Yut
Foto i kam long Leslie Nilsson.
Mi mi konvet i kam long Jos. Wan long ol samting we i pulum mi faswan hem i ol yut aktiviti. Kasem naoia, mi laekem yet blong spendem taem wetem ol fren long Jos we oli gat gudtaem we i leftemap tingting. Mi laekem blong go speseli long Suva Fiji Tempol wetem olgeta evri wik.
Long Fiji, i gat fulap fos we i kam long ol fren. Ol stoa oli no stap askem tumas aedentiti blong pem alkol, sigaret, mo ol nara samting olsem. Ol pikinini oli stap pem oltaem nomo. I save had blong jusum raet.
Wan long ol samting we kipim mi strong, hem i ol yangfala brata mo sista blong mi. Mi mi olfala long olgeta evriwan, mekem se mi stap tingbaot olgeta evri taem mi kasem temtesen blong mekem wan rong samting. Mi no wantem olgeta blong mekem ol nogud desisen from oli luk mi mekem wan samting fastaem. Bifo mama blong mi i ded, hem i mekem mi promes blong lukaotem ol brata mo sista blong mi, mo blong oltaem stap blong helpem olgeta.
Miwan nomo mi memba blong Jos aot long ol brata mo sista blong mi. Be mi prea from olgeta evri dei. Mi talem tangkyu long Papa long Heven blong stap givim olgeta wan nara dei blong laef, mo mi prea se bae oli kasem save ia blong gospel blong Hem. Olgeta i mekem mi stap strong.
Mikayla J., 17 yia, Fiji