Ol Voes blong Ol Lata-dei Sent
Plis Kambak
Taem mifala i gat tri pikinini, Vanessa i talem se, “Yumi nidim relijin long haos ia.”
Taem mi gat 12 yia, bigfala brata blong mi i karem i kam long hom ol ful taem misinari, mo oli introdiusum mifala long Jos Ia blong Jisas Kraes blong Ol Lata-dei Sent. I no longtaem, mama blong mi i stat blong tekem tufala brata blong mi, sista blong mi mo mi i go long Jos. I no longtaem, mifala evriwan i kasem baptaes.
Sloslo, mifala i stop blong go long jos. Mi laekem Jos oltaem, be taem mi gat 17 yia, ol samting long laef blong mi oli bin lidim mi i go long wan defren rod. Mi bin traem blong stap olsem wan gudfala man, mo mi neva gat wan rabis hat. Be mi bin lus mo statem blong laef folem ol wei blong wol. Mi no bin save o luksave hemia, be wol i bin holemtaet mi.
Afta, mi mitim Vanessa. Wan dei, afta we mitufala i bin stap tugeta blong sam taem, hem i talem, “Yumi nidim relijin insaed long haos ia.” Long taem ia, mitufala i gat tri pikinini finis.
Wetem wol olsem we i stap, mitufala i wari long wanem rod nao long saed blong spirit, bae mitufala i givim long ol pikinini blong mitufala. Mi tingting se, sapos mi gobak long relijin, bae mi gobak long jos blong mi. Mi tingbaot se i bin wan ples wetem ol gudfala pipol.
Mi bin toktok long wan memba blong Jos mo talem long hem se mi stap tingting blong kambak long Jos.
“!Plis kambak!” hem i talem.
Bigfala wari blong mi i we bae ol pikinini blong bae oli ting se Jos i no laef mo bae oli no laekem, be oli bin laekem. Taem mifala i gohed blong go long jos, Vanessa i disaed se i nogat wan samting we i semmak long Jos we i helpem ol famli oli gro tugeta. I bin stret samting ia nao we hem i stap lukaotem. Vanessa mo mi i bin mared, mo hem mo ol pikinini blong mitufala oli kasem baptaes.
Naoia mifala i stap wokbaot long rod blong gospel olsem wan famli. Gol blong mifala i blong sil tugeta insaed long tempol.
Long taem we oli stap bildim Rio de Janeiro Brasil Tempol, mi wokbaot pas long ples ia kolosap evri dei. Bae mi talem long ol fren blong mi, “Wan dei, bae mi mared insaed long bilding ia.”
“!Man yu stap talem semmak samting evri dei!” oli talem.
Mi talem evri dei from se mi save se tempol i stap kam kolosap blong i finis, mo mi wantem rimaenem miwan blong gohed blong stap mekem ol stret samting mekem se famli blong mitufala i save sil tugeta. Hemia i tingting blong hat blong mi.
Mi save se ol pikinini blong mi bae oli stat blong lanem moa abaot wol mo go tru long ol semmak samting we mi bin go tru long hem. Be taem mi stap serem eksperiens blong mi wetem olgeta, mi talem, “Plis no go kolosap nating long ol samting we mi bin mekem from se i nogat praes long hem.”
Mi leftemap tingting blong ol pikinini blong mi blong stadi long gospel blong Jisas Kraes mo lukluk moa blong stap olsem ol misinari naoia mekem se oli save blesem ol narawan. Oli no andastanem evri samting, be oli stap lanem. Hemia i wanem mi wantem blong olgeta.