Elder Clark G. Gilbert

E vuqa era kilai Elder Clark G. Gilbert me peresitedi ni BYU–Pathway Worldwide ka peresitedi e liu ni Brigham Young University–Idaho. E vuqa talega era kilai koya ena nona vakatorocaketaka na veivakauqeti ni parokaramu ni vuli torocake ena initaneti ena vanua ruarua oqo.

E vakaibalebale vakalevu nona veiqaravi vaka-Lotu o Elder Clark—nona vukei ira na cauravou ena loma ni koro levu o Boston, Massachusetts, Amerika—ena nona vakarautaki koya me taura na veimadigi vakavuli kivei ira na ivavakoso levu cake. A yaco mai na madigi ni veiqaravi ni sa osooso tiko ena koronivuli torocake ni Masters ka qarava tiko e dua na matavuvale gone.

“O ira na cauravou oqori e sega ni ra dau tokoni vakalevu. Sa yaco me tiki ni neitou bula, ka keitou sa tubu me keitou lomani ira,“ e kaya o koya. “Au a vulica meu vakarorogo vua na Turaga ka kila ni sa tiko o Koya ena nodra bula. Au rawa ni rogoci Koya ni tukuna vei au na ka au gadreva meu cakava ena vukudra.”

E kaya o Elder Gilbert ni a vakavulici koya na Turaga me baleta na nodra gagadre na tamata tale eso. “E sega walega ni vakarautaki au o Koya meu vuli, ia a vakaraitaka vei au o Koya na ka e rawa ni cakava ena nodra bula na tamata ena dua na ivakatagedegede titobu.”

A sucu o Clark Gordon Gilbert e Oakland, California e Amerika, ena 18 ni June, 1970, vei rau o Paula kei Susan Gilbert. A tubucake mai Phoenix, Arizona e Amerika. Ni oti nona veiqaravi ena Tabana ni Kaulotu e Kobe Japan, a vakamautaki Christine Calder ena 1994 ena Valetabu e Salt Lake. E walu na luvedrau.

A rawata o Elder Gilbert na bejila ni veiwekani e vuravura ena 1994 mai na Brigham Young University, e dua na koroi ni masters ena vuli vaka-Esia ena 1995 mai na Stanford University , kei na koroi na doctor ni veiliutaki vakabisinisi ena 2001 mai na Harvard Univesity. A cakacaka vaka-ivukevuke ni parofesa ena Harvard Business School, ivukevuke ni peresitedi vakavuli e BYU–Idaho, ka peresitedi kei na vakailesilesi liu ni Deseret News kei na Deseret Digital Media.

E dua na Vitusagavulu ni iWasewase ena gauna e kacivi kina, sa veiqaravi oti o Elder Gilbert vaka-peresitedi ni kuoramu ni italatala qase, daunivakasala ena mataveiliutaki ni Cauravou ena iteki kei na mataveiliutaki ni iteki, kei na bisopi.