?Wanem nao bae yu talem long ol fren blong yu taem oli no biliv se Fas Visen ia i save hapen?

Wetem ol kwestin long saed blong spirit, yumi no nidim samting we i mekem sens nomo; yumi nidim tu blong gat fet blong save se Fas Visen i save hapen. Yumi save developem fet ia taem yumi stap askem Papa long Heven mo stap lisin long Spirit.

Askem ol fren blong stadi long Baebol. Sapos oli bilivim se hem i tok blong God, oli mas biliv se God i stap toktok long yumi tedei tru long ol visen olsem Fas Visen, from se Hem i bin mekem semmak wetem Adam, Moses, Aesea, mo ol nara profet long fulap defren wei.

Apostasi i stap blong handred yia i no minim se God i stop wetem ol visen blong Hem. Yumi nid blong gat wan hat we i stap daon mo askem God wetem tru tingting mo hat, olsem we Josef Smit i bin mekem.

Mi stap askem ol fren blong mi, “?Yu biliv long God?” ?Yu yu biliv se Hem i krietem evri samting? ?Yu yu biliv se Hem i bin kamaot long ol profet blong bifo? Sapos yu biliv, ?from wanem yu no save bilivim se i posibol naoia? I posibol.”

Mi serem testemoni blong mi wetem ol fren blong mi se Papa long Heven i stap soem ol samting long ol pikinini blong Hem taem oli askem Hem wetem wan tru hat blong save trutok. Josef Smit i bin wantem blong save trutok, mo hem i bin mekem folem fet blong hem. Yu save enjoem wan gudfala eksperiens sapos yu askem Papa long Heven long prea wetem ful hat blong yu.