Vuli mai na iTukutuku ni Koniferedi Raraba

Na nodra ivakavuvuli na parofita bula kei ira eso tale na iliuliu ni Lotu raraba era sa vakarautaka na veidusimaki veivakauqeti ni da vakasaqara meda vakaitavi ena cakacaka ni Turaga. Ena ikarua kei na ikava ni Sigatabu ni veivula, era na digitaka na mataveiliutaki ni kuoramu ni italatala qase kei na iSoqosoqo ni Veivukei e dua na itukutuku ni koniferedi me veivosakitaki, e yavutaki ena nodra gagadre na lewenilotu kei na veidusimaki ni Yalotabu. Ena so na gauna, ena dau rawa ni vakatura talega o bisopi se peresitedi ni iteki e dua na itukutuku. Vakararaba, e dodonu mera dau vakabibitaka na iliuliu na itukutuku maivei iratou na lewe ni Mataveiliutaki Taumada kei na Kuoramu ni iApositollo Le Tinikarua. Ia, sa rawa me veivosakitaki e dua ga na itukutuku mai na koniferedi se qai oti ga.

E dodonu mera vakasaqara na iliuliu na sala mera vakayaloqaqataki kina na lewenilotu mera wilika na itukutuku digitaki eso ni bera na soqoni.

Me baleta na itukutuku tale eso me baleta na soqoni ni kuoramu ni italatala qase kei na iSoqosoqo ni Veivukei, raica na iVolavakarau Raraba: Veiqaravi ena Lotu i Jisu Karisito ni Yalododonu Edaidai, 8.2.1.2, 9.2.1.2, ChurchofJesusChrist.org.

Vakavakarau mo Veivakavulici

Na taro eso oqo e rawa ni vukei ira na qasenivuli ni ra tuvanaka mera vakayagataka e dua na itukutuku ni koniferedi raraba mera vakavulica.

Na cava e vinakata vei keda o koya e vosa meda kila vinaka? Na ivakavuvuli cava ni kosipeli e vakavulica tiko o koya? Ena vakayagataki vakacava na ivakavuvuli oqo ena noda kuoramu se iSoqosoqo ni Veivukei?
Na ivolanikalou cava a vakayagataka o koya me tokona na nona itukutuku? E tiko beka eso tale na ivolanikalou eda rawa ni wilika ka na vakatitobutaka na noda kila? (O na rawa ni kunea eso ena idusidusi e ra ni itukutuku se ena Topical Guide.)
Na taro cava eso ena rawa ni vukei ira na lewenilotu mera vakasamataka vakatitobu na itukutuku? Na taro cava eso ena vukei ira mera raica na yaga ni itukutuku ena nodra bula, ena nodra matavuvale, kei na cakacaka ni Turaga?
Na cava beka au rawa ni cakava me sureta na Yalotabu ki na noda soqoni? Na cava au rawa ni vakayagataka me vakavinakataka cake na veivosaki, oka kina na italanoa, vosa vakatautauvata, sere kei na ivakatagi, kei na cakacaka ni liga? Na cava a vakayagataka o koya e vosa?
A solia beka eso na veisureti o koya? Au na vukei ira vakacava na lewenilotu mera gadreva mera cakacakataka na veisureti o ya?

Vakasama ni iTaviqaravi

E vuqa tu na sala mera vukei kina na lewenilotu mera vuli mai na itukutuku ni koniferedi raraba. Oqo e vica na kena ivakaraitaki; ena tiko beka eso tale na nomu vakasama ena cakacaka vakavinaka cake ena nomu kuoramu se iSoqosoqo ni Veivukei.

