Dijitol Nomo
?Wanem Yu Bin Mekem Bifo I Stap Stopem Yu Blong Muv I Go Fored?
Sevya i pem praes blong sin finis. Tekem han blong Hem mo gohed blong muv i go fored.
Sam taem i pas, bisop blong mi i invaetem wod blong mifala blong tingbaot sam wiknes o sin we mifala i save lego long tebol blong sakramen, blong Jisas Kraes i karemaot. I gat sam sin we mi karem wetem mi truaot long yang adalt laef blong mi we mi stap traem blong winim be mi no save winim tru long prea o long paoa blong miwan. I nomata long hamas mi bin stap gro tru long ol yia we oli bin pas, mi bin save se mi nidim blong winim ol samting ia blong save gohed blong progres.
Long Sandei ia afta long jalenj we bisop i givim, mi disaed se bae mi lego wan long ol sin blong mi long tebol blong sakramen, wan samting we i ripresentem Sevya mo sakrifaes blong Hem, we i pem praes from sin. Taem mi stap rere blong tekem sakramen, mi tingbaot kaliko we i kavremap tebol blong sakramen, we i ripresentem kaliko we oli berem Hem [Jisas Kraes] long hem, mo bred mo wota i ripresentem bodi mo blad blong Hem.
Wetem wan strong mo ful stamba tingting long hat, mi riniu ol kavenan we mi mekem long taem blong baptaes blong mi, mo talem wan prea long hat blong mi, we mi askem help long Papa long Heven mo mekem wan komitmen blong lego sin ia biaen. Wan samting i hapen, mo mi ting se bae i neva hapen: strong tingting blong mi blong mekem sin ia i lego mi fulwan. Mi traem hemia sam moa taem bakegen, mo sem samting i bin hapen wetem ol nara sin. ?Hem i gud tumas blong i tru oltaem?
Blong Stretem Ful Tingting blong Mi wetem Hemia blong Hem.
Nekis wik, mi bin save wanem sin mi wantem lego long tebol blong sakramen, be mi filim se mi no rere blong lego sin ia yet. Taem mi bin lukluk i gobak, mi luk save se hat blong mi i no bin stap long ples we i nid blong i stap long hem. Mi no bin tingting strong inaf blong mekem jenis ia. Be mi luksave se hamas sin ia i mekem Papa long Heven i harem nogud. Mi bin save se mi nid blong stretem tingting blong mi wetem tingting blong Hem mo mekem Hem i senta raon long laef blong mi, blong mekem mi mi fri. Mekem se mi traem bes blong mi blong mekem hemia i kam tru.
Mi traem blong no letem eni temtesen we bae i save lidim mi i go long sin ia. Mi jenisim hao nao mi ridim olgeta skripja evri dei mo tingting hevi long olgeta mo praktisim olgeta long laef blong mi. Mi lukluk nomo blong stap tru long komitmen ia blong jenis, mo lukaot evri dei blong lukaotem tingting blong Lod be i no hemia blong mi. Mi putum Hem i kam faswan, from se mi save se mi no save lego sin ia biaen sapos mi no yusum paoa blong Atonmen blong Sevya. Taem mi bin gohed blong putum Hem i faswan, mi bin save putum sin ia long tebol blong sakramen. Naoia mi fri long samting we i holemtaet mi blong plante yia.
Tru long rod ia, mi kam moa kolosap long Papa long Heven mo Sevya blong mi. Mi stap pikjarem Tufala we Tufala i stap lukluk kam daon long mi long ol yia we i pas wetem fasin blong wet longtaem mo lav—we oli save se, bae long en, mi lego gud ol sin ia we oli stopem mi blong progres long saed blong spirit. Mo taem mi rere blong blong lego ol sin ia, Jisas Kraes bae i stap blong i leftemap mi—blong tekem han blong mi, mo givim mi fogivnes mo paoa. Hem i givim finis wan wei blong mi kam fri long ol sin blong mi tru long Atonmen blong Hem. Hem i bin pem praes from ol wiknes, mistek, mo ol sin blong mi. Mi jes nidim blong mi trastem Hem.
Yu Save Muv I Go Fored
Long taem ia, mi ridim sam toktok blong Elda Richard G. Scott (1928–2015) blong Kworom blong Olgeta Twelef Aposol we i pusum mi, olsem we mi bin nidim: “Sapos laef blong yu i konfius mo yu filim se yu no gat kamfot mo no stap klin inaf … , no wari. Hem i save ol samting ia finis. Hem i stap wet long yu blong nildaon wetem wan tingting we i stap daon mo tekem ol fas step ia. Prea from paoa. … Prea se lav blong Sevya bae i fulumap hat blong yu.”1
Taem mifala i singsing “Mi Sapraes Tumas” (wan fevret hym blong mi) long nekis wik blong hem, wanwan toktok ia i ring tru; mi sapraes tumas—long wanem samting we mi traehad wetem blong plante yia we oli tekem mi aot long hem. Long taem ia tru long paoa blong Atonmen blong Sevya, mi bin save muv i go fored. Mekem se Hem i save hilim ol sin mo soa mo no lego wan mak i stap. Mo i nomo nid blong mi holemtaet wanem mi bin mekem bifo.
Mi gat fulap blong lanem mo blong winim, be laef blong mi stap muv i go. Mi filim moa glad mo pis. Mi talem tangkyu moa. Mi stap kam moa kolosap long mo mekem testemoni blong mi abaot Papa long Heven mo Sevya i kam moa strong. Evri dei mi jusum blong traem bakegen, mi kam wan step kolosap moa long Tufala mo man ia we Oli save se mi save kam olsem.