Ol Yang Adalt
Long Taem we Tingting i Tu, Letem Doa i Open long fet
I nomata long sam taem bae yumi gat tu tingting abaot ol eksperiens blong yumi long saed blong spirit, tingting blong save stret samting bae i kambak fulwan kwiktaem.
I nomata sapos yumi groap long Jos o konvet i kam afta, plante long yumi maet oli eksperiensem ol taem we oli stap gat ol kwestin mo tu tingting. Yumi stap gat ol gudfala eksperiens long saed blong spirit, be afta, bae yumi stap tingting bakegen se: ?Ol eksperiens ia long saed blong spirit oli ril? o ?mi stap tingting nomo se mi stap filim Spirit? ?Wanem sapos wan long ol samting ia i no tru? ?Mo olsem wanem long ol kwestin blong mi we mi no kasem wan ansa yet? ?From wanem mi save stap long Jos sapos mi nomo sua se i tru yet?
!Long mi, mi bin sapraes se ol kwestin ia oli kam long mi afta we mi bin givim seves long misin blong mi! Mi bin save trutok wetem strong biliv mekem se mi wantem blong go prijim long narafala man blong wan mo haf yia—mo naoia mi stap tu tingting long evri samting we mi bin save mo bin tijim. Bae i wan westem taem nomo sapos eniwan long ol samting ia i no bin tru. ?So evri samting ia i tru, evri samting we mi bin tijim? O mi nomo mi bin wantem ol samting ia blong i tru? Afta we mi stap luk ol fren oli stap lego Jos mo taem miwan mi stap traehad from biliv, mi stap askem long miwan sapos mi bin stap giaman long miwan.
Long taem ia, mi no stop blong go long Jos o blong stap obei ol komanmen from se mi gat ol bigfala kwestin. Be afta, from se mi bin gat ol kwestin, mi traem blong folem kaonsel blong Presiden Russell M. Nelson we i blong “kam antap long paoa blong [yumi] blong kasem revelesen.”1
Mi save se “i no gat wan samting i openem ol heven olsem taem yumi kombaenem fasin blong stap klin gud, obei fulwan, kakae long ol toktok blong Kraes insaed long Buk blong Momon evri dei, mo gobak oltaem long tempol mo mekem famli histri wok.”2 Mi bin filim se i impoten tumas blong stap kolosap long God. Nomata evri samting ia, Hem nomo bae i givim ol ansa long ol kwestin blong mi.
Stori blong Eunice
Wan dei mi stap ridim buk ia Saints: The Story of the Church of Jesus Christ in the Latter Days, nao mi kam krosem wan wan stori blong wan woman we i pulum intres blong mi, long ol eli taem blong Restoresen. Eunice Franklin i bin gat ol semmak kwestin mo ol semmak wari olsem mi.
Eunice i bin kasem baptaes long Niu Yok long wan misinari we nem blong hem i Elijah Able. Hem i konvet fulwan i kam long gospel long taem we hem i baptaes. Be afta taem we Elijah i go long Kanada blong prij, Eunice i stat blong gat tu tingting long gospel mo wanem we hem i bin save long wan taem se i tru. Hem i stat blong askem hemwan plante se, sapos profet Josef Smit i rili wan profet, mo se Buk blong Momon i wan tru skripja. Hem i nomo stap slip gud long naet, mo stap ting se, nogud oli bin giaman long hem.
Lod i soem ol hadtaem blong Eunice long wan drim, long Elijah, mo kwiktaem Elijah i gobak long Niu Yok. Taem hem i noknok long doa, Eunice i sek bigwan—hem i stap mekem plan rere blong talem long Elijah se hem i nomo biliv, taem bae hem i luk Elijah bakegen. Be afta, i no bin hapen, mo hem i letem Elijah blong kam insaed long haos. Taem Elijah i invaetem hem blong kam lisin long toktok blong hem long naet ia, hem i stop mo i no wantem blong go. Be long en, hem i go nomo mo lisin long wanem we Elijah bae i talem.
