Elder Patricio M. Giuffra

Sa yabaki va o Elder Patricio M. Giuffra ena gauna a mate kina ena kenisa o tamana. Ni se gone, a tubu cake o koya ka vakataroga na Kalou ka vakananuma se cava e sega ni dodonu kina vua na bula.

“O tamaqu e tagane vakawati vinaka, tama, ka dauveivakarautaki,” e nanuma lesu o Elder Giuffra na vakasama. “Na cava na vuna me mate kina?”

Na isaunitaro kei na veiciqomi a yaco ni oti e tini na yabaki ena nodrau sotavi rau na daukaulotu tudei o Patricio kei tinana ka ciqoma na kosipeli.

A solia vua na inuinui na iyavu ni veivakabulai baleta ni a vukei koya me kila vinaka na lolosi ni nona matavuvale. “A vakarautaka o tamaqu e dua na sala me keirau lewena kina na Lotu,” e kaya o koya.

Mai na gauna a papitaiso kina, sa yavutaka na bula nei Elder Giuffra na kosipeli i Jisu Karisito. “Sa noqu bula na Lotu,” e kaya o koya. “Au vakila niu dau lewena tu ga na Lotu.”

E dua na gauna talei a yaco ena 1989 ena gauna a vauci kina o Elder Giuffra vei rau nona itubutubu kei iratou na tacina sa mate ena Valetabu e Ogden Utah. Ni oti na cakacaka vakalotu, a vakasolokakana o tinana, “Au a vakila na yaloi tamamu.”

A sucu o Patricio Mauricio Giuffra Vargas mai Valparaíso, Chile, ena 6 ni Epereli, 1962, vei rau o Lazaro Dante Giuffra Riffo kei Olga Rosa Vargas Canales. A tubu cake mai Valparaíso, Chile, ka vakamautaki Maria Eugenia Gonzalez Olmos ena Valetabu e Santiago Chile ena 1992. E va na luvedrau.

A rawata o Elder Giuffra e dua na diqiri ni bejila ena daunimaketetaki ni bisinisi kei na vakavakadewa volai kei na vosataki mai na Brigham Young University ena 1990 kei na masters ni veiliutaki vakabisinisi mai BYU ena 1994.

A cakacaka vaka-manidia ni volivoli vei Woodgrain Millwork (1994–96), manidia ni volivolitaki kei na manidia ni cakacaka vei Alvenius Chilena (1996–98), kei na manidia raraba ena Carbotech Chile (1998–99) kei Arcotex SA (2000 me yacova mai oqo).

Sa veiqaravi oti o Elder Giuffra vakadaukaulotu tudei ena Tabana ni Kaulotu e Chile Osorno, sekeriteri liu ni iteki, peresitedi ni Cauravou ena iteki, bisopi, ka peresitedi ni iteki. Ni bera ni kacivi me Vakaitutu Raraba ena Vitusagavulu, a veiqaravi voli vaka-Vitusagavulu ni iWasewase ena Ceva kei Amerika.