Kam Folem Mi
Stap Winim Wanem I Save Kam Agens
28 Jun–4 Julae.
Pikja i kam long long Dan Burr
Revelesen ia long Doktrin mo Ol Kavenan 71 i stap talem long Josef Smit mo Sidni Rigdon blong go mo prij blong traem karemaot ol nogud filing we oli bin girap agensem Jos from se ol memba we oli bin lusum fet blong olgeta, oli bin stap talem nogud Jos. Ova 100 yia i pas, Elda Spensa W. Kimbol blong Kworom blong Olgeta Twelef Aposol i bin gat wan semmak eksperiens blong stap prij blong protektem Jos.
Visit blong Elda Kimbol i go long Ekuado
Long taem blong wan visit i go long Otavalo, Ekuado, long 1965, Elda Kimbol i talem long ol misinari blong tokbaot Buk blong Momon long Ol man Otavalo. Be, ol misinari oli fesem hadtaem taem Ol Man Otavalo oli stat blong talem ol giaman toktok abaot olgeta long ol vilej kolosap, mo ol misinari oli bin gat hadtaem blong winim ol giaman toktok we oli bin harem.
Tu yia i pas, Elda Kimbol i joenem sam memba mo ol misinari long wan miting kolosap long wan lokol bas stop. Taem ol pipol we oli stap ia oli jiam daon long ol bas, ol misinari oli invaetem olgeta blong lisin long wan Aposol blong Jisas Kraes we i stap laef yet. I no longtaem afta, 20 pipol i stat blong kam tugeta. Taem ol misinari oli statem miting blong olgeta, namba blong ol man we oli kam lisin i kam bigwan moa, i bitim 100.
Afta Elda Kimbol i bin toktok. Hem i talem tu abaot taem we Jisas i bin go long Ol Amerika. Hem i poen i go antap long skae mo tokbaot smol kwaet voes long heven we i anaonsem taem we Pikinini blong God i bin kamkamaot, olsem we yumi save faenem insaed long Buk blong Momon. Elda Kimba:ol i tingtingbak long toktok ia “Evri ae i folem aksen blong mi i go long skae olsem se Sevya i rili stap mo we i stap kam tru long ol tintin klaod.”1
Afta long hemia, ol misinari oli gohed blong traem tijim ol pipol blong Otavalo. Ol sista misinari oli bin tijim wan man we nem blong hem, Rafael Tabango, we i kasem baptaes long 14 Julae, 1968—fasfala man ples blong Otavalo olsem wan Lata-dei Sent. Waef blong hem, Teresa, i joenem Jos tu. Bifo 15 yia afta, oli oganaesem wan stek long Otavalo, mo oli singaotem Brata Tabango olsem fasfala petriak.