Long toktok blong Elijah, hem i kwotem 1 Pita 4:12, we i talem blong “Ol fren. I nogud yufala i sapraes long ol strong samting ya we oli kam blong traem bilif blong yufala.” Ol strong samting ya we oli kam blong traem bilif blong Eunice, oli no save win—taem we Eunice i bin harem toktok blong Elijah, ol tingting blong hem we i fasfas, i lus evriwan. Saints i talem long wei ia: “[Filing ia blong save stret se i tru i i kambak fulwan kwiktaem long mi.”3
Stret Save abaot Trutok i Kambak Fulwan Kwiktaem
Eksperiens blong Eunice i tajem mi, mo mi luklukbak long hem bakegen mo bakegen. Olsem Eunice, mi lan aot long ol toktok blong Elijah we i simpol mo gat bigfala paoa. Yumi mas “tingting long hem se i no wan sapraes” blong gat ol kwestin abaot biliv blong yumi. Hem i oraet nomo. Taem we trutok long wan taem i stap kamdaon long heven, bae i gat ol narafala taem we bae yumi filim se i no gat ren long saed blong spirit. Bae yu stap askem yumiwan se yumi eva bin filim tru ren. Wetem no ansa mo konfemesen blong oli givim i kam yet, yumi save gohed blong prea from ren blong revelesen. Yumi save lukaotem wan witnes se wanem we i tru yestedei, i tru semmak long tedei. Elda Jeffrey R. Holland blong Kworom blong Olgeta Twelef Aposol i bin tijim se: “(Sapos i bin raet taem yu bin prea abaot wan samting, mo yu bin trastem , mo yu bin laef from, nao hem i raet tu naoia. … Fesem ol tingting blong yu we i fasfas. Winim ol fraet blong yu.”4
Blong openem doa long misinari fren blong hem bakegen nomata taem hem stap tingting from wanem hem i mas mekem olsem, Eunice i openem bakegen hat blong hem. Lod i save kasem Eunice bakegen mo helpem hem blong filim wan konfemesen abaot evri samting we hem i bin save bifo. long semmak wei, wanwan long yumi i save lego doa i open long fet, iven long ol hadtaem we yumi stap go tru long hem wetem ol tingting we i fasfas. Yumi save gohed blong mekem wanem we i raet mo stap lukaotem revelesen—iven taem yumi no sua from wanem stret yumi stap mekem.
Yumi lego doa blong yumi i open taem yumi stap gohed blong mekem ol smosmol samting we God i talem long yumi blong mekem we oli gud long sol blong yumi. Yumi kipim Sabat dei i tabu mo givim atendem ol miting blong yumi. Yumi ridim ol skripja iven sapos i wan ves nomo long wanwan taem. Yumi lisin long wan singsing o wan toktok blong konfrens. Yumi toktok long Papa long Heven abaot ol wari mo ol hop blong yumi mo askem Hem blong helpem yumi save trutok. yumi obei ol komanmen, sakem sin, mo lukaotem kampani blong Tabu Spirit.
Sapos yumi nomo save gat wan filing blong hat we i wantem blong biliv, yumi save gohed blong mekem ol smosmol samting mo letem filing blong hat ia bae i stap wok tru long ol samting ia raon long yumi. Yumi save faenem sam spes long hat blong yumi blong biliv i save gro moa. (Luk long Alma 32:27.)
Wanem Mi Save
Nomata samtaem, mi stap askem miwan plante, mi wokbaot mo muvmuv olbaot, mi bin lanem mo lanem bakegen blong miwan se hemia i Jos blong Kraes. Nomata se Josef Smit i no bin wan man we i stret evriwan, mi save se hem i wan profet we i kasem insperesen blong God mo hem i sakrifaesem evri samting mo givim bes blong hem we i fulwan, Mi save tu se Buk blong Momon i wan tru rekod blong taem bifo mo wan tabu skripja we oli lukaotem gud i stap blong dei blong yumi nomo. Papa long Heven i gohed blong konfemem hemia long mi evri dei. Mo mi glad blong konfemem ol trutok ia long Eunice Franklin tu.
Mi save se taem bae yumi letem ol doa mo hat blong yumi i open long trutok, God bae i helpem yumi blong filim wanem we i ril mo wanem we i no ril, tru long Tabu Spirit, Ol eksperiens blong yumi long saed blong spirit bae yumi akseptem long ol taem blong olgeta. Mo evri taem afta, taem bae yumi filim se ol tingting we i fasfas i stap krol i kambak insaed, yumi save rimaenem yumi wanwan long ol wei we yumi bin filim gud. Olsem we Eunice i bin mekem, ol save blong yumi we i stret abaot gospel trutok bae i save flot i kambak.
Yumi no nid blong stap laef long ren i no foldaon blong ol tingting we i fasfas blong longfala taem tumas, sapos nomo yumi holem taet ol eksperiens blong yumi long saed blong spirit. Elda Neil L. Andersen blong Kworom blong Olgeta Twelef Aposol i talem blong “holemtaet ol tabu memori ia. … Trastem se oli kam long yu long Papa blong yu long Heven mo Pikinini blong Hem we Hem i Lavem. Letem olgeta i karem longfala tingting i kam long ol tu tingting blong yu mo save ia blong andastanem ol hadtaem blong yu. Mi promesem yu se taem yu luksave mo lukaotem wetem kea ol spirituol taem ia we i givim paoa long laef blong yu, plante moa bae i kam long y.”5u.
Mi save se blong olgeta we oli stap traehad blong ol niufala eksperiens long saed blong spirit mo praktisim fet long Kraes, promes ia i tru: “Man we i bilif long [Kraes], hem bambae i no save tosta bakegen” (Jon 6:35). Ol ansa we bae yumi nidim bae oli kam. Yumi save go tru ol strong samting ya we oli kam blong traem bilif blong yumi we Setan i stap sakem long rod blong yumi. Mo bae yumi save stap fetful long God blong yumi we i gat lav long evri dei blong yumi.