Ol Besik blong Gospel
Papa blong Yumi long Heven I Wantem Yumi blong Stap Hapi
Taem yumi tingbaot plan blong God blong stap glad, yumi save faenem glad, iven taem laef i had.
Evri artwok, be no hemia we i stap longwe long raet, oli kam long J. Kirk Richards
Bifo yumi bon i kam long wol ia, yumi bin stap laef wetem Papa long Heven olsem ol spirit pikinini blong Hem. Hem i givim long yumi, wan plan, blong helpem ol pikinini blong Hem blong lanem samting mo gro. Tru long plan blong Hem, yumi save kam moa olsem Hem mo stap klin inaf blong stap glad long laef we i no save finis. Plan ia i bin posibol from Pikinini blong God, Jisas Kraes, we i bin kam long wol blong safa from ol sin blong yumi, wan sakrifaes we oli singaotem Atonmen.
Plan blong Papa long Heven oli singaotem plan blong
-
stap glad (luk long Alma 42:8),
-
fasin blong sevem Man (luk long Moses 6:62),
-
fasin blong pemaot man (luk long Jekob 6:8), o
-
sore (luk long Alma 42:15).
Olsem we olgeta ia mo ol nara skripja oli soem, Papa long Heven i wantem yumi blong kam olsem Hem, gobak long Hem, mo stap hapi tru (luk long Moses 1:39).
Yumi Kam long Wol Ia blong Lanem Samting mo Gro
God i sendem yumi i kam long wol, blong mekem se yumi save gat wan bodi blong mit mo bun (luk long Jenesis 1: 26–27). Yumi nidim wan bodi blong helpem yumi blong eksperiensem laef long wol.
God i save se bae yumi no filim hapi oltaem. Yumi eksperiensem harem nogud, soa long bodi, mo tu, ded. Be tru long ol jalenj blong laef, Papa long Heven i stap helpem yumi blong lanem samting mo gro.
God i givim tu long yumi paoa blong jus, paoa ia blong save jus bitwin gud mo nogud. Hem i letem yumi blong jus blong yumiwan, wanem yumi tingting long hem mo wanem yumi mekem. Hem i givim ol skripja long yumi, mo ol profet we oli stap laef blong helpem yumi lan blong jusum wanem i raet (luk long Ebraham 3:25).
Traem blong Kam Olsem Jisas Kraes
God i no sendem yumi long wol ia mo no givim wan eksampol blong yumi folem (luk long Jon 13:15). God i sendem Pikinini Boe blong Hem, Jisas Kraes, blong soem rod long yumi. Blong lanem olsem wanem blong folem Hem, yumi save ridim ol skripja blong lanem huia Hem mo wanem Hem i mekem taem Hem i stap laef long wol. Yumi save traehad tu blong kam olsem Kraes taem yumi stap obei long God mo lavem ol narawan.
Taem yumi mekem ol mistek, yumi askem fogivnes mo lukluk long paoa blong Atonmen blong Jisas Kraes blong helpem yumi jenis. Yumi save stap glad taem yumi traem evri dei blong kam moa olsem Hem.
Ded I No En blong Hem
Taem yumi ded, spirit blong yumi i go long spirit wol. Long we, yumi gohed blong lanem samting taem yumi rere blong Laef Bakegen long Ded.
Long taem blong Laef Bakegen long Ded, bodi mo spirit blong yumi bae oli kam wan bakegen. Ol bodi blong yumi bae oli stret gud evriwan, mo bae yumi neva safa bakegen long saed blong ded o sik. (Luk long Alma 11:44–45.) Semmak olsem Jisas Kraes i bin ded mo laef bakegen, bae yumi evriwan i laef bakegen.
Taem God bae i jajem yumi, bae Hem i tingbaot ol aksen mo ol tingting blong hat blong yumi. Sapos yumi bin traem blong kipim ol komanmen mo ol promes we yumi mekem long Papa long Heven, nao, bae yumi save laef wetem Hem bakegen.
Laef wetem God mo Ol Famli blong Yumi long Heven.
Long selestial kingdom, bae yumi laef wetem God mo Jisas Kraes. Bae yumi save laef long selestial kingdom tu wetem ol famli blong yumi blong oltaem sapos yumi sil wetem olgeta. Bae yumi faenem pis, glad, mo spel (luk long Mosaea 2:41).
Laef blong yumi long wol bae i had sam taem, be sapos yumi folem Jisas Kraes, yumi save faenem glad long laef ia mo glad we i no save finis, long laef we i stap kam.
?Wanem Nao Ol Skripja Oli Stap Talem Abaot Plan blong Stap Glad?
Olsem wanem yumi laef long laef blong yumi i impoten. God bae i jajem mo givim riwod long yumi folem ol tingting mo aksen blong yumi. (Luk long Alma 41:3)
Setan i enemi long glad blong yumi. Hem i temtem yumi blong no yusum gud laef blong yumi long wol mo blong sin. Hem i wantem yumi blong harem nogud olsem hem. (Luk long 2 Nifae 2:27).
Taem yumi gat fet long plan we God i gat blong yumi, yumi save gat pis nomata wanem hadtaem yumi fesem. Yumi save lukluk i go fored blong stap laef blong oltaem wetem God. (Luk long Doktrin mo Ol Kavenan 59:23..)