Kam Folem Mi: Buk blong Momon
?Ista I Minim Wanem long Mi?
30 Maj–12 Epril Ista
Long Ista, yumi stap selebretem “dei ia we i moa impoten long histri”1—Laef Bakegen long Ded blong Sevya blong yumi, Jisas Kraes. Taem ia, i wan stamba taem long plan blong Papa long Heven, we i plan blong stap glad.
Long laef bifo laef long wol ia, oli bin jusum Jisas Kraes blong i kam Sevya blong yumi. Hem i bin promesem yumi blong putum wan rod i stap blong yumi kasem fogivnes from ol sin blong yumi, mo blong yumi gobak long hom blong yumi long Heven.
Long fas Ista moning ia, Jisas i bin mekem promes blong Hem i kamtru. Hem i bin winim ded. Olsem wan risal, “Hem i laet mo laef blong wol; yes, wan laet we i no gat en, we i no save kam tudak; yes, mo tu, wan laef we i no gat en, mekem se i nomo save gat ded” (Mosaea 16:9).
?Wanem blesing nao Laef Bakegen long Ded i tekem i kam long yu?
Fasin blong sakem sin
Jisas i askem long wanwan long yumi: “?Bae yufala i no kambak long mi, mo sakem ol sin blong yufala, mo jenisim laef blong yufala blong mi save hilim yufala?” Hem i promesem: “eni man we bae i kam, hem bae mi akseptem” (3 Nifae 9:13–14). ?Yu harem olsem wanem taem yu sakem sin?
Laef Bakegen long Ded
Yumi no save ronwe long ded, be viktri blong Sevya ova long ded i meksua se, evriwan, bae i laef bakegen long ded—bodi mo spirit i joen wan moa taem i kam stret evriwan (luk long Alma 11:43). ?Olsem wanem nao we taem yu save abaot Laef Bakegen long Ded, hem i givim hop long yu?
Laef we I No Save Finis
Atonmen blong Sevya i mekem se i posibol blong gat laef we i no save finis, o blong kam olsem wan god. Blong kasem blesing ia, yumi mas obei long olgeta komanmen. Presiden Russell M. Nelson i singaotem rod ia we i go long laef we i no save finis, “kavenan rod ia.”2 ?Wanem nao yumi save mekem blong folem rod ia we i go long laef we i no save finis?