Kam Folem Mi
Stap Harem abaot ol tri Digri blong Glori blong Fas Taem
5–11 Julae
Seksen 76 blong Doktrin mo Ol Kavenan i talemaot ol impoten pat blong fasin blong sevem man we i bin lus long wol long taem blong Apostasi. Long plante pipol, blong stap lanem ol trutok we oli kambak blong fas taem, i wan eksperiens we bae oli tingbaot oltaem. Hemia i storian blong Connie, wan konvet blong Richmond, Vijinia, YSA.
Hem i tokbaot: “Mi bin oltaem luk lav blong God taem mi ridim Baebol, be mi no save faenem eni jos we i tijim olsem we mi andastanem. Taem mi kasem ol lesen blong misinari long saed blong plan blong fasin blong sevem man, mi filim se i bin ansarem fulap kwestin blong mi mo mi filim wan pis we mi bin neva filim bifo. Mi tingting long miwan se: ‘Hemia i Papa long Heven we mi save.’ Blong stap lanem abaot ol digri blong glori i openem tingting blong mi i kam moa bigwan mekem se i had blong mi holemtaet glad blong mi blong lanem moa.”
Delphine, wan konvet blong Paris, Franis, i gat wan had famli situesen we i mekem se taem ol misinari oli tijim hem se ol famli oli save laef tugeta long selestial kingdom, hem i no sua se hem i wantem hemia. Be taem ol misinari oli gohed blong tijim hem abaot ol tri digri blong glori, hem i kasem kamfot. Hem i lanem se, bae hem i stap wetem olgeta we hem i lavem we oli jusum blong folem gospel. Wetem wan moa gud save long saed blong plan blong fasin blong sevem man, hem i talem, “Mi faenem se hem i moa stret, mo hemia i givim hop long mi.”