Ol Prinsipol blong Wok blong Givhan
Givhan long Olgeta We Oli Gat Ol Helt Jalenj blong Bodi
Yumi save stap olsem ol han blong Sevya blong kamfotem mo helpem.
Sik, nogud long wan kaekae o samting, disabiliti, o yia blong wan man i save afektem hamas wan man i save wosip o givim seves. Sapos ol givhan brata mo givhan sista oli luksave ol nid ia, i gat plante wei blong helpem ol memba we oli gat ol jalenj blong bodi blong oli save stap glad gud long ol blesing blong gospel.
Afta we oli bin tritim wan yang mama from kansa, hem i filim se hem i stap hemwan mo fulap wetem fraet. Be taem nius blong sik blong hem i go aot long ful wod blong hem, kwiktaem ol sista we oli gat lav mo wari oli bin kam kolosap long hem. Taem ol tritmen blong hem we oli had i stat, ol sista oli draevem hem i go long ol apoenmen blong hem mo sidaon wetem hem long ol sesen blong kimoterapi. Oli bin prea wetem hem, leptemap tingting blong hem, karem sam smol kaekae we hem i save kaekae, mo karem ol kaekae i go long famli blong hem evri wik. Ol nara sista, oli tekemaot taem long ol bisi laef blong olgeta blong klinim haos blong hem. Wan sista i bin save se sam tritmen bae i mekem i had blong slip, mekem se hem i mekem ol plan blong go visit let long naet blong wajem ol fani muvi. Yang mama i bin save tanem i gowe long fraet blong smol taem mo filim hiling paoa blong laflaf mo ol fren, be i no blong stap traehad blong silip long naet. Tru long ol givhan ia, ol prishud blesing, mo ol livim kaekae blong wod, hem i bin go tru long wan bigfala had taem, mo strong rop blong lav i gro bitwin evriwan we oli bin tekpat.
Givhan long olgeta wetem ol helt jalenj long saed blong bodi i no oltaem isi. Be yumi save folem eksampol blong Sevya blong stap go mo helpem ol brata mo sista blong yumi wetem lav taem ol helt jalenj ia oli hapen. Yumi save stap olsem ol han blong Hem blong kamfotem mo helpem olgeta raon long yumi, mo tekem tu, olgeta we ol jalenj blong olgeta yumi no save luk wetem ol ae blong yumi.
Ol Aedia blong Tingbaot.
1. Respektem praevet laef blong olgeta. Sam pipol oli sem abaot ol ol helt jalenj blong olgeta we ating bae i no impoten tumas long yu. Oltaem askem olgeta sapos i ORAET blong serem situesen blong olgeta long ol narawan bifo yu mekem.
2. Leftemap tingting blong kasem standet medikol kea. No mas rekomendem ol helt prodak o ol seves we oli no pruvum olgeta o oli stap aotsaed long standet medikol kea. Serem ol tingting mo eksperiens taem yu filim spirit i talem long yu, be leftemap tingting blong ol narawan blong mekem ol stadi blong olgetawan mo askem kaonsel long ol medikol profesenol we oli trenem olgeta.
Ol pikja foto oli kam long Getty Images
3. Givim seves long olgeta mo prea from olgeta. Taem ol pipol oli eksperiensem ol helt problem wanwan taem mo blong sot taem, o ol situesen we oli save se bae i hapen olsem bonem bebi o katem man, seves blong yu, ol kaekae, kaen fasin, mo ol prea olsem i soem se yu kea. Long wan imejensi, hamas yu wantem blong help kwiktaem i impoten tumas.
4. Help blong givim paoa long olgeta. Speseli taem ol pipol oli fesem ol helt problem we i series o blong wan longfala taem, oli nidim moa help o seves blong yu, from problem we i stap i series o bigwan tumas. Bae oli nidim help tu blong lanem olgeta samting ia olgetawan:
-
Faenemaot ol nid blong olgeta. ?Wanem nao oli save finis abaot kondisen blong olgeta? ?Oli filim olsem wanem abaot kondisen blong olgeta? ?Wanem nao i ol wari mo nid blong olgeta naoia, mo long fiuja? Lisin wetem lav mo no jajem olgeta blong helpem olgeta blong eksperiensem wanem i ril.
-
Tingbaot ol samting we oli strong long hem. Askem abaot ol nara kaen hadtaem we oli bin fesem mo wanem oli bin lanem aot long ol eksperiens ia. Poenem aot ol gudfala kwaliti, ol valiu, mo ol skil we yu luksave se oli gat. Askem wanem ol valiu blong olgetawan we i moa impoten long olgeta blong laef long niufala situesen ia. ?Olsem wanem oli save laef folem ol valiu ia?
-
Mekem wan plan. ?Wanem ol desisen i nidim blong tekem naoia, mo wanem moa infomesen yet oli nidim blong mekem ol desisen ia? ?Wanem ol help o risos oli nidim naoia, mo wanem bae oli nidim long wan longfala taem? ?Wanem ol samting we oli save jusum we oli i stap? ?Wanem ol gud mo nogud samting blong wanwan samting ia?
-
Oganaesem tim blong olgeta ?Huia i save help? Ol stret famli oli gat responsabiliti blong help, be ol nara famli, ol fren, mo ol nara memba blong wod, ol helt profesenol, ol pablik seves we oli stap, yu mo kompanion blong yu, mo Tabu Spirit, evriwan i save kam pat long tim blong olgeta. Olsem we i stret mo wetem raet we oli givim, mekem presiden blong Rilif Sosaeti mo kworom presiden oli kam pat blong helpem olgeta blong luk save olsem wanem yu, ol nara memba, mo ol Jos risos oli save help .
-
Invaetem Spirit. Prea wetem mo from olgeta blong invaetem Lod blong konfemem mo gaedem ol desisen blong olgeta mo helpem olgeta filim lav blong Hem.