Olsem Wanem Yumi Save Tokbaot Abius
Hemia i sam tingting blong ol viktim blong abius, ol Jos lida blong olgeta, mo ol famli blong olgeta
Sevya i tok strong abaot abius: “Be sipos wan man i mekem wan long ol pikinini ia we oli bilif long mi i foldaon long sin. Sipos oli fasem wan bigfala ston long nek blong hem, nao oli draonem hem long medel solwota, hemia i moa gud long hem.” (Matiu 18:6; luk tu long Mak 9:42; Luk 17:2).
Abius, i taem oli tritim nogud, o taem we oli tingting nating long narawan (olsem wan pikinini, wan waef o hasban, wan we i olfala, o wan we i gat disabiliti) long wan wei we i mekem wan i harem nogud long bodi, filing o long saed blong seks. Ples we Jos i stanap long hem, i we, abius, oli no save akseptem long eni kaen fom.
Ol aedia ia oli save help, nomata se yu yuwan, yu wan viktim blong abius o yu yu lida blong Jos o papa mo mama blong viktim ia.
I Go long Viktim
Olsem wan viktim1 blong abius, bae yu no poenem fingga long yuwan from abius we yu bin eksperiensem, o nidim blong kasem fogivnes from ol aksen we wan narawan i bin mekem agensem yu. Ating yu wantem save olsem wanem Sevya i save help blong hilim yu. Ating yu stap tingting se atonmen blong Sevya i blong olgeta nomo we oli sin mo oli nidim blong sakem sin.
?Olsem wanem nao Sevya i stap helpem yu? From sakrifaes blong Hem, Hem i andastanem. Sevya i gat bigfala sore. Nomata se bae yumi neva save stret olsem wanem we Sevya i bin save filim evri so blong bodi blong yumi, yumi save gat fet se Hem i andastanem, long wan wei we i stret evriwan, long wanwan man, woman, mo pikinini (luk long 2 Nifae 9:21). Hem i save givim pis mo paoa blong muv i go fored.2.
Tru long Atonmen long Hem, Sevya i helpem olgeta we oli bin mekem nogud long olgeta. Hem i save help “taem hem i stap hilim mo pemaot yumi aot long eni safaring we yumi stap go tru long hem nomata se i no rong blong yumi.”3
Nomata wanem taem o olsem wanem man we i mekem nogud long yu i stap akaontebol, yu save “stap sua se Stret Jaj, Jisas Kraes, we i gat wan stret mo gud save long ol ditel, bae i mekem evri man we i stap abius, oli akaontebol from evri aksen blong olgeta we i no stret.”4 Save tu se “olgeta we oli abiusum waef, hasban o pikinini blong olgeta … wan dei, bae oli ansa from aksen blong olgeta, long fored blong God.”5
I Go long Ol Lida blong Jos
Evri Lida mo tija we oli givim seves long ol yut mo ol pikinini, oli mas tekem wan onlaen trening “Stap Protektem Ol Pikinini mo Yut.”6
Wan Jos lida i no mas sakemaot wan ripot blong abius o kaonselem wan memba blong i no ripotem wan kriminol aktiviti.7 Ol lida mo ol memba blong Jos oli mas mekem evri wok long saed blong loa blong mas ripotem abius i go long ol sivil atoriti. Be, ol eria oli gat ol defren loa we oli ripot folem. Sam eria oli askem ofis blong ol pasta blong kontaktem ol man blong loa, be ol nara eria oli no letem hemia.
