Elder Michael A. Dunn

Rau a veisere na itubutubu nei Elder Michael A. Dunn ni se gone lailai, ia ni susugi koya cake o tinana, a vakauqeta vua na vakabauta kaukauwa kei na yavunilewa. Ni oti nona vuli ena dua na koronivuli vaka Episcopal mai Salt Lake City, Utah, Amerika, a laki toki ki na dua na koronivuli torocake raraba, ka sotavi ira kina na lewe ni Lotu i Jisu Karisito ni Yalododonu Edaidai.

Ni ra kidavaki koya mai na nona itokani vou kei rau na nona itubutubu, a gadreva o Michael me vulica na veika me baleta na Lotu. Sa mani nanuma me sa sota vata kei rau na daukaulotu. Na nodrau ivakavuvuli me baleta na Lewetolu Vakalou kei na iMatai ni Raivotu nei Josefa Simici e “tarai koya sara vakaukauwa,” e kaya o koya.

Mai na masumasu e kila o koya ni dina na kosipeli ka papitaisotaki ena nona otioti ni yabaki ni vuli torocake. Mai na gauna oya, e vakalici ka vakauqeti o Elder Dunn “mai vei ira na iyatu iliuliu vakasakiti.”

E vakadinadinataka talega o koya na nodrau veivakarautaki na Tamada Vakalomalagi kei na iVakabula ena nona bula taucoko. “O au e dua na dauvakabauta,” e kaya o Elder Dunn. “Au kalougata niu sa vakadinadinataki Jisu Karisito ka vunautaka na Nona bula, Nona vinaka, Nona kosipeli vakalesui mai nikua.”

A sucu o Michael Austin Dunn ena ika 5 ni Maji, 1958, vei rau o Patricia kei James R. Dunn e Tucson, Arizona, Amerika. A tubu cake e Salt Lake City. Ni oti nona veiqaravi vakadaukaulotu tudei ena Tabana ni Kaulotu na Hawaii Honolulu, a vakamautaki Linda Virginia Poulson ena 1980 ena Valetabu e Salt Lake. E tolu na luvedrau.

A rawata o Elder Dunn e dua na koroi ni bejila ena veitaratara ena 1981 kei na dua na koroi ni masters ena veitaratara ena 2008, mai na Univesiti e Utah. O koya na manidia raraba ni KUED (PBS Utah), na peresitedi ni Dunn Communications Inc., kei na dua na manidia dairekita ni BYUtv kei na BYU Radio.

O Elder Dunn, ka a veiqaravi voli vaka-Vitusagavulu ni iWasewase ena gauna e kacivi kina, a veiqaravi oti vakabisopi, daunivakasala ena matabisopi, peresitedi ni iteki, peresitedi ni Cauravou ena tabanalevu, lewe ni matabose e cake, ka peresitedi ni tabana ni kaulotu na South Africa Johannesburg Mission mai na 2014 ki na 2017.