Amy A. Wright

Ena lima na yabaki sa oti, a kunei vei Sisita Amy A. Wright na 4 ni ivakatagedegede 4 ni kenisa ni katonigone. Na sala duadua ga eratou lako curuma kina na nona matavuvale mai na veiqaravi dredre vakavuniwai, e kaya o koya, sa ikoya na nodratou vakanamata vua na iVakabula o Jisu Karisito.

“Niu vakanamata duadua vei au, e dau vanua butobuto sara na vuravura,” a nanuma lesu o koya. “Ia ni sa vakanamata yani na noqu rai ki tuba, niu saga meu qaravi ira na tani ka lako ena sala a lako kina na Karisito, a rarama ka reki, ena gauna sara mada ga ni mosi kei na rarawa levu duadua.”

E vakamacalataka o Sister Wright na nona valuta tiko na kenisa me dua na gauna “veivakatatibitaki ka veivakasavasavataki”—e mai “vakatabakiduataki duadua vua” me vukea nona mai kila na iVakabula ena sala titobu duadua. E vakavulica talega vua ni ikuri ni kaukauwa e yaco mai ena noda vakasaqara me vulici ka kilai na veimataqali bolebole duidui tale eso.

“Eda veiqaravi kece ena veitiki ni nona were ni vaini na Turaga ena veigauna duidui eso ni noda bula. Ia na were-ni-vaini vata ga kei na iVakavuvuli vata ga,” a kaya.

“Sa tautauvata talega na noda inuinui, sa ikoya na bula tawamudu kei na bula vakacerecerei. Oqori na ka eda gadreva vei ira kece na gonelalai vakamareqeti oqo, ni na tiki ni nodra ilakolako na iVakabula, ka ra na lesu tale ki vale ki Vua.”

A sucu o Amy Eileen Anderson Wright ena 6 ni Janueri, 1972, e Salt Lake City, Utah, Amerika, vei rau o Robert kei Joy Anderson. A vakamautaki James McConkie Wright ena 1994 ena Valetabu e Salt Lake. E tolu na luvedrau.

A taurivola ena koroi ni vakatorocaketaki ni tamata kei na vuli vakamatavuvale mai na University of Utah ena 1998. A cakacaka vakaqasenivuli kei na manidia ni valenivolavola ka dau volodia ni iSoqosoqo ni Qasenivuli kei na iTubutubu. Ena dua na gauna wale toka ga oqo a veivuke ena volivolitaki kei na kacivaka tiko e dua na valenivolavola ni bati.

Sa veiqaravi oti o Sister Wright ena matabose raraba ni veivakasalataki ni Goneyalewa mai na 2018. Na veikacivi taumada e oka kina na peresitedi ni Lalai ena iteki kei na tabanalevu, daunivakasala ena mataveiliutaki ni Lalai ena tabanalevu, qasenivuli ni iVunau ni Kosipeli, kei na iliuliu ni Cub Scout.