Welkam long Namba Ia
Yumi Save Luksave Yumiwan Bakegen tru long Ol Lata-dei Sent blong Bifo
Joseph and Emma with Baby Alvin, by Liz Lemon Swindle, may not be copied
Olsem wan man we i stadi long histri blong ol pepa blong Josef Smit, mi laekem tumas blong stap givim ol toktok long taem blong divosen mo blong stap joen wetem ol memba blong stap storian abaot histri blong Jos. Taem mi bin mekem hemia, mi faenemaot se sam pipol oli luk se i had blong stap luksave olsem wanem laef blong yumi tedei i go wetem hemia blong Ol Sent long taem blong bifo. Wanem we mi luk long olgeta wanwan i, oltaem oli lukluk nomo long ol samting we i mekem oli kam ol man we oli gat strong paoa long tingting mo ol fasin blong olgeta, i mekem olsem se oli neva gat hadtaem wetem fasin blong gat tu tingting, sik o fasin blong lusum hop.
Be ol memba blong Jos we oli bin laef long ol 1800, oli no ol defdefren man, be oli ol man olsem yu mo mi tedei. Oli bin save wanem i glad mo hapines, sobodi mo safaring—mo oli bin save wanem i ol nomol dei, we i no gat samting spesel i hapen long olgeta. Mi lanem plante samting aot long ol eksperiens blong olgeta abaot olsem wanem oli save mekem mo go tru long evri samting we i blong laef.
Mi hop se stadi blong yu long Doktrin mo Ol Kavenan long yia ia i stap helpem yu blong lanem abaot wei we Ol Sent long taem blong bifo oli fesem ol jalenj blong laef. Mi hop tu se atikol blong olsem wanem Mary Ann Young, waef blong Brigham Yang, i bin go tru long ol tes blong laef, bae i helpem fet blong yu mo helpem yu blong luksave olsem wanem ol jalenj blong yu i kolosap semmak long ol jalenj blong sista Ann Yang mo ol narafalawan . (luk long pej 32). I nomata long medel blong ol hadtaem mo harem nogud, fet blong Mary Ann i bin mekem, olsem we hasban blong hem i bin raetem: “hem i bin stap kwaet taem hem i bin stap pas tru long evri strong win.”
I gat plante samting we yumi save lanem long olgeta blong bifo we oli ded finis—i no blong lanem samting aot long ol merikel eksperiens blong olgeta nomo, be tu, aot long kwaet fasin blong olgeta blong givim evri tingting mo hat blong olgeta.
I Kam long Matthew C. Godfrey
Jos Histri Dipatmen