Veivosaki vakailawalawa. Wasea vakailawalawa lalai na lewenilotu, ka lesia ki na ilawalawa yadua e dua na iwasewase duidui ni itukutuku ni koniferedi mera wilika ka veivosakitaka. Mera qai kerei na ilawalawa yadua me wasea e dua na dina era sa vulica. Se mo tuvai ira vata na ilawalawa tamata era sa vulica na iwasewase duidui eso ka mera qai wasea vakai ira na veika era sa vulica.
Sauma na taro. Sureta na lewe ni kalasi mera sauma na taro me vaka na kena oqo me baleta na itukutuku ni koniferedi: Na dina cava ni kosipeli eda kunea ena itukutuku oqo? Eda na bulataka vakacava na dina oqo? Na veisureti kei na veivakalougatataki yalataki cava so a soli mai? Na cava e vakavulica vei keda na itukutuku oqo me baleta na cakacaka e gadreva na Kalou meda cakava?
Wasea na qaqanivosa eso. Sureti ira lewenilotu mera wasea eso na qaqanivosa mai na itukutuku ni koniferedi e vakauqeti ira me ra vakayacora na nodra itavi ena cakacaka ni veivakabulai. Vakayaloqaqataki ira mera raica na sala e rawa ni ra wasea kina na qaqanivosa oqo mera vakalougatataka kina e dua, oka kina o ira era daulomana kei ira era veiqaravi vei ira.
Wasea e dua na lesoni ivakaraitaki. Tataunaka ki na vica na lewenilotu mera na kauta tiko mai eso na iyaya mai vale mera na mai vakayagataka mera vakavulica kina na itukutuku ni koniferedi. Ena gauna ni soqoni, kerei ira me ra vakamacalataka na kena semati na veiyaya o ya ki na itukutuku.
Vakarautaka e dua na lesoni me vakavulici e vale. Kerei ira na lewenilotu mera cakacaka yarurua mera tuva e dua na lesoni ni lotu ni matavuvale e yavutaki ena itukutuku ni koniferedi. Eda na cakava vakacava me yaga na itukutuku ki na noda matavuvale? Eda na wasea vakacava na itukutuku oqo vei ira na tamata eda veiqaravi vei ira?
Wasea na veika sotavi. Wilika vata e vica na qaqanivosa mai na itukutuku ni koniferedi. Kerei ira na lewenilotu mera wasea na ivakaraitaki mai na ivolanikalou kei na nodra bula e vakaraitaka se vaqaqacotaka na ivunau e vakavulici tiko ena veiqaqanivosa oqo.
Vulica e dua na tiki ni ivolanikalou. Sureti ira na lewenilotu mera wilika a dua na ivolanikalou e tukuni tiko ena itukutuku ni koniferedi. Kerei ira mera veivosakitaka na sala ena vukei ira kina na ivakavuvuli ena itukutuku mera kila vinaka cake na ivolanikalou oya.
Kunea e dua na isaunitaro Ni bera na soqoni,cakava rawa e vica na taro ena rawa ni saumi ena kena vakayagataki na itukutuku ni koniferedi. Vakanamata ki na taro ena vakavurea na vakasama vakatitobu se na kena vakayagataki na ivakavuvuli ni kosipeli (raica na Veivakavulici ena iVakarau ni iVakabula, [2016], 31–32). Mera qai digitaka na lewenilotu e dua na taro ka vakaraica na kena isau ena itukutuku. Sureti ira mera veivosakitaka vakailawalawa lalai na nodra isaunitaro.
Vakaraica e dua na malanivosa. Sureti ira mera vakasaqaqara ena itukutuku ni koniferedi, ka vakaraica na malanivosa eso e vakaibalebale vei ira. Kerei ira me ra wasea na veimalanivosa kei na cava era sa vulica mai kina. E vukei keda vakacava na ivakavuvuli oqo meda rawata kina na cakacaka ni Turaga?
Bulia e dua na ka. Sureti ira na lewenilotu mera cakava e dua na ivolakabi se ivakatakilakila ni wilivola e okati kina e dua na ivakamacala lekaleka veivakauqeti mai na itukutuku ni koniferedi. Solia vei ira na madigi me ra wasea na veika era sa cakava.

Me ikuri ni vakasama ni vuli kei na veivakavulici mai na itukutuku ni koniferedi raraba, raica na “Vakasama ni Vuli kei na Veivakavulici mai na Koniferedi Raraba” e kune ena Koniferedi Raraba ena Valenivola ni Kosipeli.