Moa Impoten Bitim Wan Silva Breslet

Pikja

bracelet

Droing i kam long Emily Lui

Taem oli bin askem mi blong mi lidim wan toktok storian insaed long Rilif Sosaeti abaot invitesen blong Sevya blong fidim ol sipsip blong Hem, mi bin disaed se, sapos mi wantem pusum tingting blong ol sista, bae mi mas mekem wan samting blong wan long ol sipsip blong Hem.

Mi pulum gud win mo tekem ful paoa long tingting blong mi, mo mi invaetem wan lesaktiv sista blong kam long Rilif Sosaeti aktiviti wetem mi. Hem i akseptem invitesen blong mi, mo mitufala i gat wan gudfala taem. Mi bin filim se hemia i bin wan gudfala eksampol, mo mi bin wantem tumas blong serem eksperiens blong mi. Be Lod i bin gat plante moa blong tijim mi.

Wan moning, taem mi stap dresap, mi luksave se silva breslet blong mi i lus. Breslet ia, oli bin presen long mi long bondei blong mi taem mi bin visitim Franis, mekem se hem i gat spesel mining long mi. Mi stat blong lukaotem breslet ia long evri ples we mi ting se i stap long hem, be mi no save faenem. Afta, mi talem long miwan se, sapos mi prea nomo, bae mi save faenem breslet blong mi kwiktaem.

Afta we mi prea, mi lukaotem long evri ples. Blong tu dei, mi bin prea strong mo mi lukaot we mi lukaot. Mi plis long Papa long Heven blong Hem i helpem mi blong faenem, be stil, mi no save faenem. Hat blong mi i bin hevi, from se breslet ia i impoten tumas long mi.

Wan naet, boe blong mi i bin prea wetem mi long saed blong bed blong mi. Afta long prea, hem i pikimap wan samting mo i givim long mi. !Hem i breslet blong mi! Hem i faenem i stap andanit long bed blong mi. Ating mi mestem taem mi bin stap lukaotem. Mi krae from mi glad we mi faenem breslet ia bakegen.

Kwiktaem, wan tingting i kam long mi: “?Yu yu stap prea strong olsem from ol sista blong yu long Jos? ?Olgeta oli impoten olsem breslet blong yu? ?Olsem wanem long ol sista blong yu aotsaed long Jos? ?Yu yu bin prea from olgeta tu?

Taem mi bin serem eksperiens abaot breslet blong mi we i lus insaed long Rilif Sosaeti, mifala i bin gat wan naesfala tok storian. Mi bin talem long ol sista se mi bin lanem se, taem Sevya i askem yumi blong fidim ol sipsip blong Hem, yumi mas tingbaot se “praes blong wan sol i bigwan long ae blong God” (Doktrin mo Ol Kavenan 18:10). Hem i wantem yumi blong yumi gat tingting long olgeta we oli stap raon long yumi, mo blong yumi mas lavem, tekem kea, mo prea from olgeta wetem ful paoa blong bodi blong yumi. Taem yumi stap mekem olsem, bambae yumi faenem se evriwan i impoten moa evriwan bitim eni silva breslet.