Hem i impoten blong ol lida blong andastanem se bae ol viktim blong abius, oli gat had taem blong trastem ol narawan—speseli olgeta we oli stap long ol posisen blong atoriti. Situesen ia bae i wan jalenj long saed blong filing samtaem; be hadtaem blong ol viktim blong tokbaot abius blong hem, ating i no konek wetem yuwan long eni wei. Blong miting wetem ol lida yuwan i samtaem mekem ol viktim blong abius oli fraet. Ol viktim oli save invaetem wan adalt we oli trastem blong stap wetem olgeta taem oli mit wetem ol prishud lida.8
Nomata long wanem taem wan man kasem abius, hem i save kasem sapot mo profesenol help. Plante viktim oli kasem hiling moa gud taem ol filing blong olgeta oli luk save, oli filim se oli sef mo gat proteksen, oli filim se wan man i biliv long olgeta, mo oli andastanem olsem wanem abius i bin afektem olgeta. Sapot i save helpem olgeta blong faenem pis mo no filim se oli no stap olgetawan taem oli stap lukaotem blong kasem hiling.9
Stanap agensem abius nomata huia i bin tekpat, i mas stap olsem standet ia nao. Abius i save kam moa series mo i moa nogud long viktim, taem man we i mekem rong i stap long ol posisen blong atoriti mo tras. Olgeta we oli stap long ol posisen we ol man i trastem olgeta, we oli stap abiusum ol narawan, oli nid blong oli stap long wan standet we i moa hae from se oli bin spolem tras blong viktim. Jos i gat wan polisi we i no akseptem abius nating, mo hemia i tru blong olgeta we oli stap long posisen blong tras mo atoriti.
I Go long Ol Papa mo Mama
Nomata we ol stori blong abius i kam long wan man we i gat atoriti i kasem moa lukluk long nius, ol viktim long plante taem oli kasem abius tru long wan we oli save. Man blong abius i save wan famli memba, wan fren o wan neba. Man blong abius i save gat eni yia. I nogat tumas man blong abius we yumi neva save olgeta.10
Be i gat plante saen blong abius we yumi save tijim long ol pikinini blong yumi, blong save helpem olgeta blong luksave mo stap longwe long hem. Tijim ol pikinini blong yu se sapos wan man i askem olgeta blong mekem wan samting we oli save se i rong, oli save talem no. Hemia samfala eksampol long olsem wanem ol man blong abius, oli save fosem, mekem man i fraet, o temtem ol viktim:
-
Man blong abius, oli yusum posisen, atoriti, yia, saes o save blong olgeta blong fosem wan viktim blong mekem wanem oli wantem.
-
Oli talem se oli no wantem blong stap olsem fren blong viktim be nomo, sapos viktim i mekem wanem oli talem.
-
Oli tekem samting mo oli nomo givimbak be nomo, sapos viktim i mekem wanem oli talem.
-
Oli mekem viktim i fraet blong mekem ol giaman toktok abaot viktim be nomo, sapos viktim i agri blong mekem wanem oli talem.
-
Ol givim ol presen, ol janis, o ol nara riwod blong kasem wanem oli wantem.
-
Oli talem long viktim se bae i nogat man bae i lisin long olgeta mo bae oli stap long trabol sapos oli talem long wan man abaot abius ia.
-
Oli mekem viktim i fraet blong mekem nogud long viktim o wan we hem i lavem sapos viktim i no mekem wanem oli talem.11
Stap tokbaot abius i wan situesen we i fasfas. I nogat ol simpol ansa, be yumi save faenem bigfala kamfot long ol toktok blong Elda David A. Bednar blong kworom blong olgeta Twelef Aposol: “I nogat wan so blong bodi, nogat wan so long saed blong spirit, nogat wan harem nogud blong sol o hat i brok, nogat wan siknes o wiknes we yu mo mi bae i fesem long laef ia, we Sevya i no bin eksperiensem faswan. Long wan taem we yumi no strong, yumi save singaot mo talem: ‘I nogat man i save se i olsem wanem. I nogat wan i save andastanem.’ Be, Pikinini blong God i save gud mo i andastanem, from se Hem i bin filim mo tekem ol trabol blong wanwan long yumi. Mo from sakrifaes blong Hem we i nogat limit mo i no save finis (luk long Alma 34:14), Hem i gat stret andastaning mo i save givim long yumi ol han blong sore blong Hem. Hem i save go aot, tajem, helpem, hilim, mo mekem yumi kam strong moa bitim we yumi save kam olsem mo helpem yumi mekem wanem we yumi neva save mekem sapos yumi dipen long paoa blong yumiwan.”12
O Papa blong Mi, i kam long Simon Dewey
Bae yumi tanem yumi i go long Prins blong Pis mo tru long Hem, bae yumi faenem hop mo hiling.