hem” (Aesea 40:5; luk tu long Doktrin mo Ol Kavenan 101:23). Nem blong hem bae hem i “‘Nambawan Man blong Givhan long Man’, mo ‘God we i Gat Paoa’, mo ‘Papa we bambae i Stap Oltaem’, mo ‘Pikinini ya blong King, we Hem i Stamba blong Pis’”(Aesea 9:6).
Bae Hem i rul aot long tufala kapitol blong wol: wan long olfala Jerusalem (luk long Sekaraea 14) mo aot long Niu Jerusalem “we oli bildim long graon blong Amerika” (Ol Toktok blong Bilif 1:10). Aot long ol senta ia, bambae Hem i lidim ol afea blong Jos mo kingdom blong Hem. Bae i gat wan tempol we bambae oli bildim yet long Jerusalem. Aot long tempol ia, bambae Hem i rul blong oltaem olsem Lod blong Ol Pipol. Wota bae i kamaot andanit long tempol. Ol wota blong Ded Si bae i kam oraet bakegen. (Luk long Esikel 47:1–8.)
Long dei ia, bambae Hem i tekem ol niu taetol mo bae ol spesel Sent oli raonem Hem. Bambae oli save Hem olsem “Masta blong olgeta masta, mo i King blong olgeta king. Nao from samting ya, hem wetem ol man we hem i singaot olgeta, mo i jusumaot olgeta, mo we olgeta oli stap holem tok blong hem,” (Revelesen 17:14) oli olgeta ia we oli holemtaet tras blong olgeta long wol ia. Afta, bambae Hem i “King we bambae i stap rul oltaem gogo i no save finis” (Revelesen 11:15).
Wol ia bae i kambak olsem wan paradaes mo bae i kam niu bakegen. Bambae i gat wan niu heven mo wan niu wol (luk long Revelesen 21:1; Ita 13:9; Doktrin mo Ol Kavenan 29:23–24).
Hem i wok blong yumi—hem i spesel janis blong yumi—blong help blong stap mekem wol i rere from dei ia.
Fidim Ol Sipsip blong Mi, i kam long Jay Bryant Ward, oli no save kopi
Fesem Fiuja Wetem Fet
Be taem yumi stap wet from hemia, long ples ia mo naoia, yumi stap laef long wan taem blong trabol. Ol graon we oli seksek, mo ol tsunami (bigfala wota we i ron) oli mekem ol bigfala damej, ol gavman oli stap folfoldaon, ol trabol blong mane i bigwan, famli i stap anda long atak, mo ret blong ol divos i stap go antap. Yumi gat bigfala risen blong stap wari. Be yumi no nid blong letem fraet blong yumi i muvumaot fet blong yumi. Yumi save faet agensem ol fraet ia taem yumi mekem fet blong yumi i kam strong moa.
?From wanem nao yumi nidim wan fet o bilif we i save girap mo gogohed? From i gat ol had dei we oli stap long fored. Bae i no hapen tumas se bae i isi o i popula blong stap olsem wan fetful Lata-dei Sent. Wanwan long yumi bae i gotru long tes. Aposol Pol i bin givim woning se, long ol las dei ia, olgeta we oli gat strong tingting blong wok strong blong folem Lod, “bambae ol man oli save mekem i nogud tumas long olgeta” (2 Timoti 3:12). Wanem bae i kam agens ia, i save katemaot yu we bae yu nomo strong mo nomo toktok, o bae i save pusum yu blong yu stap olsem wan eksampol mo gat strong paoa long tingting long evri dei laef blong yu.
Olsem wanem yu dil wetem ol tes blong laef bae i pat blong divelopmen blong fet blong yu. Paoa i kam taem yu tingbaot se yu gat wan tabu fasin, wan samting we yu gat we praes blong hem i bigwan tumas. Lod i bin rimaenem yu, ol pikinini blong yu, mo ol apupikinini blong yu, se yu yu gat raet folem loa, se yu nao, Lod i bin holemtaet yu long heven blong yu kam long stret taem naoia, mo stret ples ia we yu bon long hem, blong yu groap mo kam ol kavenan pipol blong Hem mo pipol ia we bae i holem flag blong Hem. Taem yu stap wokbaot long rod ia blong Lod, rod ia blong stret mo gud fasin, bambae yu gat blesing ia blong gohed long gud fasin blong Hem mo stap wan laet mo wan sevya long ol pipol blong hem (luk long Doktrin mo Ol Kavenan 86:8–11).
Mekem wanem we i nid blong mekem blong mekem se fet blong yu long Jisas Kraes i kam strong moa taem bae yu kam antap long andastaning blong yu abaot doktrin we oli stap tijim insaed long Jos ia blong Hem we i bin kambak, taem we, oltaem, yu stap lukaotem trutok. From yu rus blong yu i stap strong long doktrin we i klin tru, bambae yu save go fored wetem fet, mo strong fasin blong gohed, mo wetem glad, bae yu mekem evri samting we i stap long paoa blong yu blong mekem ol samting tingting ia blong Lod oli kamtru.
Bambae i gat ol dei we bae tingting i kam slak. !Mekem se yu mas prea blong gat strong paoa long tingting blong yu no givap! Sore tumas, sam we yu bin ting se oli ol fren blong yu, bambae oli salem yu. Mo sam samting, bae yu luk se i no stret nomo.
Be, mi promesem yu se, taem bae yu stap folem Jisas Kraes, bambae yu gat strong pis mo tru glad. Taem yu stap kipim ol kavenan blong yu long wan fasin we i moa fulwan, mo taem bae yu stap difendem Jos mo kingdom blong God long wol ia tedei, bambae Lod i blesem yu wetem paoa mo waes tingting blong mekem wanem we ol memba blong Jos Ia blong Jisas Kraes Ia blong Ol Lata-dei Sent nomo oli save mekem i kamtru.
Yumi, yumi ol bilda blong wanwan man o woman i gat fet long God, fet long Lod Jisas Kraes, mo fet long Jos blong Hem. Yumi, yumi ol bilda blong ol famli, mo yumi mas sil long ol tabu tempol. Yumi, yumi mas bildim Jos mo kingdom blong God long wol ia (luk long Matiu 6:33). Yumi, yumi mas rere from tabu fiuja blong yumiwan: glori, fasin blong nomo save ded, mo ol laef ia we oli no save finis (luk long Rom 2:7; Doktrin mo Ol Kavenan 75:5).
Wetem tingting we i stap daon, mi testifae long yufala—olsem we Profet Josef Smit i bin talemaot—se gospel we i kambak, blong Jisas Kraes, “bae i gohed i go nomo, i klia, i stanap stret, i indipenden, kasem taem we bae i gotru long evri graon, i visitim evri kaen weta, i swipim evri kantri, mo i ring long evri sora, kasem taem ol stamba tingting blong God oli kamtru, mo Hae Jehova bae i talem se wok ia i finis” (History of the Church, 4:540).
Yumi joen long wok blong God we I Gat Olgeta Paoa. Mi prea se bae ol blesing blong Hem i stap wetem wanwan mo yumi evriwan.