Dijitol Nomo: Blong Ol Yang Adalt
?Yu Ting Se Yu Nogat Wan Stamba Tingting Olsem Wan Yang Adalt? Tingting bakegen.
Taem yu tingting se bae yu lidim man insaed long Jos wan dei, i save mekem yu fraet, be i gat ol wei we yu save stap blong lidim man naoia.
Long ol dei bifo long Seken Kaming blong Jisas Kraes, bae i gat “ol wo, mo ol toktok olbaot abaot ol wo.
“ … wan nesen bae i faet agensem wan nara nesen, mo wan kingdom i faet agensem wan nara kingdom; mo bambae i gat hadtaem blong kasem kaekae, mo ol defren kaen sik, mo ol graon we oli seksek, long ol defren ples.
“Mo bakegen, from se rabis fasin bambae i kam bigwan, lav blong man bae i go kolkol” (Josef Smit—Matiu 1:28–30).
Long medel blong ol samting olsem we oli muvmuv, ?huia bae i helpem ol brata mo ol sista blong yumi, insaed mo aotsaed long jos, blong oli kambak long Papa blong yumi we i stap long Heven?
Ples ia nao, yumi, yumi kam insaed.
Hao Yumi Mas Lidim Man
Oli singaotem yumi, se yumi wan long ol jeneresen blong ol yang adalt we yumi moa hae bitim ol narafala jeneresen. Presiden Russel M. Nelson i tokbaot yumi se, yumi ia nao, ol man mo ol woman we “God i trastem hem inaf blong sendem hem long wol long taem blong dispensesen ia we i moa impoten long histri blong wol” (“Stanap Olsem Wan Tru Man blong Mileniom),” Liahona, Okt 2016, 46).
So, ?olsem wanem nao yumi save stap laef long ful paoa blong yumi blong kam ol bigfala lida insaed long Jos Ia blong Lod? Okei, Sapos yu lukluk gud raon long yu, maet bae yu luk se, long wan wei, yu yu wan lida finis.
Maet yu holem wan koling long Jos mo yu stap lidim man. Olsem wan misinari, yu lidim storian, yu lukaot long wan misinari aktiviti, o oli putum yu olsem wan eria lida o wan sista lida. Yu save stap olsem wan lida insaed long famli o long medel blong ol fren blong yu. Yu save lidim ol bubu blong yu blong Jisas i sevem olgeta tru long wok blong famli histri. Maet tu yu wan politik lida, mo oltaem, yu save lidim man long wanem posisen we yu jusum blong stap long hem.
Be kwestin hem i: ?long wanem wei nao, yumi sapos blong lidim man? Sevya i bin lidim man tru long eksampol blong Hem. Hem i bin lidim wetem fasin ia, “Kam, folem mi,” be i no “Wei blong mi i gud moa.” Hem i bin givim seves, i bin tij, mo i bin kea gud long olgeta we oli bin stap raonabaot long Hem. Jisas Kraes hem i nambawan eksampol blong wan lida. Mo blong kam wan gudfala jeneresen blong ol lida, yumi save stat taem yumi traehad blong stap olsem Sevya mo taem yumi stap mekem olgeta smol smol samting ia:
-
Prea from olgeta we oli gat hadtaem blong gogohed, olgeta we oli nidim help, o olgeta we yu stap lukaot long olgeta, mo lukaotem blong save olsem wanem blong help. Prea from olgeta mo yusum nem blong olgeta, semmak olsem we Sevya i bin givhan long “wan afta narawan” (3 Nifae 11:15).
-
Tekem taem blong luklukgud insaed long ol skripja, mo faenem speseli ol gudfala eksampol blong lidasip, speseli hemia we i kam stret long Sevya.
-
Prea from wod, stek, mo ol jeneral lida blong Jos. Prea tu from ol gavman lida, blong oli save kasem insperesen mo blong oli wok wetem spirit blong pis mo yuniti.
-
Kam blong save gud olgeta we oli stap raonabaot long yu. Faenemaot abaot ol intres blong olgeta, ol famli blong olgeta, ol stadi blong olgeta, mo wanem oli wantem mo wanem i impoten long hat blong olgeta mo long laef (luk long Efesas 2:19).
-
Ridim petriakel blesing blong yu mo tingting hevi long wei we yu save kam gud moa long fasin blong yu.
Taem yumi stap mekem bes blong yumi blong lidim man long stret mo gud fasin, bae yumi kam ol tru disaepol mo ol tru man blong folem Jisas Kraes, mo bambae yumi kwalifae blong gat kampani blong Tabu Spirit i stap wetem yumi. Taem yumi stap mekem mo givim ona long ol tabu kavenan blong yumi, bae yumi gat raet blong rere inaf mo kasem klos blong faet long saed blong spirit, blong go faet agensem enemi.
Yu Save Stat Naoia
?Bae yu yu kam wanem kaen lida? O, blong talem toktok blong Sevya: “?Yufala i mas kam ol wanem kaen man?” I tru mi talem long yufala, i olsem we mi stap.” (3 Nifae 27:27).
Taem yumi stap kam kolosap long Seken Kaming, Lod bae i nidim moa lida we oli stret mo gud, we bambae oli folem profet blong Hem, mo bae oli joen long faet ia. Hem i nidim yumi. Yumi stap long namba 11 aoa, mo yumi gat fulap wok blong mekem. Yumi save stat blong rere blong kam wan nambawan jeneresen blong ol lida naoia. !Hem i neva let tumas blong stat! Sapos i gat sam samting we yu nidim blong tokbaot wetem bisop blong yu, hem i save helpem yu long rod ia blong fasin blong sakem sin. Sapos yu nidim blong kasem ol toksave naoia long wei we bae yu kam antap gud moa, stat blong mekem rilesensip blong yu wetem Papa long Heven mo Jisas Kraes, i kam antap moa; Tufala i save soem long yu weaples blong go long hem stat long ples we yu stap long hem naoia. Yu mo mi, oli singaotem yumitu naoia blong mekem wok blong Lod mo blong helpem profet blong yumi blong lidim haos blong Isrel i go long sef ples, mo sapos yumi traem bes blong yumi nomo, bae yumi kasem.