“Bambae Mi Lidim Yufala I Go”

Mi tingbaot wan taem we Lod i bin lidim sam pipol. Mi bin stap givim seves olsem wan misin presiden long Poto Alegre Brasil, Saot Misin. Wan misinari blong mifala i gat wan sik we oli singaotem “cleft palate” (lip antap long maot i split) we hem i neva go long hospital blong oli tritim. Taem hem i toktok, bae win i stap go tru long antap long maot blong hem mo kamaot long nus blong hem. I had tumas blong ol narafala man oli andastanem hem.

Elda ia i talem long mi se hem i bin prea abaot problem blong hem ia. Spirit i talem long kwaet voes se, mi, bae mi helpem hem blong faenem wan ansa. Simpol fet blong hem we i strong ia i givim insperesen long mi. Mi tanem mi i go long Lod blong faenem wan ansa.

Wan simpol operesen bae i save stretem problem, be blong kasem operesen i no wan simpol rod. Sapos mifala i mekem long praevet, bae i sas tumas long famli blong misinari ia. Long nara tingting, blong stap yusum pablik helt sistem bae i nidim sam apoenmen mo bae i luk olsem se bae i tekem evri manis blong misin blong hem we i stap yet

Evri taem, taem mi kasem wan had wok blong mekem, mi stap dipen long fet mo help blong waef blong mi. Mi eksplenem strong situesen blong misinari ia long hem mo askem hem blong toktok wetem olgeta long lokol pablik hospital. ?I gat eni wei we operesen i save hapen mo i fri, mo bae i save tekem hamas manis we hem i gat i stap?

Afta long wan prea blong askem help, waef blong mi i go long hospital. Hem i stap long wan longfala laen blong ol pipol we oli stap wet blong toktok long wan we i wok long hospital. Taem we laen i stap muv i go kolosap, waef blong mi i save harem olsem wanem oli stap handelem ol situesen blong olgeta we oli stap stanap long fored blong hem. Long plante, oli talem long ol pipol blong kambak long wan apoenmen long sikis manis taem o moa.

Waef blong mi i save se hemia bae i longwan tumas long misinari blong mitufala. Hem i kasem insperesen blong lego laen mo go tru long wan narafala doa. Long ples ia, hem i faenem wan narafala wokman blong hospital. Waef blong mi i talem nem blong hem mo eksplenem nid blong misinari blong mitufala.

Pikja

a woman talking to a surgeon

Wokman ia i givim instraksen long hem blong toktok stret wetem dokta blong katem man, we i stap long hospital long taem ia, mo i stap mekem wan operesen long wan narafala rum antap. Hem i eksplenem long dokta blong katem man wanem ol misinari oli stap mekem, mo olsem wanem bae misinari ia bae i kasem blesing sapos hem i save go tru long wan operesen blong fiksim antap blong maot blong hem ia.

Dokta i askem sam kwestin. Afta, hem i talem, “?Yumi save putum deit blong tu wik taem?” Hem i fulumap wan fom we i eksplenem operesen ia se i wan intres blong komuniti, mo we hem i intres tu blong mekem, from i tingting blong hemwan tu. Hem i pasem fom ia i go long asisten blong hem, blong i putum wan deit.

Ten dei i pas, dokta blong katem man i operetem misinari blong mitufala. I no longtaem afta, elda ia i gobak long fil, i fulap long glad mo i stap toktok long wan klia voes. Wetem bigfala glad long hat blong hem, hem i bin luksave se Lod i bin lidim hem i go.

Eksperiens ia blong misinari ia i wan testemoni se Papa blong yumi i harem ol prea blong yumi, mo i stap holem han blong yumi mo lidim yumi i go.

Blong toktok long saed blong spirit, yumi, yumi olsem ol smolsmol pikinini. Yumi no andastanem ol bigfala blesing we Papa long Heven i rere i stap blong yumi. Taem yumi stap groap long saed blong bodi, yumi stat blong andastanem moa abaot ol loa blong wol ia we oli kontrolem laef blong yumi. Be yumi no mas letem save blong wol ia i kam moa impoten bitim blong andastanem ol bigfala blesing we Papa long Heven i putum i stap blong yumi.

Moses, wan gudfala profet blong OlTesteman, i bin gat wan eksperiens we i soem hem olsem wanem save blong hem i bin smol. Afta hem “i bin lukluk i go, mo i bin luk wol ia we Lod i bin krietem hem long hem; mo Moses i bin luk wol mo ol en blong hem, mo evriwan long ol pikinini blong ol man, we Lod i krietem, mo i bin krietem; hem i bin sapraes.” Afta God i kamaot. Moses i stap hemwan. Mo from we hem i stap long paoa blong hemwan, hem i bin foldaon long graon.

“Mo i bin hapen se wan taem blong plante aoa i pas bifo Moses i bin kasembak paoa blong hem olsem man; mo hem i bin talem long hemwan: Nao, from hemia, mi save se man i nating nomo, mo samting ia, mi neva ting long hem” (Moses 1:8–10).

Sapos Lod i soem evri samting we yumi save mekem wetem paoa blong Hem, maet bae yumi filim se yumi smol tumas. Olsem Moses, bae yumi luk se, sapos i no God, yumi nating nomo.

Lod i lidim yumi step folem step i go, i no givim tumas long yumi. Hemia i letem yumi blong save kasem moa bitim wanem we yumi save mekem yumiwan.

“Hae God i talem se, tingting blong mi i no olsem tingting blong yufala,mo fasin blong mi i no olsem fasin blong yufala.

“Skae i antap we i antap, i antap olgeta long graon, mo long sem fasin, tingting blong mi i hae we i hae, i antap olgeta long tingting blong yufala, mo fasin blong mi i antap olgeta long fasin blong yufala” (Aesea 55:8–9).

Olsem we Lod i talem long Doktrin mo Ol Kavenan 78:18, yumi “no save tekem evri samting naoia.” Yumi no save andastanem evri samting we Hem i andastanem. ?Afta, wanem nao yumi mas mekem? Lod i ansa: “!Leftemap hed blong yu mo stap glad!”

Blong stap wokbaot long rod blong kavenan wetem glad, i minim tu blong gat fasin blong putum tingting i stap daon, olsem wan smol pikinini. Yumi mas wantem blong Papa i tijim mo lidim yumi (luk long Doktrin mo Ol Kavenan 112:10). Laef i joen long fulap samting we i mekem se i no posibol blong yumi save kontrolem evri samting we yumi stap mekem long wokbaot blong yumi. Mo yumi no save andastanem evri samting we yumi, o olgeta we yumi lavem, oli stap go tru long hem long ples ia long wol ia.

Be taem yumi trastem Lod mo letem Hem i lidim yumi tru long han blong Hem, yumi save kasem moa insaed long kingdom blong Hem, bitim wanem we yumi save tingting long hem. Bae yu save gat moa janis blong blesem laef blong ol pikinini blong Papa long Heven. Bae yumi save gat moa janis blong luksave han blong Sevya long laef blong yumi. Bae yumi gat moa janis blong talem tangkyu moa from sore blong Hem we i no gat en mo lav blong Hem.

Long en, Lod i stap lidim yumi i go, mo semtaem i mekem yumi tingbaot se “kingdom i blong yufala mo ol blesing blong hem, oli blong yufala, mo ol rij samting blong taem we i no save finis, oli blong yufala” (Doktrin mo Ol Kavenan 78:18)).

Mi gobak long eksampol blong misinari blong mi. Spirit i lidim hem blong askem help mo i kasem blesing blong gat wan operesen we i mekem hem i save toktok klia wetem ol narafala man. Afta, Spirit i lidim hem i go long olgeta we oli rere blong harem gospel mo ol blesing we bae oli kam tru long gospel, we insaed, i gat baptaes. Mi lukluk tu long eksampol blong waef blong mi. Testemoni blong hem i bin gro strong moa taem Lod i bin stap lidim hem. Hem i openem ol windo blong Heven mo kapsaetem wan blesing.

Mi glad tumas blong wok wetem yangfala misinari ia, we i fulap long simpol paoa blong fet. Mo mi glad se bae mi save laef long wan laef we i no save finis wetem waef blong mi, we i soem wan eksampol blong stap letem Lod i lidim hem i go.

I tru, kingdom mo ol blesing i blong yumi.